ក្នុងត្រីមាសទី១ ឆ្នាំ២០២០នេះ ខេត្តសៀមរាប ទទួលភ្ញៀវទេសចរអន្តរជាតិសរុបជិត ៤០ម៉ឺននាក់ ចំនួននេះមានការថយចុះប្រមាណ៥១ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩ ដោយខេត្តទេសចរណ៍មួយនេះទទួលបានភ្ញៀវទេសចរអន្តរជាតិជិត៨០ម៉ឺននាក់ នេះបើតាមការបង្ហាញរបស់ លោក ងូវ សេងកាក់ ប្រធានមន្ទីរទេសចរណ៍ខេត្តសៀមរាប ក្នុងកិច្ចប្រជុំគណ:កម្មការអភិវឌ្ឍន៍ទេសចរណ៍ខេត្ត នាព្រឹកថ្ងៃទី១២ ខែឧសភា ឆ្នាំ២០២០ នៅសាលាខេត្ត សៀមរាប។
លោកប្រធានមន្ទីរទេសចរណ៍ខេត្ត បញ្ជាក់ថា ដោយសារវិបត្តិជាសកលនៃជំងឹកូវីដ១៩ ភ្ញៀវទេសចរអន្តរជាតិ ដែលមានការថយចុះគួរឲ្យកត់សម្គាល់រួមមាន ទេសចរចិន ដែលនៅចំណាត់ថ្នាក់ទី១ មានការថយចុះ ៧៥ភាគរយ រីឯអាមេរិកថយចុះ ៣៧ភាគរយ, អង់គ្លេសថយចុះ ២៩ភាគរយ និង បារាំងថយចុះប្រមាណ ២៦ភាគរយ។ ជាមួយនោះ គិតចាប់ពីថ្ងៃ២៩ ខែមីនា រហូតដល់ខែមេសា ឆ្នាំ២០២០ ខេត្តសៀមរាប មិនមានជើងហោះហើរក្រៅ ឬ ក្នុងស្រុក ចូលមកខេត្តសៀមរាបឡើយ។
មានប្រសាសន៍ក្នុងកិច្ចប្រជុំនោះ លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភីបាលខេត្តសៀមរាប លើកឡើងថា ដោយសារ ការរីករាលនៃជំងឺកូវីដ១៩ នៅទូទាំងសកលលោក បានបង្កឲ្យបណ្ដាប្រទេសនានា បានបិទជើងហោះហើរ សហគ្រាស ឧស្សាហកម្មនានា ដើម្បីទប់ស្កាត់ការរីករាលដាលនៃជំងឺឆ្លងនេះ។
ព័ត៌មានជាតិ ថ្មីៗ
លោកអភិបាលរងខេត្ត បន្ថែមថា ក្នុងកាលៈទេសៈនេះ ខេត្តសៀមរាប ក៏ដូចជាបណ្ដាប្រទេសដទៃទៀត ពុំអាចពឹងលើភ្ញៀវទេសចរអន្តរជាតិបានឡើយ។ លោកអភិបាលរងខេត្ត ក៏បានគាំទ្រ ចំពោះប្រសាសន៍ឯកឧត្តមរដ្ឋមន្ត្រីក្រសួងទេសចរណ៍ ដែលបានអំពាវនាវដល់ ក្រសួងស្ថាប័នរដ្ឋ ប្រារព្ធព្រឹត្តិការណ៍ជាតិ អន្តរជាតិនានានៅក្នុងខេត្តសៀមរាប ដើម្បីស្ដារវិស័យទេសចរណ៍ក្នុងខេត្តមួយនេះ។
ជាមួយនោះដែរ លោកអភិបាលរងខេត្ត ក៏បានអំពាវនាវ ថ្នាក់ដឹកនាំ មន្ត្រី នៅតាមមន្ទីរ អង្គភាព រួមនិងអាជ្ញាធរក្រុង-ស្រុក ក្នុងខេត្តទាំងអស់ ចូលរួមធ្វើការផ្សព្វផ្សាយអំពីតំបន់ទេសចរណ៍ នៅក្នុងមូលដ្ឋាន តាមប្រព័ន្ធផ្សព្វផ្សាយនានា ដែលខ្លួនអាចធ្វើបាន ដើម្បីឲ្យប្រជាពលរដ្ឋក្នុងប្រទេសបានដឹងនិងស្គាល់ និងចូលរួមលើកកម្ពស់ចលនាទេសចរក្នុងស្រុក។
អត្ថបទ និង រូបថត ៖ លោក អ៊ុន ណារាជ្យ
កែសម្រួលអត្ថបទ ៖ លោក សេង ផល្លី
