កាលពីរសៀលថ្ងៃទី១២ខែឧសភា ឆ្នាំ២០២០ម្សិលមិញនេះ ព្រះធម្មសិរី ជុំ គឹមឡេង ព្រះរាជាគណៈថ្នាក់កិត្តិយស និងជាព្រះសុមង្គលសិលា ចារ្យ ព្រះមេគណខេត្តសៀមរាប បាននិមន្តចុះសួរសុខទុក្ខដល់ព្រះសង្ឃនៅតាមទីអារាមនានានៅក្នុងស្រុកក្រឡាញ់និងស្រុកស្រីស្នំ ស្របតាមសេចក្តីជូនដំណឹងរបស់គណៈសង្ឃនាយក ដែលបានជូនដំណឹងឱ្យគណៈសង្ឃខេត្តចុះសួរសុខទុក្ខព្រះសង្ឃតាមមូលដ្ឋាន ក្នុងពេលជំងឺកូវីដ១៩កំពុងរាតត្បាតជុំវិញសកលលោក ខណៈដែលប្រជាពុទ្ឋបរិស័ទជិតឆ្ងាយមិនបានជួបជុំប្រារព្ឋពិធីផ្សេងៗ តាមប្រពៃណីទំនៀមទម្លាប់ ដោយសារខ្លាចឆ្លងវីរុសកូវីដ១៩ និងដោយការអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល និងគណៈសង្ឃនាយក នៃព្រះរាជាណាចក្រកម្ពុជា អំពីវិធានការការពារ បង្ការ និង ទប់ស្កាត់ការឆ្លងរីករាលដាលជំងឺកូវីដ១៩ទៅក្នុងគ្រួសារ និងសហគមន៍។
មានសង្ឃដីកាក្នុងឱកាសនោះ ព្រះធម្មសិរី ជុំ គឹមឡេង បានបញ្ជាក់ ថា ដោយសារតែមេរោគកូវីដ-១៩ បានបណ្តាលឱ្យប៉ះពាល់ជីវភាពប្រជាពុទ្ធបរិស័ទទូទៅ និងមួយផ្នែកដល់សហគមន៍ វត្តអារាមព្រះពុទ្ធសាសនាផងដែរ ដូច្នេះដូមព្រះគ្រូអនុគណនិង សហការី លោកគ្រូចៅ អធិការតាមបណ្តាវត្តទាំងអស់ក្នុងស្រុកទាំងពីរនេះ ត្រូវខិតខំ យកព្រះទ័យទុកដាក់ខ្ពស់ទៅតាមតួនាទីជាព្រះសង្ឃក្នុងព្រះពុទ្ធសាសនា ដោយប្រតិបត្តិតាមធម៌វិន័យជាគោលធំចម្បងបំផុត ដើម្បី ជួយទប់ស្កាត់ការរីករាល់ដាលនៃជំងឺឆ្លងនេះ និងពង្រឹងកម្មវិធី សិក្សា តាមបែបពុទ្ធិកសិក្សាឱ្យបានកាន់តែរីក ចម្រើន ទាំងបរិមាណ និងគុណភាពជារៀងរាល់ឆ្នាំ ជាពិសេសត្រូវប្រុងប្រយ័ត្នឱ្យបានខ្ពស់ និង អនុវត្តឱ្យបានល្អនូវវិធានការការពារកុំឱ្យឆ្លងមេរោគកូវីដ-១៩ ទាំងព្រះសង្ឃ និងពុទ្ធបរិស័ទទូទៅ ព្រោះមេរោគនេះវាកាចសារហាវនិងធ្វើឱ្យមនុស្សរាប់ម៉ឺននាក់បានស្លាប់នៅទូទាំងពិភពលោក ។
ព្រះតេជគុណ ព្រះសុមង្គលសិលាចារ្យ ព្រះមេគណខេត្តសៀមរាប មានសង្ឃដីកាបញ្ជាក់ទៀតថា ជាមួយគ្នានេះ សូមហាមការជួបជុំប្រារព្ឋពិធីសាសនាផ្សេងៗ ដែលមានរូបភាពនិងលក្ខណៈប្រមូលផ្តុំមនុស្សច្រើន បើថ្ងៃឧបោសថសីលហើយដូនជីតាជីមកសមាទានសីលនៅក្នុងវត្ត ត្រូវរៀបចំការអង្គុយ និងការប្រាស្រ័យទាក់ទងនានា ត្រូវរក្សាគំលាតពីគ្នាយ៉ាងតិចមួយម៉ែត្រ ដូច្នេះសូមរួមគ្នាប្រយុទ្ធប្រឆាំងជំងឺកូវីដ១៩ និងបង្កើនស្មារតីការពារតាមវិធាននានា ដែលក្រសួង សុខាភិបាលបានណែនាំ ព្រោះនេះជាពេលវេលាដែលយើងត្រូវរួមគ្នា ទប់ស្កាត់ និងកម្ចាត់ជំងឺនេះ ដែលមិនត្រូវមើលស្រាល ឬធ្វេសប្រហែសនិងប្រមាថជាដាច់ខាត ។
គួររំលឹកថា ក្នុងឱកាសនៃការចុះសួរសុខទុក្ខព្រះសង្ឃ ដូនជីតាជី និងប្រជាពុទ្ឋបរិស័ទ នៅក្នុងស្រុកក្រឡាញ់និងស្រុកស្រីស្នំនេះ ព្រះធម្មសិរី ជុំ គឹមឡេង បាននាំយកស្បៀងអាហារខ្លះៗតាមលទ្ធភាព សម្រាប់ ជួយដល់វត្តអារាមណាដែលខ្វះខាតចង្ហាន់ ដែលថវិកាចំណាយទៅលើគ្រឿងឧបភោគបរិភោគ បានការចូលរួមពីព្រះសង្ឃក្នុងក្រុងសៀមរាប និងម្ចាស់ភោជនីយដ្ឋានមួយចំនួននៅក្បែរបារាយណ៍ ទឹកថ្លា ព្រមទាំងលោកជំទាវមួយចំនួនផងដែរ ដោយប្រមូលបច្ច័យបានប្រមាណជិត១០លានរៀល ដោយបានបែងចែកចំណាយទៅលើត្រីឆ្អើរ , ត្រីប្រឡាក់ , មី , គ្រឿងទេស , ទឹកស៊ីអ៊ីវ , ទឹកត្រី ដែលក្នុងមួយវត្តៗទទួលបាន ៖ ត្រីឆ្អើរ១០០ក្រាស់ , ត្រីប្រឡាក់ ៣គីឡូក្រាម , មី២កេស , គ្រឿងទេស១កញ្ចប់ , ទឹកស៊ីអីវ១យួរ , ទឹកត្រី១យួរ និង ថវិកាមួយវត្ត ១០ម៉ឹនរៀល និង បន្ថែមប្រគេនថវិកា៥០ម៉ឹនរៀលដល់សាលាអនុគណស្រុកនិមួយៗ សម្រាប់ត្រៀមប្រើការចាំបាច់ក្នុងវត្ត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
