លោកអនុសេនីយ៍ទោ សុខ សុខុន មេប៉ស្តិ៍នគរបាលរដ្ឋបាលឃុំស្រែណូយ បានឲ្យដឹងថា នៅវេលាម៉ោង ០៨:១២នាទីព្រឹក ថ្ងៃទី១២ ខែឧសភា ឆ្នាំ២០២០នេះ មានអគ្គិភ័យមួយបានកើតឡើងស្ថិតនៅភូមិវត្ត ឃុំស្រែណូយ ស្រុកវ៉ារិន បណ្ដាលឲ្យឆេះផ្ទះលក់គ្រឿងសំណង់មួយខ្នងស្ទើរគ្មានសល់ ទំហំប្រវែង៨ម៉ែត្រគុណនឹង១២ម៉ែត្រ ដំបូលប្រក់ស័ង្កសី និង ខូចខាតទ្រព្យសម្បត្តិទាំងស្រុក ដែលជារបស់ឈ្មោះ សូ សារិន ភេទប្រុស អាយុ៤០ឆ្នាំ និង ប្រពន្ធឈ្មោះ ភឿង សុភាន់ អាយុ៣៧ឆ្នាំ ។
លោកអនុសេនីយ៍ទោ សុខ សុខុន បានឲ្យដឹងថា មូលហេតុនេះ បណ្តាលមកពីទុស្សេខ្សែភ្លើង តែមិនបណ្តាលឲ្យរងគ្រោះថ្នាក់ដល់មនុស្សឡើយ ហើយករណីអគ្គិភ័យនេះ កម្លាំងបានចេញជួយអន្តរាគមន៍ពន្លត់ ប្រើប្រាស់រថយន្តពន្លត់អគ្គិភ័យជារថយន្តធំចំនួន១គ្រឿង ប្រើប្រាស់ទឹកអស់២គ្រឿង និង រថយន្តតូចចំនួន ១០គ្រឿង ដែលមានកម្លាំងនគរបាលប៉ុស្តិ៍ និង អធិការដ្ឋាននគរបាលស្រុក សាហការជាកម្លាំងកងរាជអាវុធហត្ថ ហើយបានពន្លត់ឲ្យរលត់ទៅវិញទាំងស្រុងនៅវេលាម៉ោង០៩ព្រឹក ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
