នៅម៉ោងប្រមាណ៤រសៀល ថ្ងៃទី០៧ ខែឧសភា ឆ្នាំ២០២០ មានគ្រោះថ្នាក់ចរាចរណ៍មួយកើតឡើង ស្ថិតនៅភូមិដំបូកខ្ពស់ ឃុំតាសៀម ស្រុកស្វាយលើ ខេត្តសៀមរាប រវាងរថយន្ត Toyota Camry សេរីឆ្នាំ 2002 ឬហៅថា រថយន្តបាឡែន បុកជាមួយនឹងគោយន្តកន្ត្រៃ បណ្ដាលឲ្យស្លាប់អ្នកបើកបររថយន្តToyotaម្នាក់។
តាមការបញ្ជាក់របស់លោកវរៈសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងថា អ្នកបើកបររថយន្ត Toyota ភេទប្រុស អាយុ៥២ ឆ្នាំរស់នៅភូមិដំបូកខ្ពស់ ឃុំតាសៀម ស្រុកស្វាយលើ ខេត្តសៀមរាប បានបើកបរក្នុងល្បឿនលឿន មិនបានប្រុងប្រយ័ត្នដល់ផ្លូវបត់កែង បានទៅបុកជាមួយគោយន្តកន្ត្រៃ ដែលកំពុងបើកច្រាសទិសគ្នា ក្នុងលើផ្លូវគ្រួសដីក្រហម បណ្តាលឲ្យអ្នកបើកបររថយន្ត Toyota ស្លាប់នៅនឹងកន្លែងកើតហេតុ រីឯអ្នកបើកបរគោយន្តកន្ត្រៃ (មិនស្គាល់អត្តសញ្ញាណ) បានបើកគោយន្តរត់គេចខ្លួនបាត់។
បច្ចុប្បន្ន Toyota Camry សេរីឆ្នាំ 2002 ត្រូវបានកម្លាំងជំនាញ យកវត្ថុតាងទៅរក្សាទុកនៅអធិការដ្ឋាននគរបាលស្រុក និងកំពុងស្រាវជ្រាវរក ម្ចាស់គោយន្តកន្ត្រៃ រីឯសាកសព ក្រុមគ្រួសារបានយកទៅធ្វើបុណ្យតាមប្រពៃណី៕
ព័ត៌មានជាតិ ថ្មីៗ
អត្ធបទ និង រូបភាព៖ ម៉ី សុខារិទ្ធ
កែសម្រួលអត្ថបទ ៖ សេង ផល្លី
