យានយន្តមានកង់បី ឬ តាមការនិយមហៅថា ផាសអាប់ និងម៉ូតូមានសណ្ដោងរ៉ឺម៉ក ចាំបាច់ត្រូវមានបណ្ណបើកបរ ដើម្បីចៀសវាងរងការផាកពិន័យ ពីនគរបាលចរាចរណ៍ផ្លូវគោក នេះបើតាមការបញ្ជាក់ លោកឧត្ដមសេនីយ៍ត្រី តេង ច័ន្ទណាត ស្នងការរងនៃស្នងការដ្ឋានគរបាលខេត្តសៀមរាប នៅថ្ងៃទី០២ ខែឧសភា ឆ្នាំ២០២០។
លោកស្នងការរង បន្ថែមថា សម្រាប់បណ្ណបើកបរ របស់យានយន្តមានកង់បី ឬម៉ូតូមានសណ្ដោងរ៉ឺម៉ក ខណៈពេលនេះ យោងតាមការណែនាំរបស់អគ្គស្នងការដ្ឋាននគរបាលជាតិ មន្ត្រីនគរបាលចរាចរណ៍នឹងទុកពេលវេលា សម្រាប់ឲ្យម្ចាស់យាន្តយន្តកង់បី និងម៉ូតូមានសណ្ដោងរ៉ឺម៉កទាំងនោះ ទៅប្រឡងយកបណ្ណបើកបរ ប៉ុន្តែការទុកពេលវេលានេះ ពុំទាន់មានការកំណត់ច្បាស់លាស់នៅឡើយទេ។
លោកស្នងការរង បញ្ជាក់បន្ថែមថា ចំពោះម៉ូតូមានសណ្ដោងរ៉ឺម៉ក ឬភាសាសាមញ្ញហៅថាធុកធុក ចាំបាច់ត្រូវមាន ស្លាកលេខនៅលើរ៉ឺម៉កសណ្ដោង រួមនិងភ្លើងសញ្ញា វត្ថុចំណាំងផ្លាតផងដែរ។ ចំពោះបញ្ហានេះ លោកស្នងការ បានណែនាំដល់អ្នកបើកបរ យានយន្តកង់បី រួមនិងម៉ូតូមានសណ្ដោងរ៉ឺម៉កទាំងអស់ ត្រូវទៅពិនិត្យបច្ចេកទេសយានយន្ត នៅមណ្ឌលត្រួតពិនិត្យបច្ចេកទេសយានយន្ត ស្ថិតនៅភូមិស្វាយធំ ឃុំកណ្ដែក ស្រុកប្រាសាទបាគង ខេត្តសៀមរាប។
ព័ត៌មានជាតិ ថ្មីៗ
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
