កិច្ចប្រជុំក្រុមការងារបច្ចេកទេស រៀបចំផែនការវិនិយោគលើហេដ្ឋារចនាសម្ពន្ធ័ ថ្នាល ទូរទស្សន៍ Digital ជាតិ បានធ្វើឡើងនៅព្រឹកថ្ងៃទី២៨ ខែមេសា ឆ្នាំ២០២០ ក្រោមអធិបតីភាព ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន ។
ក្រុមការងារបច្ចេកទេសរៀបចំបង្កើតថ្នាលទូរទស្សន៍ឌីជីថលជាតិ (National Digital TV Platform) ដើម្បីដោះស្រាយបន្ទារហ្រ្វេកង់ 700 MHz សម្រាប់វិស័យទូរគមនាគមន៍ និងផ្លាស់ ប្តូរការផ្សាយទូរទស្សន៍ពីប្រព័ន្ធ អាណាឡូក ទៅជាប្រព័ន្ធ Digital ឲ្យបានទាន់ពេលវេលា ដើម្បីធ្វើសមាហរណកម្មទូរទស្សន៍ ឌីជីថល កម្ពុជា ទៅក្នុងតំបន់ និងនៅលើពិភព។ ការរៀបចំ ផែនការវិនិយោគលើហេដ្ឋារចនាសម្ព័ន្ធថ្នាលទូរទស្សន៍ ឌីជីថល មានរយៈពេលបីឆ្នាំដំបូង ២០២១ ដល់ ២០២៣ ។
ឯកឧត្តម រដ្ឋមន្រ្តី ខៀវ កាញារីទ្ធ មានប្រសាសន៍លើកឡើងថា ការផ្លាស់ប្តូរប្រព័ន្ធផ្សាយ ទូរទស្សន៍ ពីអានណាឡូក ទៅជា ឌីជីថល គឺជាកិច្ចការងារចាំបាច់ដែលកម្ពុជាត្រូវធ្វើ ហើយ គម្រោងនេះត្រូវបានលើកឡើងជាច្រើនឆ្នាំមកហើយ នឹងមានបណ្តាប្រទេសមួយចំនួនបាន មកសិក្សាពីកិច្ចការងារនេះផងដែរ ហើយទើបតែរាជរដ្ឋាភិបាលសម្រេចឲ្យបង្កើតនៅក្នុង ពេលនេះ ដោយដំបូងបានបង្កើតជាក្រុមការងារអន្តរក្រសួង ដើម្បីរៀបចំទូរទស្សន៍ ឌីជីថល ក្នុងជំហ៊ានទី១ រយះពេល ៣ ឆ្នាំ ។ ឯកឧត្តម រដ្ឋមន្រ្តី បានលើកពីប្រវត្តិនៃការផ្លាស់ប្តូរប្រព័ន្ធផ្សាយ ទូរទស្សន៍ អាណាឡូក ទៅជា ឌីជីថល ដោយមុនគេគឺ សហរដ្ឋអាមេរិក កាលពីឆ្នាំ២០១០ ហើយសម្រាប់ បណ្តាប្រទេសក្នុងអាស៊ាន បានសម្រេចឲ្យហើយនៅមុនឆ្នាំ២០២០ ។ ការផ្លាស់ប្តូរទៅជា ទូរទស្សន៍ ឌីជីថល គឺមានសារសំខាន់សម្រាប់បណ្តាប្រទេសទាំងអស់ ក្នុងការផ្លាស់រូបភាព ឯកសារ នានាបានល្អ និងងាយស្រួល ពិសេសសម្រាប់ប្រទេសកម្ពុជា គឺមានសារសំខាន់ណាស់ ដែលត្រូវប្រើប្រព័ន្ធ ឌីជីថល ដោយសារនៅឆ្នាំ២០២៣ កម្ពុជានឹងធ្វើជា ម្ចាស់ផ្ទះនៃការប្រកួត កីឡាស៊ីហ្គេម ហើយក្នុងនោះក៏ធានាឲ្យមានការផលិតឯកសារមួយ ចំនួន ដែលមានគុណភាពច្បាស់ ប្រភទ 4K ។ ដូច្នេះសម្រាប់កិច្ចការងារនេះ ត្រូវបានប្រមុខរាជរដ្ឋាភិបាល ប្រគល់ជូន ក្រសួងព័ត៌មាន ជាអ្នករៀបចំ ធ្វើការផ្លាស់ប្តូរប្រព័ន្ធផ្សាយ ទូរទស្សន៍ ពីអាណាឡូក ទៅជា ឌីជីថល ហើយអ្វីដែលសំខាន់សម្រាប់កិច្ចប្រជុំនាពេលនេះ ឯកឧត្តម រដ្ឋមន្រ្តី ខៀវ កាញារីទ្ធ បានណែនាំដល់ក្រុមការងារបច្ចេកទេស ក្រសួងព័ត៌មាន ជាជំហ៊ានដំបូង ត្រូវធ្វើការសិក្សាពីតម្លៃចំណាយ ក្នុងការរៀបចំតម្លើងបង្គោលអង់តែន ទីតាំងអាគារ របង ម៉ាស៊ីនភ្លើង ជាដើម ឲ្យបានច្បាស់លាស់ ទើបចាំបន្តកិច្ចការងារផ្សេងៗទៅមុខទៀត។
នៅព្រឹកថ្ងៃដដែលនេះដែរ ឯកឧត្តម រដ្ឋមន្រ្តី ខៀវ កាញារីទ្ធ បានអញ្ជើញទៅ ពិនិត្យមើលទីតាំងមួយចំនួន ក្នុងបរិវេណអគ្គនាយកដ្ឋានទូរទស្សន៍ជាតិកម្ពុជា ដើម្បីធ្វើការ ពិនិត្យលទ្ធភាព និងស្វែងរកដៃគូឧបត្ថម្ភ ក្នុងការរៀបចំកសាងអាគារ បន្ថែម សម្រាប់ឲ្យ មន្រ្តីរាជការ និងថ្នាក់ដឹកនាំ ទូរទស្សន៍ជាតិកម្ពុជា មានកន្លែងគ្រប់គ្រាន់ក្នុងការបំពេញកិច្ច ការងារ ព្រោះថាបច្ចុប្បន្ននេះ ទូរទស្សន៍ជាតិកម្ពុជា មានកិច្ចការងារជាច្រើន ចំពោះមុខ និងពេលខាងមុខបន្តទៀត ហើយអ្វីដែលថ្មីគឺ ទទក ២ ឬ TVK2 ដែលកំពុងផ្សាយសាកល្បង កម្មវិធីបង្រៀនពីចម្ងាយ ដែលបានសហការជាមួយ ក្រសួង អប់រំយុវជន និងកីឡា ។
ព័ត៌មានជាតិ ថ្មីៗ
ប្រភព៖ ក្រសួងព័ត៌មាន
