កាលពីថ្ងៃទី០១ ខែឧសភា ឆ្នាំ២០២០ លោក ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បាននាំយកអំណោយជាសម្ភារៈ និងថវិកាមួយចំនួន ជូនដល់ប្រជាសហគមន៍ព្រៃឈើនៅចំការពូជឈើធ្នង់ចំនួន ៣សហគមន៍ រួមមានសហគមន៍ព្រៃខ្លុង សហគមន៍ព្រៃធ្នង់ និងសហគមន៍តាច្រាញ់ ស្ថិតក្នុងឃុំតាសៀម ស្រុកស្វាយលើ ខេត្តសៀមរាប។
អំណោយដែលបាននាំយកទៅប្រគល់ជូននាពេលនោះ ក្នុងសហគមន៍នីមួយៗ ទទួលបានវិទ្យុទាក់ទងចំនួន ៣គ្រឿង អាវ ២០ ស្លាកសញ្ញាចំនួន ១០០ស្លាក ថវិកាចំនួន ៤០ម៉ឺនរៀល។ជាមួយនោះ កងកម្លាំងប្រដាប់អាវុធទាំង៣ ក្នុងមួយអង្គភាពទទួលបានថវិកាចំនួន ៤០ម៉ឺនរៀល។
ឆ្លៀតក្នុងឱកាសនោះ លោក អភិបាលរងខេត្ត បានមានមតិសំណេះសំណាល ណែនាំដល់បងប្អូនប្រជាសហគមន៍អោយចូលរួមទប់ស្កាត់ជំងឺកូវី ១៩ (COVID-19) និងណែនាំដល់សហគមន៍បន្តការសហការគ្នាក្នុងការការពារព្រៃសហគមន៍ឲ្យបានគង់វង្ស ដើម្បីជាប្រយោជន៍សាធារណៈ ក៏ដូចជាការរក្សាបាននូវបរិស្ថានបៃតង។
ដើម្បីលើកទឹកចិត្ត ក៏ដូចជាជំរុញដល់ការថែរក្សា ការពារ ព្រៃឈើ និងសត្វព្រៃ ក្នុងខេត្តសៀមរាប លោកអភិបាលរងខេត្ត លោកស្នងការរង នៃស្នងការដ្ឋាននគរបាលខេត្ត លោកប្រធាន និងលោក លោកស្រី សមាជិក សមាជិកាក្រុមប្រឹក្សាស្រុកស្វាយលើ លោក អភិបាលស្រុកស្វាយលើ លោកប្រធាន អនុមន្ទីរកសិកម្ម រុក្ខាប្រមាញ់ និងនេសាទ លោក អភិបាលរងស្រុកប្រាសាទបាគង លោក នាយ នាយរងខណ្ឌរដ្ឋបាលព្រៃឈេីសៀមរាប លោក នាយក នាយរងសង្កាត់ព្រៃឈើ កងកម្លាំងប្រដាប់អារុធទាំង៣ តំណាងមន្ទីរបរិស្ថាន មន្រ្តីជំនាញពាក់ព័ន្ធនានា និងតំណាងសហគមន៍ព្រៃឈើទាំង៣ បានចុះពិនិត្យចំការឈើពូជ និងដាំកូនឈើទុកជាអនុស្សាវរីយ៍ផងដែរ។
អត្ថបទ និង រូបថត ៖ សាលាខេត្តសៀមរាប
