នាព្រឹកថ្ងៃទី២២ ខែមេសា ឆ្នាំ២០២០នេះ លោកស្រី យូ សុភា អភិបាលរងខេត្តសៀមរាប រួមនិងឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានប្រធានគណៈចលនាសាសនាឥស្លាមខេត្ត បានជួបសំណេះសំណាល និងនាំយកកញ្ចប់អាហារស្រាយបួសខែរ៉ាម៉ាឌន ជូនដល់សាសនិកឥស្លាម មានការខ្វះខាត ចំនួន១៥០គ្រួសារ ស្ថិតនៅ ក្នុងវិហារឥស្លាម អាន់នៀក ម៉ាស់ ភូមិស្ទឹងថ្មី សង្កាត់ស្វាយដង្គំ ក្រុងសៀមរាប។
ឯកឧត្តម អែល សៀត បានមានប្រសាសន៍ថា ក្នុងនាមអាជ្ញាធរខេត្ត ក៏ដូចជាគណៈអ៊ីម៉ាំសាសនាឥស្លាមខេត្តសៀមរាប តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូននៅតាមសហគមន៍ខ្មែរឥស្លាមជានិច្ច ជាពិសេសនៅក្នុងឱកាសបួសខែរ៉ាម៉ាឌននេះផ្ទាល់តែម្តង។
ឯកឧត្តម អំពាវនាវដល់សាសនិកឥស្លាមទាំងអស់ ត្រូវចូលរួមឲ្យបានផុលផុស ក្នុងការបរិច្ចាគទានផ្សេងៗឲ្យកាន់តែច្រើន ដល់សហគមន៍ គ្រួសារអ្នកខ្វះខាត និងរាល់អំពើកុសល្យផ្សេងៗ ក្នុងខែពិសិដ្ឋរបស់ឥស្លាមរ៉ាម៉ាឌន ព្រោះរយៈពេលនេះ សាសនិកឥស្លាម នឹងទទួលបានផលបុណ្យច្រើនជាងខែនានា។
ព័ត៌មានជាតិ ថ្មីៗ
មានប្រសាសន៍ សំណេះសំណាលនាពេលនោះដែរ លោកស្រី យូ សុភា លើកឡើងថា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ទោះបីសាសនាព្រះពុទ្ធ ជាសាសនារបស់រដ្ឋ ក៏ប៉ុន្តែគោលនយោបាយសុខដុមបនីយកម្ម បានកំពុងផ្តល់សិទ្ធិសេរីភាពលើជំនឿសាសនា ជាមួយការផ្តល់ភាពកក់ក្តៅ និង ចូលរួមដោះស្រាយរាល់ទុក្ខលំបាករបស់សាសនិកគ្រប់សាសនា ក្នុងក្របខណ្ឌនៃប្រជាជាតិតែមួយ ដែលរួមរស់រួមសុខក្នុងម្លប់សន្តិភាពតែមួយ ។
លោកស្រីអភិបាលរងខេត្ត ក៏បានអំពាវនាវដល់ឥស្លាមទាំងអស់ ត្រូវបញ្ចៀសការជួបជុំក្នុងខែបួសរ៉ាម៉ាឌន យកចិត្តទុកដាក់ថែទាំសុខភាព រក្សាអនាម័យ លាងដៃនិងសាប៊ូ ឬអាកុល នៅពេលចូលក្នុងចំណោម មហាជនច្រើនត្រូវពាក់ម៉ាសការពារខ្លួន តែបើមានជំងឺឬអាការៈមិនស្រួល ឬមានជំងឺអាការៈសង្ស័យណាមួយ សូមប្រញាប់ទៅពិនិត្យសុខភាព កន្លែងដែលក្រសួងសុខាភិបាលចាត់តាំង ដើម្បីទប់ស្កាត់ឲ្យបានទាន់ពេលវេលា ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
