ក្រុមកសិករ ក្នុងស្រុកគោលដៅចំនួន៦ របស់ខេត្តសៀមរាប បាននិងកំពុងមានជីវភាពល្អប្រសើរ ខណៈទីផ្សារ បន្លែសុវត្ថិភាពធម្មជាតិ និងមាន់ស្រែ មានការកើនឡើង ក្រោមការជួយជ្រោមជ្រែងពី គម្រោងជំរុញទីផ្សារសម្រាប់កសិកម្មខ្នាតតូច ឬហៅកាត់ថា អាមស៏( AIMS) បើតាមការលើកឡើងរបស់ លោក ភឿន គីមលី ប្រធានមន្ទីរពាណិជ្ជកម្ម និងជាប្រធានដឹកនាំការអនុវត្តគម្រោងក្នុងខេត្តសៀមរាប នៅថ្ងៃទី១១ ខែឧសភាឆ្នាំ២០២០។
លោកប្រធានមន្ទីរពាណិជ្ជកម្មខេត្ត បន្ថែមថា គម្រោងជំរុញទីផ្សារសម្រាប់កសិកម្មខ្នាតតូច ទទួលបានឥណទានពីមូលនិធិអន្តរជាតិសម្រាប់ការអភិវឌ្ឍន៍កសិកម្ម( IFAD ) និងរាជរដ្ឋាភិបាលកម្ពុជា និងអនុវត្តន៍ដោយក្រសួងពាណិជ្ជកម្ម។
ចំពោះផលិតផលដែលសំខាន់ និងជាយុទ្ធសាស្រ្ត របស់គម្រោងនេះ មានចំនួន៥ប្រភេទគឺ មាន់ស្រែ បន្លែសុវត្ថិភាព ដំឡូងមី ស្រូវក្រអូប និងសសៃសូត្រ។ ដោយឡែក គិតត្រឹមឆ្នាំ២០១៩ ក្នុងខេត្តសៀមរាប មានសក្ដានុពល លើផលិតផល២ប្រភេទ គឺបន្លែសុវត្ថិភាព និងមាន់ស្រែ។
ដើម្បីធានា ដល់ការបែងចែកចំណូលដល់កសិករ និងធានាការផ្គត់ផ្គង់ដល់ទីផ្សារ គម្រោងនេះបានរៀបចំកសិករ ជាក្រុម ឬសហគមន៍ ដែលមកដល់បច្ចុប្បន្ន សម្រាប់ស្រុកគោលដៅទាំង ៦ នេះ មានក្រុមផលិតចំនួន៣១ ស្មើនឹង ១,៣៨២គ្រួសារ ក្នុងនោះ ក្រុមផលិតមាន់ស្រែចំនួន១៤ និងក្រុមផលិតបន្លែសុវត្ថិភាព ចំនួន១៧។
លោកប្រធានមន្ទីរ បញ្ជាក់ថា ក្រៅពី រក្សាតម្លៃ និងបរិមាណផ្គត់ផ្គង់លើទីផ្សារ គម្រោងនេះ ក៏គាំទ្រដល់ ការវិនិយោគ បង្កើនសេវាអភិវឌ្ឍន៍អាជីវកម្ម និងធាតុចូលទីផ្សារផងដែរ។
គួរជម្រាបដែរថា គម្រោងនេះ មានរយៈពេល៥ឆ្នាំ ដោយចាប់ផ្តើមពីចុងខែកុម្ភៈឆ្នាំ២០១៧ អនុវត្តមានពេញលេញនៅក្នុងឆ្នាំ២០១៨ នឹងត្រូវបញ្ចប់នៅចុងខែមិនាឆ្នាំ២០២៣ ក្នុងគោលដៅលើកកម្ពស់ជីវភាពកសិករខ្នាតតូចនៅកម្ពុជា តាមរយៈនៃការបង្កើនប្រាក់ចំណូលផ្សារភ្ជាប់ទៅនឹង កសិ-អាជីវកម្ម និងទីផ្សារ ឬក៏អាចនិយាយបានថា ការអនុវត្តគម្រោងនេះវាស្ថិតក្នុងគោលបំណង នៃការធ្វើឲ្យមានការកើនឡើង នូវប្រាក់ចំណូលរបស់កសិករខ្នាតតូច រួមទាំងកសិករក្រីក្រតាមរយៈប្រសិទ្ធភាព នៃការវិនិយោគសាធារណៈ។
អត្ថបទ និង រូបភាព៖ ងិន គឹមឡេង
កែសម្រួលអត្ថបទ ៖ សេង ផល្លី
