ចាប់ពីថ្ងៃទី០១ ដល់ ម៉ោង១២:០០រសៀល ថ្ងៃទី០២ ខែឧសភា ឆ្នាំ២០២០នេះ កម្លាំងសមត្ថកិច្ចចរាចរណ៍ផ្លូវគោក ខេត្តសៀមរាប បានធ្វើការផាកពិន័យ បទល្មើសចរាចរណ៍ផ្លូវគោកនៅទូទាំងខេត្ត សរុបចំនួន ២៥២ករណី ក្នុងនោះករណីមិនពាក់មួកសុវត្តិភាព មានរហូតទៅដល់១៥២ករណី នេះបើតាមរបាយការណ៍របស់ស្នងការដ្ឋាននគរបាលខេត្តសៀមរាប។
តាមរបាយការណ៍ដដែល ក្នុងចំណោមការផាកពិន័យ សរុប ២៥២ករណី ភាគច្រើនគឺជាម៉ូតូ ដែលមានរហូតដល់ ២៣៩ករណី រីឯរថយន្តធុនស្រាល និងធ្ងន់ មានត្រឹមតែ ១៣ករណីប៉ុណ្ណោះ។
គួររំលឹកថា ក្នុងកិច្ចប្រជុំ ផ្សព្វផ្សាយផែនការ ការអនុវត្តរឹតបណ្តឹងច្បាប់ចរាចរណ៍ផ្លូវគោក ជូនដល់លោក លោកស្រី ស្នងការរង នាយការិយាល័យ និងអធិការក្រុង-ស្រុកទាំង១២ កាលពីចុងខែមេសា ឆ្នាំ២០២០នេះ លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានណែនាំដល់កងកម្លាំងទាំងអស់ ៖
១. ត្រូវមានសីលធម៌ គុណធម៌ អាកប្បកិរិយាល្អ និងប្រើប្រាស់សម្តីឲ្យបានសមរម្យ ក្នុងពេលចុះអនុវត្តន៍ច្បាប់។
២. ត្រូវស្លៀកពាក់ឯកសណ្ឋានឲ្យបានត្រឹមត្រូវ ដូចជាអាវពន្លឺ ពាក់ភ្លើងបំភ្លឺនៅលើស្មា និងពិល ជាដើម។
៣. ត្រូវពាក់ម៉ាស ស្រោមដៃ និងលាងដៃជាប្រចាំ។
និងទី៤. មិនត្រូវធ្វើការផាកពិន័យលើសការកំណត់។
ព័ត៌មានជាតិ ថ្មីៗ
លោកស្នងការនគរបាលខេត្ត បញ្ជាក់ថា ការអនុវត្តរឹតបន្តឹងច្បាប់ចរាចរណ៍នេះ គឺដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋ កាត់បន្ថយការស្លាប់ របួស ពិការ ជាដើម។ ជាពិសេស ការអនុវត្តច្បាប់ផាកពិន័យនេះ ត្រូវអនុវត្តន៍ឲ្យបានស្មើភាពគ្នា ទាំងប្រជាពលរដ្ឋសាមញ្ញ មន្ត្រីរាជការ អ្នកក្រ ឬអ្នកមានក៏ដោយ៕
អត្ថបទ និង រូបថត ៖ សេង ផល្លី និងខេង ឧត្តម
