កាលពីរសៀលថ្ងៃទី១២ ខែឧសភា ឆ្នាំ២០២០ នគរបាលខេត្តសៀមរាប បានចុះបង្ក្រាបករណីបម្រើសេវាផ្លូវភេទ ជ្រកក្រោមស្លាកម៉ាស្សាមួយកន្លែង ស្ថិតនៅភូមិវត្តបូព៌ សង្កាត់ សាលាកំរើក ក្រុងសៀមរាប ដោយឃាត់ខ្លួនបានម្ចាស់ហាងម្នាក់ និងរំដោះនារីបម្រើសេវាផ្លូវភេទ៤នាក់ ក្នុងនោះមាននារីអាយុ១៧ឆ្នាំម្នាក់។
តាមការបញ្ជាក់ពីលោកវរសនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប ហាងម៉ាស្សានេះមានយីហោ រស្មីរ័ត្ន១៦៨ និងម្ចាស់ហាង មានឈ្មោះ ទន់ សារ័ត្ន ភេទស្រី អាយុ ៣២ ឆ្នាំ។ តាមរយៈការចុះបង្ក្រាបនេះ កម្លាំងនគរបាល បានឆែកឆេររកឃើញវត្ថុតាង រួមមានស្រោមអនាម័យប្រើរួច និងមិនទាន់ប្រើមួយចំនួន។
លោកនាយការិយាល័យ បន្ថែមថា តាមចម្លើយសារភាពរបស់ជនសង្ស័យ បានសារភាពថាខ្លួនពិតជាបានអនុញ្ញាតឲ្យមាននារី ប្រកបរបរផ្លូវភេទ នៅក្នុងហាងម៉ាស្សារបស់ខ្លួនពិតប្រាកដមែន ដោយភ្ញៀវចូលមួយលើក មានតម្លៃ ចាប់ពី ២៥ ទៅ ៣០ដុល្លារ ចំណែកម្ចាស់ហាងទទួលបាន ១ម៉ឺនរៀលផងដែរ។
ក្រោយពេលធ្វើការសាកសួរ ស្ត្រីប្រកបរបរផ្លូវភេទទាំង៤ នាក់ សមត្ថកិច្ចបាន បញ្ជូនពួកគេ ទៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ។ ចំណែកស្ត្រីម្ចាស់ហាង សមត្ថកិច្ចបានបញ្ជូនទៅតុលាការខេត្ត នារសៀលថ្ងៃទី១៣ខែឧសភានេះ ដោយចោទប្រកាន់ ពីបទសញ្ចារកម្ម៕
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
