នៅសាលាខេត្តសៀមរាប រសៀលថ្ងៃទី១១ ខែឧសភា ឆ្នាំ២០២០នេះ មានរៀបចំកិច្ចប្រជុំ ត្រៀមសម្រាប់ការចូលរួមសន្និសីទសារព័ត៌មាន ស្ដីពី “វឌ្ឍនភាព និងទិសដៅការងារបន្តរបស់រដ្ឋបាលខេត្តសៀមរាប ” នៅទីស្ដីការគណៈរដ្ឋមន្ត្រី ដែលនឹងធ្វើឡើងនៅខែឧសភា ឆ្នាំ២០២០ខាងមុខនេះ។
មានវត្តមានដឹកនាំ ក្នុងកិច្ចប្រជុំនេះ លោក សុខ ថុល នាយករដ្ឋបាលសាលាខេត្តសៀមរាប បង្ហាញជូនដល់ មន្ទីរ អង្គភាព ពាក់ព័ន្ធជុំវិញខេត្តថា អនុវត្តន៍ស្របតាមកម្មវិធីនយោបាយ របស់រាជរដ្ឋាភិបាលកម្ពុជានីតិកាលទី៦ នាពេលកន្លងមក រដ្ឋបាលខេត្តសៀមរាប បានសម្រេចនូវសមិទ្ធផលធំៗជាច្រើន ដូចជា ការរៀបចំព្រឹត្តិការណ៍ធំៗ កិច្ចប្រជុំថ្នាក់ជាតិ អន្តរជាតិនានា ក្នុងនោះការអភិវឌ្ឍ និងរក្សាស្ថិរភាព សន្តិសុខ សណ្តាប់ធ្នាប់ជូនប្រជាពលរដ្ឋនៅទូទាំងខេត្ត ក៏មានភាពល្អប្រសើរ គួរឲ្យកត់សម្គាល់ផងដែរ។ ក្នុងនោះ ក្រោមការឧបត្ថម្ភគាំទ្រពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្តម លោកជំទាវ សមាជិក សមាជិកាក្រុមការងារាជរដ្ឋាភិបាល ក្រុមការងារខេត្ត ក្រុង-ស្រុក ចុះមូលដ្ឋាន ក្នុងខេត្តសៀមរាប ព្រមទាំងអាជ្ញាធរមូលដ្ឋាន បានធ្វើឲ្យប្រជាពលរដ្ឋបានយល់ដឹង ពីការខិតខំប្រឹងប្រែងរបស់រាជរដ្ឋាភិបាល និងមានភាពកក់ក្ដៅ ក្នុងការចូលរួមសហការជាមួយអាជ្ញាធរលើសកម្មភាពអភិវឌ្ឍនៅតាមមូលដ្ឋាន។
ដើម្បីបង្ហាញជូនដល់សាធារណជនជាតិ និងអន្តរជាតិ បានដឹងពីការងារ សមិទ្ធផល រួមនិងគោលនយោបាយរបស់រាជរដ្ឋាភិបាល នៅថ្នាក់រាជធានី-ខេត្តទាំង២៥ អង្គភាពអ្នកនាំពាក្យរាជរដ្ឋាភិបាល បាននិងកំពុងរៀបចំ សន្និសីទសារព័ត៌មាន ស្ដីពី វឌ្ឍនភាព និងទិសដៅការងារបន្តរបស់រដ្ឋបាល រាជធានី-ខេត្ត ដែលនឹងមានសមាសភាព ថ្នាក់ដឹកនាំរាជធានីខេត្ត ព្រមជាមួយថ្នាក់ដឹកនាំមន្ទីរអង្គភាពផងដែរ។
ព័ត៌មានជាតិ ថ្មីៗ
ក្នុងកិច្ចប្រជុំនេះដែរ លោក នាយករដ្ឋបាលសាលាខេត្ត គ្រោងនឹងលើកយកនូវចំណុចសំខាន់ៗមួយចំនួន ដែលខេត្តសៀមរាបសម្រេចបាន ដើម្បីបង្ហាញនៅក្នុងសន្និសីទសារព័ត៌មាននោះ រួមមាន៖
ទី០១ – ការងារសន្តិសុខ សណ្តាប់ធ្នាប់សាធារណៈ ក្រោមការដឹកនាំរបស់គណៈបញ្ជាការឯកភាពរដ្ឋបាលខេត្ត
ទី០២ – ការងាររដ្ឋបាលទូទៅ ក្នុងការលើកកម្ពស់អភិបាលកិច្ចល្អ ការរៀបចំវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋាន និង ដំណោះស្រាយជូនប្រជាពលរដ្ឋ បន្ទាប់ពីកិច្ចប្រជុំគណៈកម្មាធិការសម្របសម្រួលបច្ចេកទេស ខេត្ត។
ទី០៣ – ការងារសេដ្ឋកិច្ច របស់ខេត្តសៀមរាប លើវិស័យចម្បងពីរ គឺកសិកម្ម និងទេសចរណ៍ រួមជាមួយការស្តារ និងអភិវឌ្ឍប្រព័ន្ធហេដ្ឋារចនាសម្ព័ន្ធ រូបវ័ន្តសំខាន់ៗ ដែលបានធ្វើឲ្យវិស័យទាំងពីរនេះ មានការរីកចម្រើនយ៉ាងឆាប់រហ័ស នឹងបានជួយលើកកម្ពស់ជីវភាពប្រជាពលរដ្ឋក្នុងខេត្តមានជីវភាពកាន់តែល្អប្រសើរ។
ទី០៤-ការងារសង្គមកិច្ច រដ្ឋបាលខេត្ត បានបង្កើតគណៈកម្មាធិការគ្រប់គ្រងគ្រោះមហន្តរាយថ្នាក់ខេត្ត ក្រុង-ស្រុក ឃុំ-សង្កាត់ ជាមួយនិងការចូលរួមពីសាខាកាកបាទក្រហមកម្ពុជាខេត្តសៀមរាប អង្គការដៃគូ ក្នុងខេត្ត និង សមត្ថកិច្ចពាក់ព័ន្ធ ដើម្បីជួយសង្គ្រោះប្រជាពលរដ្ឋនៅតាមមូលដ្ឋាន រងគ្រោះដោយសារគ្រោះធម្មជាតិ ជនពិការ ស្ត្រី កុមារ និងងាយរងគ្រោះជាដើម។
ទី០៥- វិបត្តិជំងឺកូវីដ១៩ រដ្ឋបាលខេត្ត បានណែនាំដល់អាជ្ញាធរមូលដ្ឋាននីមួយៗ ត្រូវផ្សព្វផ្សាយ អប់រំដល់ប្រជាពលរដ្ឋនៅទូទាំងខេត្ត ដើម្បីបង្ការ ទប់ស្កាត់ការរីករាលដាលនៃជំងឺកូវីដ១៩ តាមបទបញ្ជារបស់រាជរដ្ឋាភិបាលកម្ពុជា ក្រសួងមហាផ្ទៃ ក្រសួងសុខាភិបាល និង ក្រសួងស្ថាប័នជំនាញពាក់ព័ន្ធ រហូតទទួលបានលទ្ធផលល្អ ដោយពុំមានករណីឆ្លងបន្ថែមទៀតឡើយ។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
