គិតត្រឹម ៤ខែដើមឆ្នាំ២០២០ អំឡុងវិបត្តិនៃការរីករាលដាលនៃជំងឺកូវីដ១៩ នៅប្រទេសកម្ពុជា ការផលិតអង្ករស មានការកើនឡើងជិត ៤១ភាគរយ សម្រាប់នាំចេញទៅកាន់ទីផ្សារពិភពលោក បើធៀបទៅនឹងរយៈពេលដូចគ្នាកាលពីឆ្នាំ២០១៩។
នេះបើតាមការលើកឡើងរបស់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ
ក្នុងឱកាស ឯកឧត្តមរដ្ឋមន្ត្រី លោក ង៉ាន់ ភិរុណ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប រួមនិង ឯកឧត្តម លោកជំទាវ ប្រតិភូអមដំណើរ ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទ
ចុះពិនិត្យពីវឌ្ឍនភាពនៃការអភិវឌ្ឍកសិដ្ឋានចិញ្ចឹមត្រីនៅសង្កាត់ស្វាយដង្គំ និងសង្កាត់សៀមរាប កាលពីរសៀលថ្ងៃទី២ ខែឧសភា ឆ្នាំ២០២០នេះ។
ឯកឧត្តមរដ្ឋមន្ត្រី បង្ហាញថា កាលពីឆ្នាំ២០១៩ កម្ពុជាផលិតអង្ករបាន ១០លាន៨សែន៨ម៉ឺនតោន ខណៈការផ្គត់ផ្គង់ក្នុងស្រុកត្រូវការប្រមាណ៥លានតោន ដូច្នេះកម្ពុជានៅសល់ជិត៦លានតោន សម្រាប់ធ្វើការនាំចេញទៅបរទេស។
ព័ត៌មានជាតិ ថ្មីៗ
ថ្លែងដោយក្ដីមោទនៈ ឯកឧត្តមរដ្ឋមន្ត្រីកសិកម្ម រំពឹងថា នៅឆ្នាំ២០២០នេះ ការនាំចេញអង្ករទៅកាន់ទីផ្សារពិភពលោក នឹងកើនជាងឆ្នាំមុនជិត ១លានតោន ស្របតាមគោលដៅរបស់រាជរដ្ឋាភិបាលកម្ពុជាបានដាក់ចេញ ខណៈបច្ចុប្បន្ន សហព័ន្ឋស្រូវអង្ករកម្ពុជា នៅសល់ស្រូវស្ដុកទុក លើសពីតម្រូវការ និងបានស្នើសុំទៅប្រមុខរាជរដ្ឋាភិបាលធ្វើការនាំចេញអង្ករសទៅកាន់ទីផ្សារពិភពលោក។
អត្ថបទ និង រូបថត ៖ យូ វង្ស
កែសម្រួលអត្ថបទ ៖ សេង ផល្លី
