នៅថ្ងៃទី០១ ខែឧសភា ឆ្នាំ២០២០នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឱ្យទីភ្នាក់ងារសារព័ត៌មានកម្ពុជាដឹងថា ស្ថានភាពមេរោគកូវីដ-១៩ នៅប្រទេសកម្ពុជា កំពុងស្ថិតក្នុងដំណាក់កាល នៃភ្លើងសញ្ញាពណ៌លឿង ឬប្រុងប្រយ័ត្ននៅឡើយទេ។
លោកជំទាវ បានគូសបញ្ជាក់ក្នុងន័យប្រៀបធៀបថា៖ “ចរាចរណ៍មេរោគកូវីដ-១៩ នៅមិនទាន់មានភ្លើងស្តុបពណ៌ក្រហមនៅឡើយទេ។ ប៉ុន្តែកម្ពុជានៅក្នុងពេលនេះ គឺស្ថិតនៅស្ថានភាពភ្លើងស្តុបពណ៌លឿងនៅឡើយ ដូច្នេះប្រសិនបើមិនគោរពភ្លើងស្តុបពណ៌លឿងនេះទេ ហើយនៅតែសម្រុកបើកទៅមុខទៀតនោះ លោកអ្នកអាចមានគ្រោះថ្នាក់ទៅបុកប៉ះនឹងមេរោគកូវីដ-១៩ មិនខាន ហើយធ្វើឱ្យលោកអ្នកមានគ្រោះថ្នាក់សុខភាពដោយសារមេរោគកូវីដ-១៩ភ្លាម។
លោកជំទាវ អំពាវនាវដល់ ប្រជាពលរដ្ឋទាំងអស់ សូមបន្តចូលរួមគោរពបទបញ្ជា និងការណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជារបស់យើង និងការណែនាំនានារបស់ក្រសួងសុខាភិបាល ដើម្បីចៀសផុតពីការវាយលុកនៃរលកទី២ នៃការចម្លងមេរោគកូវីដ-១៩ នៅកម្ពុជាឱ្យបានគ្រប់ៗគ្នា។”
គួររម្លឹកផងដែរថា ក្រសួងសុខាភិបាល បានប្រកាសនាព្រឹកថ្ងៃទី០១ ខែឧសភា នេះថា ពុំមានការរកឃើញករណីឆ្លងមេរោគកូវីដ១៩ ចំនួន១៩ថ្ងៃជាប់ៗគ្នាមកហើយ ខណៈករណីកំពុងព្យាបាលនៅសល់តែ០៣នាក់ប៉ុណ្ណោះ ប៉ុន្តែការប្រុងប្រយ័ត្នគឺនៅតែជាកាតព្វកិច្ចរបស់ប្រជាពលរដ្ឋគ្រប់រូប ដែលត្រូវតែអនុវត្តជាប់ជានិច្ច។
អត្ថបទ និង រូបថត ៖ ទីភ្នាក់ងារសារព័ត៌មានកម្ពុជា
