គិតចាប់ពីថ្ងៃទី២៧ ខែមេសា រហូតដល់ថ្ងៃទី ០២ ខែឧសភា ឆ្នាំ២០២០នេះ មានរថយន្តយ៉ាងណាស់ ២០០គ្រឿងក្នុងមួយថ្ងៃ ចូលត្រួតពិនិត្យលក្ខណៈបច្ចេកទេស នៅមណ្ឌលត្រួតពិនិត្យបច្ចេកទេសយានយន្ត ឬហៅថា ឆៀក ស្ថិតក្នុងភូមិស្វាយធំ ឃុំកណ្ដែក ស្រុកប្រាសាទបាគង ខេត្តសៀមរាប ។
តាមសម្ដីរបស់ប្រជាពលរដ្ឋជាម្ចាស់យានយន្ត លើកឡើងថា ពួកគាត់មួយចំនួនរស់នៅខេត្តដទៃ និងធ្វើជាអ្នកប្រកបរបរទទួលទាន ពីខេត្តមួយទៅខេត្តមួយ ស្របពេលមានសេចក្ដីប្រកាស ការរឹតបន្តឹងច្បាប់ស្ដីពីចរាចរណ៍ផ្លូវគោក ព្រមទាំង មានភាពអនុគ្រោះ ក្នុងការត្រួតពិនិត្យបច្ចេកទេសយានយន្តនៅទូទាំងប្រទេស ទើបពួកគាត់សម្រេចមកធ្វើនៅទីនេះតែម្ដង។
លោក ប៉ែន សូនី ប្រធានការិយាល័យដឹកជញ្ជូនផ្លូវគោក នៃមន្ទីរសាធារណការ និងដឹកជញ្ជូនខេត្តសៀមរាប បង្ហាញថា ចំនួនកើនឡើង ចាប់តាំងពីចុងខែមេសានេះ បានបង្កឲ្យរថយន្តមានការកកស្ទះ រង់ចាំធ្វើការត្រួតពិនិត្យបច្ចេកទេស។ ក្រៅពីប្រជាពលរដ្ឋខេត្តសៀមរាប ក៏មានប្រជាពលរដ្ឋមកពីតាមបណ្ដាខេត្តរាជធានីផងដែរ។
ព័ត៌មានជាតិ ថ្មីៗ
ក្នុងឱកាសចុះត្រួតពិនិត្យ សកម្មភាពត្រួតពិនិត្យបច្ចេកទេសយានយន្តរបស់មន្ត្រី នៃមន្ទីសាធារណការ និងដឹកជញ្ជូន និងក្រុមដៃគូ លោក គី វីរិន្ទ ប្រធានមន្ទីរសាធារណការ និងដឹកជញ្ជូនខេត្ដសៀមរាប បង្ហាញថា កាលពីឆ្នាំ២០១៩ មានមនុស្សជិត២ពាន់នាក់ បានស្លាប់ដោយសារគ្រោះថ្នាក់ចរាចរណ៍ និងខូចខាតគិតជាទឹកប្រាក់ពី៣០០ ទៅ៣៥០លានដុល្លារអាមេរិច។ ស្របពេល ការររឹតបន្តឹងច្បាប់ស្ដីពីចរាចរណ៍ផ្លូវគោក ដែលចាប់ផ្ដើមអនុវត្តន៍កាលពីថ្ងៃទី០១ ខែឧសភា ឆ្នាំ២០២០នេះ មន្ទីរសាធារណការខេត្ត ក៏ដូចជាមន្ទីររាជធានីខេត្តនៅទូទាំងប្រទេស នឹងខិតខំឲ្យអស់ពីលទ្ធភាព ដើម្បីជួយសម្រួលដល់ប្រជាពលរដ្ឋ ដែលគោរពច្បាប់ និងចូលមកទទួលសេវានៅមណ្ឌលត្រួតពិនិត្យបច្ចេកទេសយានយន្តខេត្តសៀមរាបនេះ។
លោកប្រធានមន្ទីរ ក៏បានអំពាវនាវដល់ប្រជាពលរដ្ឋទាំងអស់ គប្បីគោរពច្បាប់ចរាចរណ៍ទាំងអស់គ្នា ព្រោះសោកនាដកម្ម កន្លងមកបានបន្សល់ទុក នូវជនពិការ ស្រ្តីមេម៉ាយ និងក្មេងកំព្រាជាច្រើន ដូច្នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ក៏ដូចជាក្រសួងពាក់ព័ន្ធ បានសម្រេចដាក់ឲ្យអនុវត្តន៍ការររឹតបន្តឹងច្បាប់ស្ដីពីចរាចរណ៍ផ្លូវគោក នេះ ដើម្បីការពារអាយុជីវិតប្រជាពលរដ្ឋទូទៅ ពីឃាតករលាក់មុខ គឺគ្រោះថ្នាក់ចរាចរណ៍នេះតែប៉ុណ្ណោះ។
អត្ថបទ និង រូបថត ៖ សេង ផល្លី និងខេង ឧត្តម
