នាថ្ងៃសុក្រនេះរុស្ស៊ីបានប្រកាសរកឃើញអ្នកឆ្លង COVID-19 ចំនួន ៧,៩៣៣នាក់ថ្មី ដែលជាអត្រាឆ្លងប្រចាំថ្ងៃខ្ពស់មួយកម្រិតថែមទៀត និងធ្វើឲ្យតួលេខអ្នកឆ្លងសរុប នៅប្រទេសរុស្ស៉ីកើនដល់ ១១៤,៤៣១នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅរសៀលថ្ងៃសុក្រ ទី០១ ខែឧសភា ឆ្នាំ២០២០។
បើតាមការបញ្ជាក់ពីអាជ្ញាធរសុខាភិបាលរុស្ស៊ី ចំនួនអ្នកស្លាប់ក៏បានកើនដល់ ១,១៦៩នាក់ផងដែរ បន្ទាប់រកឃើញអ្នកស្លាប់ថ្មី ៩៦នាក់ និង ១៣,២២០នាក់បានជាសះស្បើយឡើងវិញ។ មកទល់នឹងថ្ងៃសុក្រនេះ រុស្ស៉ីក្លាយជាប្រទេសលេខរៀងទី ៨ ដែលមានករណីឆ្លងដល់ខ្ទង់សែននាក់ ហើយស្ថិតនៅលេខរៀងដូចគ្នានេះដដែល ក្នុងចំណោមបណ្តាប្រទេស ដែលទទួលរងគ្រោះធ្ងន់ធ្ងរខ្លាំងបំផុត នៅលើពិភពលោកដោយសារ COVID-19 បើគិតពីចំនួនអ្នកឆ្លង។
គួរជម្រាបថា នៅចំពោះមុខការកើនឡើងខ្លាំងនៃអត្រាអ្នកឆ្លង COVID-19 នៅក្នុងប្រទេសរុស្ស៉ី ប្រធានាធិបតីរុស្ស៉ី លោក វ៉្លាឌីមៀ ពូទីន បានសម្រេចអូសបន្លាយពេលវេលា នៃការអនុវត្តវិធានការរឹតបន្តឹង ដើម្បីទប់ទល់ការឆ្លងរាលដាលនៃជំងឺនេះ រួមមានការឲ្យប្រជាជនឈប់សម្រាករហូតដល់ថ្ងៃទី១១ ខែឧសភា។
