មន្ទីរបរិស្ថានខេត្តសៀមរាប ទទួលម៉ូតូចំនួន ៦គ្រឿង របស់គម្រោង និរន្តរភាពតំបន់ទេសភាព និងទេសចរណ៍ធម្មជាតិកម្ពុជា
សៀមរាប៖ នៅព្រឹកថ្ងៃទី០៧ ខែឧសភា ឆ្នាំ២០២០នេះ ក្រសួងបរិស្ថានបានប្រគល់ម៉ូតូចំនួន ៦គ្រឿង ក្រោមក្របខណ្ឌ គម្រោង និរន្តរភាពតំបន់ទេសភាព និងទេសចរណ៍ធម្មជាតិកម្ពុជា ជូនដល់មន្ទីរបរិស្ថានខេត្តសៀមរាប ក្រោមអធិបតីភាព ឯកឧត្តម សៅ សុភាព រដ្ឋលេខាធិការក្រសួងបរិស្ថាន ឯកឧត្តម ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាននៃក្រសួងបរិស្ថាន និងលោក ង៉ាន់ ភិរុណ អភិបាលរងខេត្ត តំណាង ឯកឧត្តម ទៀ សីហា អភិបាលខេត្តសៀមរាប រួមនិងមន្ត្រីពាក់ព័ន្ធជាច្រើនរូប។
ព័ត៌មានជាតិ ថ្មីៗ
ឯកឧត្តមរដ្ឋលេខាធិការ បញ្ជាក់ថា គម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» មានគោលដៅធ្វើឱ្យប្រសើរឡើង នូវការគ្រប់គ្រងតំបន់ការពារធម្មជាតិ លើកកម្ពស់ទេសចរណ៍ធម្មជាតិ ដែលអនុវត្តរយៈពេល៦ឆ្នាំ ចាប់ផ្ដើមពី២០២០ ដល់ ២០២៥ នៅក្នុងខេត្តគោលដៅចំនួន៧ រួមមាន ខេត្តសៀមរាប កំពង់ស្ពឺ កោះកុង កំពង់ឆ្នាំង ពោធិ៍សាត់ បាត់ដំបង និងកំពង់ធំ។
ក្នុងនោះដែរ តំបន់ការពារធម្មជាតិគោលដៅរបស់គម្រោងនេះ រួមមាន ដែនជម្រកសត្វព្រៃភ្នំឱរ៉ាល់ ឧទ្យានជាតិជួរភ្នំក្រវាញកណ្តាល ឧទ្យានជាតិជួរភ្នំក្រវាញខាងត្បួង ដែនជម្រកសត្វព្រៃតាតៃ ដែនជម្រកសត្វព្រៃសំកុស របៀងអភិរក្សជីវៈចម្រុះជួរភ្នំក្រវាញ តំបន់ប្រើប្រាស់ច្រើនយ៉ាងបឹងទន្លេសាប និងតំបន់ការពារធម្មជាតិនៅក្បែរមួយចំនួនទៀត ដើម្បីធ្វើឱ្យប្រសើរនូវការគ្រប់គ្រងតំបន់ការពារធម្មជាតិ លើកកម្ពស់ទេសចរណ៍ធម្មជាតិ និងបង្កើនសង្វាក់តម្លៃអនុផលព្រៃឈើ នៅតំបន់ទេសភាពជួរភ្នំក្រវាញ និងបឹងទន្លេសាបផងដែរ។
ឯកឧត្តម លើកឡើងថា ដោយសារខេត្តសៀមរាប មានសក្តានុពលធនធានធម្មជាតិដ៏សម្បូរបែប ដូច្នេះមន្រ្តីជំនាញ និងអាជ្ញាធរមូលដ្ឋាន ចាំបាច់ត្រូវរួមសហការគ្នា ក្នុងការជំរុញឱ្យមាននិរន្តរភាពបរិស្ថានបានល្អប្រសើរ ដើម្បីទាក់ទាញភ្ញៀវទេសចរណ៍ជាតិ-អន្តរជាតិ ។
ឯកឧត្តម សៅ សុភាព ក៏បានជំរុញដល់មន្រ្តីបរិស្ថានទាំងអស់ ត្រូវពង្រឹងសមត្ថភាពទៅលើការរៀបចំផែនការ និងការគ្រប់គ្រងតំបន់ទេសភាពក្នុងតំបន់ការពារធម្មជាតិ ជាពិសេសមន្ត្រីបរិស្ថានត្រូវជួយផ្សព្វផ្សាយ និងណែនាំដល់ប្រជាពលរដ្ឋ ដែលបាននិងកំពុងរស់នៅក្នុងតំបន់ការពារធម្មជាតិ ឲ្យបានយល់ថា កន្លែងដែលពួកគាត់រស់នៅនោះ សុទ្ធសឹងជាតំបន់ ដែលអាចឲ្យពួកគាត់អាស្រ័យផលបានយូរអង្វែង ដូចជាវិស័យទេសចរណ៍ អនុផលព្រៃឈើ រហូតដល់កូនចៅជំនាន់ក្រោយ ជាជាងការកាប់បំផ្លាញ ដែលបង្កជាអំពើខុសច្បាប់។
អត្ធបទ និង រូបភាព៖ អ៊ុន ណារាជ្យ
កែសម្រួលអត្ថបទ ៖ សេង ផល្លី
