នាពេលកន្លងមក ការឈប់យានយន្តនៅតាមដងផ្លូវ ជាពិសេសបរិវេណប្រាសាទ ក្នុងតំបន់អង្គរ បានបង្កឲ្យប៉ះពាល់ដល់ការរៀបចំ សណ្ដាប់ធ្នាប់នៅតាមដងផ្លូវ និងសោភណ្ឌភាព។ កាលពីរសៀលថ្ងៃទី១៤ ខែឧសភា ឆ្នាំ២០២០ ក្រុមការងារអាជ្ញាធរជាតិអប្សរា បាននិងកំពុងបន្តរៀបចំ បង្គោលខណ្ឌចែកផ្លូវយានយន្ត និងបរិវេណដើរទស្សនា នៅតាមទីតាំងសំខាន់ៗ ក្នុងតំបន់អង្គរ ដើម្បបង្ការការឈប់យានយន្តគ្រប់ប្រភេទ គ្មានសណ្ដាប់ធ្នាប់ ដែលបង្កឲ្យប៉ះពាល់ដល់ សោភណ្ឌភាពប្រាសាទបុរាណ។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យអាជ្ញាធរជាតិអប្សរា បង្ហាញថា ប្រជាពលរដ្ឋ អ្នកលក់ដូរតាមរ៉ឺម៉កម៉ូតូ រួមនិងអ្នកប្រកបរបរដឹកភ្ញៀវទេសចរណ៍មួយចំនួន បានឈប់យានយន្តរបស់ខ្លួន តាមចិញ្ចើមផ្លូវ ឬក្នុងបរិវេណប្រាសាទតែម្ដង បានបង្កឲ្យគ្មានសណ្ដាប់ធ្នាប់ និងប៉ះពាល់ដល់អារម្មណ៍អ្នកទេសចរណ៍ ខណៈពួកគេចង់ទស្សនា ឬផ្ដិតរូបភាព ដ៏ស្រស់ស្អាតនៃទីតាំងទាំងនោះ។
លោកបន្តថា ការរបោះបង្គោលខណ្ឌតាមចិញ្ចើមផ្លូវនេះ គឺដើម្បីរក្សាសណ្ដាប់ធ្នាប់ បង្ការគ្រោះថ្នាក់ចរាចរណ៍ និងរក្សាសោភណ្ឌភាពតាមដងផ្លូវ។ ជាមួយនោះ នាពេលកន្លងមក អាជ្ញាធរជាតិអប្សរាក៏បានរៀបចំរួចរាល់ហើយដែរ នូវទីតាំងចំណតរថយន្ដនៅក្នុងរមណីយដ្ឋានអង្គររួមមាន ចំណតខាងមុខប្រាសាទអង្គរវត្ត ចំណតនៅខាងមុខភ្នំបាខែង ចំណតប្រាសាទអង្គរធំ មានទីតាំងស្ថិតនៅខាងជើងលានជល់ដំរី និងចំណតនៅតាមទីតាំងជាច្រើនទៀត។
ព័ត៌មានជាតិ ថ្មីៗ
ក្នុងនាមអាជ្ញាធរជាតិអប្សរា លោកបាន ថ្លែងអំណរគុណដល់អាជីវករ អ្នកបើកបររថយន្ត រ៉ឺម៉កកង់បី មគ្គុទ្ទេសក៍ទេសចរណ៍ ភ្ញៀវទេសចរ រួមនិងសាធារណជនទាំងអស់ ដែលតែងតែចូលរួមសហការ ក្នុងកិច្ចការរៀបចំសណ្ដាប់ធ្នាប់នេះ ដើម្បីឲ្យតំបន់រមណីយដ្ឋានអង្គរមានរបៀបរៀបរយ ស័ក្ដិសមជាគោលដៅទេសចរណ៍សម្រាប់ពិភពលោក៕
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
