នៅព្រឹកថ្ងៃទី១៣ ខែឧសភា ឆ្នាំ២០២០នេះ អាជ្ញាធរស្រុកក្រឡាញ់ បានអនុញ្ញាតឲ្យប្រជាពលរដ្ឋចំនួន ១៣នាក់ ស្រី៧នាក់ ត្រឡប់ទៅរស់នៅតាមមូលដ្ឋានរបស់ខ្លួនវិញ បន្ទាប់ពីពិនិត្យតាមដានពួកគាត់ឃើញថា មិនមានរោគសញ្ញាសង្ស័យថាមានជំងឺកូវីត១៩ ក្រោយពីបានដាក់ឲ្យនៅដាច់ដោយឡែករយ:ពេល ១៤ថ្ងៃ បន្ទាប់ពីពួកគាត់បានវិលត្រឡប់ពីប្រទេសជិត ។
ក្នុងឱកាសនោះដែរ អាជ្ញាធរស្រុក ក៏បានថ្លែងអំណរគុណដល់បងប្អូនប្រជាពលរដ្ឋ ដែលមានការអត់ធ្មត់ តស៊ូក្នុងការអនុវត្តទៅតាមការណែនាំរបស់រាជរដ្ឋាភិបាល ក្រសួងសុខាភិបាល និងការណែនាំរបស់រដ្ឋបាលខេត្តសៀមរាប រហូតដល់ការអនុវត្តដាក់ឲ្យបងប្អូនដាច់នៅដោយឡែករយ:ពេល១៤ថ្ងៃនេះទទួលបានជោគជ័យ ។
ជាមួយគ្នាដែរនោះអាជ្ញាធរ ក៏បានផ្តាំផ្ញើដល់បងប្អូនប្រជាពលរដ្ឋ សូមបងប្អូនកុំជឿពាក្យល្បួងលួងលោមរបស់មេខ្យល់ថា អាចជូនឆ្លងដែនទៅធ្វើការនៅប្រទេសថៃបាននៅក្នុងកាលៈទេសៈនិងស្ថានភាពនៃការប្រឈមនឹងការឆ្លងរាលដាលនៃជំងឺកូវីដ-១៩នេះ សូមបន្តការពារខ្លួននិងក្រុមគ្រួសារព្រមទាំងប្រកបរបរបន្ទាប់បន្សំផ្គត់ផ្គង់ជីវភាពគ្រួសារប្រចាំថ្ងៃ និងបង្កបង្កើនផលដំណាំ ដាំដុះ ចិញ្ចឹមសត្វ គ្រាន់បានបេះបោចកំដរឆ្នាំងនិងកាត់បន្ថយចំណាយប្រចាំថ្ងៃ ។ ក្នុងនោះដែរសូមបងប្អូនឲ្យបន្តថែទាំសុខភាពដោយធ្វើអនាម័យ សំអាតខ្លួនប្រាណ ដោយសាប៊ូ អាល់កុល អនាម័យម្ហូបអាហារ និងជៀងវាង ការជួបជុំចំនួនមនុស្សច្រើឲ្យបានជាដាច់ខាតក្នុងការបង្ការ ទប់ស្កាត់ជំងឺនេះ ត្រូវពាក់ម៉ាស់ និងរក្សាគំលាតសុវត្ថិភាព ៕
អត្ថបទនិងរូបភាព៖រដ្ឋបាលស្រុកក្រឡាញ់
