សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បង្ហាញថា សមត្ថកិច្ចនឹងមិនឃាត់យានយន្តដែលធ្វើចរាចរណ៍ គោរពច្បាប់ត្រឹមត្រូវនោះទេ លើកលែងតែការបើកបរនោះបំពានច្បាប់ ត្រង់ចំណុចណាមួយ ដូចជាមិនពាក់មួកសុវត្ថិភាព ឬបំពានភ្លើងសញ្ញា យានយន្តខុសលក្ខណៈបច្ចេកទេសជាដើម នេះបើតាមប្រសាសន៍ សម្ដេចក្រឡាហោម ក្នុងកិច្ចប្រជុំ ពិនិត្យសេចក្ដីព្រាង សេចក្ដីណែនាំស្ដីពីតួនាទីភារកិច្ច និងរបៀបរបការងាររបស់រដ្ឋលេខាធិការ អនុរដ្ឋលេខាធិការ និងអគ្គនាយក និងអង្គភាពប្រហាក់ប្រហែលចំណុះក្រសួងមហាផ្ទៃ នាថ្ងៃទី៣០ ខែមេសា នៅទីស្ដីការក្រសួងមហាផ្ទៃ។
សម្ដេចបានបញ្ជាក់ថា ការអនុវត្តវិធានការរឹតបន្តឹងច្បាប់ស្ដីពីចរាចរណ៍ផ្លូវគោក ពិសេសពាក់ព័ន្ធនឹងការអនុវត្តអនុក្រឹត្យថ្មី ស្ដីពីការផាកពិន័យចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក គឺជាវិធានការ ឆ្លើយតបនឹងភាពអាសន្ននៃគ្រោះថ្នាក់ចរាចរណ៍ ដែលបានកើនឡើងនូវគ្រោះថ្នាក់ចរាចរណ៍ ក៏ដូចជាចំនួនអ្នកស្លាប់ រងរបួស ពិការ និងក្មេងកំព្រា យ៉ាងគំហុកកាលពីឆ្នាំកន្លងទៅ។ ដោយសារ កំណើននៃករណីគ្រោះថ្នាក់នេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្រេចកំណត់យកឆ្នាំ២០២០នេះ ជាឆ្នាំបង្កើនការរឹតបន្តឹងការអនុវត្តច្បាប់ជាងបណ្ដាឆ្នាំណាៗទាំងអស់ ដែលវិធានការនេះមិនមែនជាការដាក់បន្ទុកលើប្រជាពលរដ្ឋនៅក្នុងស្ថានភាពលំបាកនៃជំងឺកូវីដ១៩នោះទេ ប៉ុន្តែគឺដើម្បីសេចក្ដីសុខសុវត្ថិភាព សណ្ដាប់ធ្នាប់សាធារណៈ និងសុវត្ថិភាពសង្គម ។
សម្ដេចក្រឡាហោម អំពាវនាវដល់ ជនរួមជាតិទាំងអស់ សូមកុំមានទស្សនៈថា នគរបាលឆ្លៀតឱកាសនេះ ធ្វើបាបប្រជាជន សូមប្រជាពលរដ្ឋនៅទូទាំងប្រទេស ចូលរួមគោរពច្បាប់ចរាចរណ៍ទាំងអស់គ្នា ដើម្បីចូលរួមកាត់បន្ថយអ្នករងរបួស ពិការ និងស្លាប់ដោយសារគ្រោះថ្នាក់ចរាចរណ៍។
ព័ត៌មានជាតិ ថ្មីៗ
អត្ថបទ ៖ សេង ផល្លី
