នៅព្រឹកថ្ងៃទី២៣ ខែមេសា ឆ្នាំ២០២០ អាជ្ញាធរស្រុកក្រឡាញ់ រួមនិងមន្ត្រីសុខាភិបាលខេត្ត បានអនុញ្ញាតឲ្យប្រជាពលរដ្ឋ ទើបត្រឡប់ពីបរទេស ចំនួន៨២ ត្រឡប់ទៅលំនៅដ្ឋានវិញ បន្ទាប់ពីពិនិត្យឃើញថាមានសុខភាពល្អ និងបានអនុវត្តន៍ការដាក់ខ្លួននៅដាច់ដោយឡែក រយៈពេល១៤ថ្ងៃ នៅវិទ្យាល័យក្រឡាញ់ ស្ថិតក្នុងស្រុកក្រឡាញ់ ខេត្តសៀមរាប។
តាមរបាយការណ៍របស់រដ្ឋបាលស្រុកក្រឡាញ់ បង្ហាញថា ប្រជាពលរដ្ឋចំណាកស្រុក មានចំនួនសរុប ១២,០៧៩នាក់ ក្នុងនោះស្រី ៥,២៩២នាក់ ដោយស្ថានភាពជំងឺឆ្លងកូរ៉ូណាកូវីដ-១៩ មានការរីករាលដាលខ្លំាង នៅប្រទេសទាំងនោះ បានបណ្ដាលឲ្យ រោងចក្រ សហគ្រាស ផ្អាកដំណើរ ទើបធ្វើឲ្យប្រជាពលរដ្ឋចំណាកស្រុកជាច្រើន ត្រូវត្រឡប់មកវិញ។
តាមសម្ដីរបស់ ប្រជាពលរដ្ឋមួយចំនួនទើបមកពីប្រទេស លើកឡើងថា ពេលចូលមកស្នាក់នៅដាច់ដោយឡែកបានប៉ុន្មានថ្ងៃដំបូង ពួកគាត់ មានការធុញទ្រាន់ខ្លះៗដែរ តែដោយមានការ ជួបសួរសុខទុក្ខពីអាជ្ញាធរ និងពន្យល់ពីការយកចិត្តទុកដាក់របស់រាជរដ្ឋាភិបាលមកលើពួកគាត់ និងក្រុមគ្រួសារ ទើបពួកគាត់ ខិតខំអនុវត្តន៍រហូតបាន១៤ថ្ងៃ។
ព័ត៌មានជាតិ ថ្មីៗ
ក្នុងឱកាសជួបសំណេះសំណាលនាពេលនោះ លោកស្រី ម៉ននី រងី្ស អភិបាលស្រុក និងជាប្រធានអនុគណៈកម្មការប្រយុទ្ធប្រឆាំងនឹងជម្ងឺកូវីដ១៩ ស្រុកក្រឡាញ់ បានថ្លែងអំណរគុណដល់ប្រជាពលរដ្ឋទាំងអស់ ដែលមានការអត់ធ្មត់ តស៊ូខ្ពស់ ក្នុងការអនុវត្តតាមការណែនាំរបស់រាជរដ្ឋាភិបាល និង ក្រសួងសុខាភិបាល។ ការដាក់ឲ្យដាច់នៅដោយឡែក រយៈពេល១៤ថ្ងៃកន្លងមក មិនមែនជាការរើសអើងចំពោះប្រជាពលរដ្ឋទើបត្រឡប់មកពីបរទេសឡើយ គឺជាវិធានការ ដើម្បីការពារសមាជិកគ្រួសារ រួមនិងប្រជាពលរដ្ឋទាំងអស់ កុំឲ្យឆ្លងជំងឺកាចសាហាវនេះ។
លោកស្រីអភិបាលស្រុក ក៏បានអំពាវនាវ ដល់ប្រជាពលរដ្ឋទាំងអស់ ត្រូវបន្តថែរក្សាអនាម័យរៀងៗខ្លួន ដូចជាលាងដៃនឹងសាប៊ូ អាកុល ឲ្យបានញឹកញាប់ ពេលចាប់កាន់វត្ថុជុំវិញខ្លួន ពាក់ម៉ាសចេញទៅកន្លែងមានមនុស្សកុះករ ជាពិសេសត្រូវផ្អាកការជួបជុំ ដើម្បីកាត់បន្ថយហានិភ័យនៃការឆ្លងជំងឺកូវីដ១៩នេះ។ ក្នុងករណីសង្ស័យថាមានអ្នកឆ្លងមកពីក្រៅស្រុក ឬមានចំងល់បន្ថែម សូមទំនាក់ទំនងទៅមណ្ឌលសុខភាពដែលនៅជិតបំផុត ឬទូរស័ព្ទទៅកាន់លេខ ១១៥។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
