គិតត្រឹមថ្ងៃទី២៧ ដល់ថ្ងៃទី៣០ ខែមេសា ឆ្នាំ២០២០នេះ ប្រជាពលរដ្ឋក្នុងខេត្តសៀមរាប បានសម្រុក ទៅត្រួតពិនិត្យលក្ខណៈបច្ចេកទេសយានយន្ដ ឬហៅថា ឆៀក ជាមធ្យមជាង១០០គ្រឿងក្នុងមួយថ្ងៃ បើធៀបទៅនឹងរយៈពេលប៉ុន្មានខែ មុនមានករណីជំងឺកូវីដ១៩នៅក្នុងខេត្តសៀមរាប ដែលមានជាមធ្យមត្រឹមតែជាង៨០គ្រឿងតែប៉ុណ្ណោះ នេះបើតាមការបង្ហាញរបស់លោក ឈិត ពិសី អ្នកគ្រប់គ្រងកន្លែងត្រួតពិនិត្យលក្ខណៈបច្ចេកទេសយានយន្ដសាខាខេត្ដសៀមរាប។
កំណើន នៃ ការត្រួតពិនិត្យលក្ខណៈបច្ចេកទេសយានយន្តនៅក្នុងខេត្តសៀមរាបនេះ បន្ទាប់ពីមានការប្រកាស សេចក្ដីជូនដំណឹងរបស់ អគ្គស្នងការនគរបាលជាតិ លើការរឹតបន្តឹងអនុវត្តច្បាប់ស្តីពីចរាចរណ៍ផ្លូវគោក ដែលនឹងចាប់ផ្ដើមនៅថ្ងៃទី០១ ខែឧសភា ឆ្នាំ២០២០ ខាងមុខនេះតទៅ។
តាមការបញ្ជាក់របស់ អ្នកគ្រប់គ្រងកន្លែងត្រួតពិនិត្យលក្ខណៈបច្ចេកទេសយានយន្ដសាខាខេត្ដសៀមរាបរូបនេះ ដើម្បីកាត់បន្ថយការខាតបង់ពេលវេលារង់ចាំ ក្នុងការត្រួតពិនិត្យលក្ខណៈបច្ចេកទេសយានយន្ត ម្ចាស់យានយន្តទាំងអស់ ចុះឈ្មោះតាមគេហទំព័រក្រសួងសាធារណការ និងដឹកជញ្ជូន ជាមុន ដើម្បីធ្វើការណាត់ជួបនៅតាមទីតាំងត្រួតពិនិត្យលក្ខណៈបច្ចេកទេសយានយន្ត ដែលនៅជិតលោកអ្នកបំផុត។
គួរបញ្ជាក់ថា ចាប់ពីថ្ងៃទី១ ខែឧសភា ឆ្នាំ២០២០នេះ ប៉ូលីសចរាចរណ៍ផ្លូវគោកនៅទូទាំងប្រទេស នឹងចាប់ផ្ដើមការរឹតបន្តឹងច្បាប់ចរាចរណ៍ផ្លូវគោក និងអនុវត្តន៍ការផាកពិន័យ ដល់អ្នកបើកបរ ដែលគ្មានវិញ្ញាបនបត្រ ត្រួតពិនិត្យលក្ខណៈបច្ចេកទេសយានយន្ត ឬប្រើវិញ្ញាបនបត្រហួសសុពលភាព ចំពោះរថយន្តធុនស្រាលត្រូវផាកពិន័យ១៨ម៉ឺនរៀល និងចំពោះរថយន្តធុនធ្ងន់ ត្រូវផាកពិន័យ ៣៧៥០០០ រៀល។ ដោយឡែក ចាប់ពីដើមខែកក្កដា ឆ្នាំ២០២០ខាងមុខនេះ សម្រាប់ វិញ្ញាបនបត្រ ត្រួតពិនិត្យលក្ខណៈបច្ចេកទេសយានយន្ត ហួសសុពលភាព ដែលបានកំណត់ មន្ត្រីត្រួតពិនិត្យលក្ខណៈបច្ចេកទេសយានយន្ត នឹងធ្វើការផាកពិន័យ នៅទីតាំងត្រួតពិនិត្យលក្ខណៈបច្ចេកទេសយានយន្ត ចាប់ពីតម្លៃ៥០០រៀល ក្នុងមួយថ្ងៃ ទៅតាមប្រភេទរថយន្តនីមួយៗ។
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
