សម្រាប់រយៈពេល៤ខែ គិតចាប់ពីខែមេសា រហូតដល់ដំណាច់ខែកក្កដា ខាងមុខនេះ កសិដ្ឋានចិញ្ចឹមត្រីក្នុងខេត្តសៀមរាប អាចផ្គត់ផ្គង់ទនិ្នផលត្រីក្នុងខេត្ត បានរហូតដល់ ៤៨០០តោន ដែលបរិមាណនេះ ពុំមានការព្រួយបារម្ភ ពីការខ្វះខាតសាច់ត្រីនៅលើទីផ្សារ ខណៈនៅប្រទេសកម្ពុជា កំពុងបន្តប្រយុទ្ធប្រឆាំងនឹងជំងឺកូវីដ១៩ នេះបើតាមរបាយការណ៍ របស់រដ្ឋបាលជលផល នៃមន្ទីរកសិកម្ម រុក្ខាប្រមាញ់និងនេសាទខេត្តសៀមរាប កាលពីថ្ងៃទី១៨ ខែមេសា ឆ្នាំ២០២០។
លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បង្ហាញថា តាមការ ប៉ាន់ស្មានតម្រូវការ និងការផ្គត់ផ្គង់ផលនេសាទ ដើម្បីធានាបានស្ថេរភាពទិន្នផលត្រីនិងតម្លៃក្នុងទីផ្សារ នៅក្នុងខេត្តសៀមរាប ក្រុមការងារ បានចុះពិនិត្យ និងជំរុញការងារចិញ្ចឹម នៅកសិដ្ឋានចំនួនបីកន្លែង ក្នុងក្រុងសៀមរាប រួមមាន ទី១ កសិដ្ឋានចិញ្ចឹមត្រីឆ្ដោ ស្ថិតក្នុងសង្កាត់សៀមរាប ទី២ កសិដ្ឋានចិញ្ចឹមត្រីរ៉ស់ និងអណ្ដែង ក្នុងសង្កាត់សៀមរាប និងទី៣ កសិដ្ឋានចិញ្ចឹមត្រីប្រា និងត្រីទីឡាព្យាក្រហម ស្ថិតនៅសង្កាត់ក្របីរៀល។
លោកប្រធានមន្ទីរ បញ្ជាក់ថា នៅរដូវប្រាំង ការចិញ្ចឹមត្រី មិនសូវមានសកម្មភាពទេ ដោយសារ កម្ពស់ទឹកស្រះ បែ មានសភាពរាក់ ស្រះមួយចំនួនខ្វះប្រភពទឹក ដើម្បីបំពេញទឹក ទើបប្រជាកសិករ និយមចិញ្ចឹមត្រី នៅរដូវវស្សា។
តាមការឲ្យដឹងពី លោកស្រី កែវ យ៉ាដា ម្ចាស់កសិដ្ឋានចិញ្ចឹមត្រី នៅសង្កាត់ក្របីរៀល លើកឡើងថា កសិដ្ឋានចិញ្ចឹមត្រីលោកស្រី អាចចិញ្ចឹមនិងប្រមូលផលត្រី វិលជុំក្នុងមួយឆ្នាំ២ទៅ៣ដង ប្រសិនបើមានទឹកគ្រប់គ្រាន់។
លោកស្រី បញ្ជាក់ថា ប្រសិនបើបិទការនាំចូលច្រើន ប្រជាកសិករ អាចនាំគ្នា ងាកមកចិញ្ចឹមត្រីផ្គត់ផ្គង់ទឹផ្សារក្នុងស្រុក មួយវិញទៀត បញ្ហាទឹក និងថ្លៃអគ្គិសនី ក៏ជាកត្តាដែរ អាជ្ញាធរគួរគិតគូរផងដែរ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
