ក្នុងឱកាសនៃការដាក់បញ្ចាំងភាពយន្ដចល័តរួមគ្នា រឿងចិននិងរឿងខ្មែរល្បីៗ ដើម្បីអបអរទិវាខួប១០នៃការបង្កើតវិទ្យុជាតិមិត្ដភាពកម្ពុជា ចិន និង ដើម្បីចែករំលែកវប្បធម៌ និងអរិយធម៌គ្នាទៅវិញទៅមក នៅក្នុងក្រុងសៀមរាប រយៈពេលបីថ្ងៃចាប់ពីថ្ងៃទី០៩ដល់ថ្ងៃទី១១ខែធ្នូឆ្នាំ២០១៨នេះ ក្រុមយុវជនខ្មែរ និងសាធារណៈជនមួយចំនួន នៅក្នុងក្រុងសៀមរាប បានសម្ដែងនីការចំណាប់អារម្មណ៍យ៉ាងខ្លាំងចំពោះខ្សែភាពយន្ដរបស់ប្រទេសចិន និងប្រទេសកម្ពុជា ដោយសារតែរឿងនិមួយៗ បានបង្កប់អត្ដន័យយ៉ាងជ្រាលជ្រៅ និងអប់រំមនុស្សឲ្យចេះតស៊ូ និងអត់ធ្មត់គ្រប់យ៉ាង រហូតទទួលបានជោគជ័យលើមុខជំនាញនិមួយៗ ជាពិសេសតាមរយៈខ្សែភាពយន្ដនេះ ធ្វើឲ្យប្រទេសទាំងពីរកាន់តែចងមេត្រីភាពជាមួយគ្នាយ៉ាងស្អិតរមួតបន្ថែមទៀត ។
លោក ហ្វឺង ហ៊ុយ អគ្គនាយកវិទ្យុមិត្ដភាពកម្ពុជា ចិន បានឲ្យដឹងថា ខ្សែភាពយន្តចល័តចិន និងខ្សែភាពយន្ដខ្មែរនេះ ជារឿងដែលល្បី ដែលនិពន្ធឡើងសម្រាប់អប់រំ និងផ្សព្វផ្សាយ ពីវប្បធម៌ និងអរិយធម៌ ដល់ពលរដ្ឋនៃប្រទេសទាំងពីរ ក្រោមកិច្ចសហប្រតិបត្តិការរវាងស្ថានទូតចិនប្រចាំកម្ពុជា ក្រសួងវប្បធម៍និងវិចិត្រសិល្ប: ហើយនឹងចាក់បញ្ចាំងនៅតាមបណ្តាតំបន់ទាហានសេដ្ឋកិច្ចពិសេស និងតំបន់ជនបទមួយចំនួននៅក្នុងខេត្តនានា ដូចជាខេត្តសៀមរាប , ស្វាយរៀង , កំពង់ស្ពឺ , កំពង់ចាម , ព្រះសីហនុ , កោះកុង , ព្រះវិហារ និង ខេត្តបាត់ដំបង ដើម្បីទស្សនាកំសាន្តនឹងបានស្គាល់ពីវប្បធម៌ផងដែរ ដើម្បីអបអរសាទរវិទ្យុមិត្ដភាពកម្ពុជា រយៈពេល១០ឆ្នាំ ។
សូមបញ្ជាក់ថា ខ្សែភាពដែលកម្ពុជាយកមកបញ្ចាំងរួមគ្នារយៈពេលបីថ្ងៃនោះមានចំនួន៦រឿង ក្នុងនោះរឿងខ្មែរមានចំនួនបីរឿង គឺរឿងលោកឪពុក , ខ្យល់បាតព្រែក និងរឿងម្ចាស់កំបិតត្នោត ហើយរឿងលោកឪពុក បានទទួលជោគជ័យដោយមានការគាំទ្រពីមហាជនយ៉ាងច្រើននៅក្នុងប្រទេសកម្ពុជាគឺជាឈុតឆាកដ៏ទាក់ទាញ និងកំសត់បំផុតសម្រាប់ជីវភាពរស់នៅរបស់ខ្មែរយើង ។
ចំណែកប្រទេសចិនមានចំនួន៣រឿង គឺរឿងអ្នកចំបាំងចចក , កុងហ្វូយូហ្គា និង រឿងក្រុមនារីខ្សល់ព្យុះ ដែលរឿងទាំងនេះ គឺអ្នកនិពន្ធបានលើកឡើងពីនារីមួយក្រុមនៅតាមជនបទព្រៃភ្នំ ដែលជាអ្នកស្រឡាញ់កីឡាបាល់ទាត់ ហើយតស៊ូយ៉ាងស្វិតស្វាញរហូតការខំប្រឹងប្រែងប្រគួតពួកគេទទួលបានជោគជ័យ និងជារឿងដែលមានបាញ់ប្រហារគ្នា ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
