អភិបាលខេត្តសៀមរាប ចុះពិនិត្យការរុះរើរបង និងបើកផ្លូវដោយស្ម័គ្រចិត្ត របស់ប្រជាពលរដ្ឋគម្រូ ក្នុងសង្កាត់ស្វាយដង្គុំ
នៅរសៀលថ្ងៃទី០៧ ខែឧសភា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប អមដំណើរដោយលោក ពិន ប្រាកដ អភិបាលរងខេត្ត លោក នួន ពុទ្ធារ៉ា អភិបាលក្រុង មន្ត្រីជាន់ខ្ពស់សាលា ព្រមទាំងមន្ត្រីជំនាញ បានចុះពិនិត្យ ការស្ម័គ្រចិត្តរុះរើរបង និងបើកផ្លូវ តាមការជូនដំណឹងរបស់អាជ្ញាធរក្រុង។
តាមរយៈការជូនដំណឹងរបស់អាជ្ញាធរក្រុង អំពីគម្រោងសាងសង់ផ្លូវតភ្ជាប់ពីភូមិកន្ត្រក មកភូមិគោកក្រសាំង និងភូមិភ្ញាជ័យ ស្ថិតក្នុងសង្កាត់ស្វាយដង្គុំ ក្រុងសៀមរាប របស់រដ្ឋបាលខេត្តសៀមរាប សប្បុរសជននៅក្នុងមូលដ្ឋាននេះ បានស្ម័គ្រចិត្តផ្ដល់ដី និងស្ថាបនាផ្លូវមានប្រវែង ១,៣៧០ម៉ែត្រ និងទទឹង ៧ម៉ែត្រ ក្នុងនោះចាក់កៅស៊ូ DBST ប្រវែង ៨៣០ម៉ែត្រ ទទឹង ៧ម៉ែត្រ និងក្រាលគ្រួសក្រហមប្រវែង ៥៤០ម៉ែត្រ និងទទឹង ១០ម៉ែត្រ។
រដ្ឋបាលខេត្តសៀមរាប បានសម្ដែងនូវការកោតសរសើរ និងថ្លែងអំណរគុណចំពោះ សប្បុរសជនក្នុងមូលដ្ឋាននេះ ក៏ដូចជានៅទូទាំងខេត្តសៀមរាប នាពេលកន្លងមក ដែលបានចូលរួមសហការជាមួយរដ្ឋបាលខេត្ត ក៏ដូចជាអាជ្ញាធរមូលដ្ឋាន ក្នុងសកម្មភាពអភិវឌ្ឍនានា ដើម្បីធ្វើឲ្យខេត្តទេសចរណ៍ ធម្មជាតិ ប្រវត្តិសាស្ត្រមួយនេះ កាន់តែមានភាពរីកចម្រើនបន្ថែមទៀត។
គួរបញ្ជាក់ថា គម្រោងសាងសង់ផ្លូវតភ្ជាប់ពីភូមិកន្ត្រក មកភូមិគោកក្រសាំង និងភូមិភ្ញាជ័យ ក៏នឹងធ្វើការតភ្ជាប់រហូតដល់ផ្លូវក្រវ៉ាត់ក្រុង ដែលមានប្រវែងសរុប ២,៣៤៥ ម៉ែត្រ។
អត្ធបទ និង រូបភាព៖ សេង ផល្លី
