បើតាមសេចក្ដីជូនដំណឹងរបស់ ក្រសួងធនធានទឹក និងឧតុនិយម នៅថ្ងៃទី១៣ ខែឧសភា ឆ្នាំ២០២០នេះ បានឲ្យដឹងថា រដូវវស្សានៅក្នុងប្រទេសកម្ពុជានឹងចាប់ផ្តើមនៅថ្ងៃទី១៥ ខែឧសភាខាងមុខ ដោយក្នុងនោះ នឹងមានរបបខ្យល់មូសុងនិរតីបក់មកលើកម្ពុជាដែរ។ ទន្ទឹមនឹងនេះ ក៏មានជ្រលងសម្ពាធទាបបង្កើនឥទ្ធិពលមកលើភាគពាយ័ព្យ និងខាងជើងកម្ពុជាផងដែរ។
បើតាមខ្លឹមសារនៅក្នុងសេចក្ដីជូនដំណឹងបានឲ្យដឹងទៀតថា ឥទ្ធិពលនេះ នឹងធ្វើឲ្យស្ថានភាពអាកាសធាតុ ចាប់ពីថ្ងៃទី១៣ ដល់ថ្ងៃទី១៥ ខែឧសភា នៅបណ្តាខេត្តនៅតំបន់វាលទំនាបកណ្តាល មានសីតុណ្ហភាពអប្បបរមា ពី២៥-២៨អង្សា និងសីតុណ្ហភាពអតិបរមា ពី៣៦-៣៩អង្សា ។ ចំណែកបណ្ដាខេត្តនៅផ្នែកពាយព្យ អាចភ្លៀងពីខ្សោយទៅបង្គួរ ហើយផ្នែកផ្សេងទៀត អាចមានភ្លៀងពីខ្សោយទៅមធ្យម។ ដោយឡែកចាប់ពីពីថ្ងៃទី ១៥-១៩ ភ្លៀងនឹងបន្តធ្លាក់រាយប៉ាយក្នុងកម្រិតតិចទៅបង្គួរ។ រីឯបណ្ដាខេត្តនៅតំបន់ជួរភ្នំដងរែក និងខ្ពង់រាបឦសាន នឹងសីតុណ្ហភាពអប្បបរមា ពី ២៥-២៧អង្សា និងសីតុណ្ហភាពមានពី ៣៤-៣៨អង្សា ចាប់ពីថ្អៃទី១៣-១៥ ឧសភា។ ក្នុងនោះដែរនៅតាមបណ្ដាខេត្តនៅជាប់ជួរភ្នំដងរែកអាចមានភ្លៀងធ្លាក់ពីខ្សោយទៅបង្គួរ។ ចាប់ពីថ្ងៃទី១៥ -១៩ ឧសភា ភ្លៀងនឹងបន្តធ្លាក់រាយប៉ាយ ពីតិចទៅបង្កួរ។
ដោយឡែកខេត្តជាប់សមុទ្រវិញ គឺមានសីតុណ្ហភាពអប្បបរមាពី ២៥-២៨អង្សា និងសីតុណ្ហភាពអតិបរមាពី ៣៣-៣៦អង្សា ហើយនឹងមានភ្លៀងពីតិច ទៅបង្គួរ ។
នៅក្នុងនោះដែរ ក្រសួងក៏អំពាវនាវឲ្យប្រជាពលរដ្ឋបង្កើនការប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ផងដែរ ក៏ដូចជាការកើនឡើងសីតុណ្ហភាព ដែលអាចនឹងកើតមានឡើងពិសេសបណ្ដាខេត្តនៅតំបន់វាលទំនាប ដូចជាខេត្តបន្ទាយមានជ័យ ប៉ៃលិន ពោធិ៍សាត់ បាត់ដំបង សៀមរាប ឧត្តរមានជ័យ និងព្រះវិហារ ៕
ព័ត៌មានជាតិ ថ្មីៗ
អត្ថបទ៖ អ៊ុន ណារាជ្យ
ប្រភព៖ក្រសួងធនធានទឹក និងឧតុនិយម
