នៅដើមឆ្នាំ២០២០នេះ ប្រជាពលរដ្ឋកម្ពុជាទូទាំងប្រទេស មានការភ័យខ្លាច ដោយសារមេរោគកូវីដ១៩ ប៉ុន្តែគ្រោះថ្នាក់ចរាចរណ៍ ក៏ជាឃាតករលាក់មុខដ៏កាចសាហាវនៅតាមដងផ្លូវ ដែលបានសម្លាប់អ្នកធ្វើដំណើរជិត២ពាន់នាក់ កាលពីឆ្នាំ២០១៩។
នៅថ្ងៃទី១ ខែឧសភា ឆ្នាំ២០២០នេះ សមត្ថកិច្ចចរាចរណ៍ផ្លូវគោកខេត្តសៀមរាប ក៏ដូចជាសមត្ថកិច្ចចរាចរណ៍នៅទូទាំងប្រទេស បានចាប់ផ្ដើមអនុវត្តន៍វិធានការរឹតបន្តឹងច្បាប់ស្ដីពីចរាចរណ៍ផ្លូវគោក ពិសេសពាក់ព័ន្ធនឹងការអនុវត្តអនុក្រឹត្យថ្មី ស្ដីពីការផាកពិន័យចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក។
តាមការឲ្យដឹងពី លោកឧត្តមសេនីយ៍ត្រី តេង ច័ន្ទណាត ស្នងការរងនៃស្នងការដ្ឋាននគរបាលខេត្តសៀមរាប ទទួលបន្ទុកចរាចរណ៍ផ្លូវគោក នៅថ្ងៃចាប់ផ្ដើម នៃការអនុវត្តការរឹតបន្តឹងច្បាប់ចរាចរណ៍ផ្លូវគោកនេះ ខេត្តសៀមរាប បានរៀបចំគោលដៅត្រួតពិនិត្យចំនួន១៥ទីតាំង។
ព័ត៌មានជាតិ ថ្មីៗ
លោកស្នងការរង កត់សម្គាល់ថា ប្រជាពលរដ្ឋក្នុងខេត្តភាគច្រើន បានពាក់មួកសុវត្តិភាពប្រហែល៩០ភាគរយ។ ប៉ុន្តែការពាក់មួយសុវត្ថិភាពតែមួយមុខ នៅមិនទាន់គ្រប់គ្រាន់នៅឡើយទេ។
គួរបញ្ជាក់ថា យោងតាមសេចក្ដីសម្រេច របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានកំណត់យកឆ្នាំ២០២០នេះ ជាឆ្នាំបង្កើនការរឹតបន្តឹងការអនុវត្តច្បាប់ចរាចរណ៍ផ្លូវគោក ជាងបណ្ដាឆ្នាំណាៗទាំងអស់ ដែលវិធានការនេះមិនមែនជាការដាក់បន្ទុកលើប្រជាពលរដ្ឋ នៅក្នុងស្ថានភាពលំបាកនៃជំងឺកូវីដ១៩នោះទេ ប៉ុន្តែគឺដើម្បី សុវត្ថិភាព សណ្ដាប់ធ្នាប់សាធារណៈ និងអាយុជីវិតប្រជាពលរដ្ឋធ្វើដំណើរនៅលើដងផ្លូវ ។
អត្ថបទ និង រូបថត ៖ សេង ផល្លី និង ដារ៉ា
