បន្ទាប់ពីប្រជាពលរដ្ឋខ្មែរ បានវិលត្រឡប់ពីបរទេស ជាពិសេសប្រទេសថៃ ចូលមកក្នុងប្រទេសកម្ពុជា ក៏ដូចជាខេត្តសៀមរាប បច្ចុប្បន្នតាមការឲ្យដឹងពីអាជ្ញាធរស្រុកមួយចំនួន ក្នុងខេត្តសៀមរាប មានជនខិលខូចមួយចំនួន បានអូសទាញពួកគេ ឲ្យត្រឡប់ទៅធ្វើការនៅប្រទេសថៃវិញ ខណៈស្ថានភាពជំងឺកូវីដ១៩ នៅលើសកលលោកនៅតែស្ថិតក្នុងភាពអាសន្ននៅឡើយ។
នៅក្នុងកិច្ចប្រជុំ ស្ដីពី វឌ្ឍនភាពស្ថានភាពទូទៅនៃវិធានការការពារ ការបង្ការទប់ស្កាត់ជំងឺកូវីដ១៩ នៅក្នុងខេត្តសៀមរាប នៅព្រឹកថ្ងៃទី២៩ ខែមេសា ឆ្នាំ២០២០ នាសាលាខេត្តសៀមរាប លោកស្រី ម៉ននី រង្សី អភិបាលស្រុកក្រឡាញ់ បង្ហាញថា ចំពោះករណីនេះ អាជ្ញាធរស្រុកបានចាត់វិធានការ ដោយមានកិច្ចសហការ ជាមួយកម្លាំងសមត្ថកិច្ច ដើម្បីទប់ស្កាត់ការវិលត្រឡប់ទៅបណ្ដាប្រទេសដែលកំពុងមានការប្រឈមនឹងជំងឺកូវីដ១៩នេះ។
យ៉ាងណាក៏ដោយ លោក ពិន ប្រាកដ អភិបាលរងខេត្តសៀមរាប បានថ្លែងនូវការលើកទឹកចិត្តដល់បណ្តាថ្នាក់ដឹកនាំមូលដ្ឋានគ្រប់លំដាប់ថ្នាក់ រួមទាំងមន្រ្តីជំនាញពាក់ព័ន្ធផងដែរ ដែលបានលះបង់គ្រប់បែបយ៉ាង ជំនះរាល់ការលំបាក ដើម្បីបង្ការ ទប់ស្កាត់ការឆ្លងមេរោគកូវីដ១៩ ដល់ប្រជាពលរដ្ឋនៅក្នុងខេត្ត។
ព័ត៌មានជាតិ ថ្មីៗ
លោកបញ្ជាក់ថា បើទោះជារលកទី១ ដែលជាការនាំចូលមេរោគ ត្រូវបានកាត់ផ្តាច់ ក៏ប៉ុន្តែការទប់ស្កាត់នៃរលកទី២ នៃការឆ្លងមរោគកូវីត-១៩ ទៅក្នុងសហគមន៍ គឺជាកង្វល់ដ៏ធំរបស់ប្រមុខរាជរដ្ឋាភិបាល។ ទោះបីជាមានសេចក្ដីណែនាំ ឬបទបញ្ជារបស់រាជរដ្ឋាភិបាលក៏ដោយ វាទាមទារ ឲ្យមានការចូលរួមអនុវត្តន៍ទាំងអស់គ្នា ខណៈបច្ចុប្បន្ន ប្រជាពលរដ្ឋខ្មែរ នៅតែបន្តធ្វើដំណើរត្រឡប់មកពីប្រទេសថៃនៅឡើយ។
សូមជម្រាបថា គិតត្រឹមថ្ងៃទី២៨ខែមេសានេះ ប្រជាពលរដ្ឋខ្មែរ ចំណួលស្រុក ត្រឡប់ពីប្រទេសថៃវិញ មានចំនួនប្រមាណជាង១ម៉ឺននាក់ ក្រោយពីការយកចិត្តទុកដាក់ធ្វើចត្តាឡីស័ក រយៈពេល១៤ថ្ងៃ មន្រ្តីជំនាញ បញ្ជាក់ថាពួកគេពុំមាន រកឃើញករណីវិជ្ជមានមេរោគកូវីដ១៩ នោះឡើយ។
អត្ថបទ និង រូបថត ៖ ងិន គឹមឡេង
កែសម្រួលអត្ថបទ ៖ សេង ផល្លី
