ថ្ងៃទី០១ ខែឧសភា ឆ្នាំ២០២០ មានករណីគ្រោះថ្នាក់ចរាចរណ៍មួយកើតឡើងរវាង រថយន្តដឹកទំនិញធុនធំ២គ្រឿង បណ្ដាលមកពីអ្នកបើកបរខ្វះការប្រុងប្រយ័ត្ន ស្ថិតក្នុងភូមិដូនរាជ្យ ឃុំគោកធ្លកក្រោម ស្រុកជីក្រែង ខេត្តសៀមរាប។
តាមការលើកឡើង របស់អ្នកបើកបរ រថយន្តបង្ក បង្ហាញថា រថយន្តរបស់ខ្លួន បានដឹកទំនិញ ចេញមកពីក្រុងប៉ោយប៉ែត ឆ្លងកាត់ខេត្តសៀមរាប លុះមកដល់កន្លែងហេតុ មានរថយន្តបើកបញ្ច្រាស់ទិសគ្នា បើកភ្លើងហ្វា បណ្ដាលឲ្យមើលផ្លូវមិនឃើញ ហើយបានបើកអែមមកខាងស្តាំ ក្នុងល្បឿនលឿន ក៏បានទៅបុកនឹងចំហៀងរថយន្តយីឌុប ចតចោលនៅនឹងចិញ្ចើមផ្លូវ ដែលបានដាក់ស្លាកសញ្ញាចរាចរណ៍មានរថយន្តបញ្ហានៅលើដងផ្លូវ មើលមិនច្បាស់ ។
តាមការបញ្ជាក់របស់សមត្ថកិច្ចនគរបាលចរាចរណ៍ បានឲ្យដឹងថា ក្នុងករណីគ្រោះថ្នាក់នេះ បណ្តាលឲ្យរថយន្តបង្ក រហែកឃ្លុបផ្ទុកទំនិញជាចំណែកៗ និង ធ្លាក់ទំនិញរាយពាសពេលផ្លូវ។ ករណីគ្រោះថ្នាក់នេះដែរ បង្កដោយអ្នកបើកបរខ្វះការប្រុងប្រយ័ត្ន រីឯការដាក់ស្លាកសញ្ញាចរាចរណ៍របស់រថយន្តយីឌុបដែលចតចោលនៅតាមដងផ្លុវនោះ ក៏មិនបានត្រឹមត្រូវផងដែរ ទើបបណ្តាលឲ្យមានគ្រោះថ្នាក់នេះ ។
ចំពោះករណីគ្រោះថ្នាក់ចរាចរណ៍នេះ ពុំបង្កឲ្យមានអ្នករងរបួស ឬបាត់បង់ជីវិតឡើយ ដោយឡែករថយន្តទាំងពីរ កម្លាំងសមត្ថកិច្ចជំនាញ បាននាំយកទៅរក្សាទុកនៅអធិការដ្ឋាននគរបាលស្រុកជីក្រែង ដើមី្បធ្វើការដោះស្រាយតាមនីតិវិធី ៕
អត្ថបទ និង រូបថត ៖ ម៉ី សុខារិទ្ធ និង គឿនវេត
កែសម្រួលអត្ថបទ ៖ សេង ផល្លី
