នៅថ្ងៃទី១៥ ខែឧសភា ឆ្នាំ២០២០ អតីតផ្លូវគ្រួសក្រហមមួយ ០១ខ្សែ ប្រវែង ៦១៥ ម ទទឹង ៥ ម៉ែត្រ ត្រូវបានស្ថាបនាជាផ្លូវបេតុងអាមេថ្មី ស្ថិតក្នុងភូមិសំពៅលូន ឃុំក្រឡាញ់ ស្រុកក្រឡាញ់ ខេត្តសៀមរាប និង បានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១៥ ខែឧសភា ឆ្នាំ២០២០នេះ។
ពិធីសម្ពោធនេះ មានការអញ្ជើញជាអធិបតីពី ឯកឧត្តម អ្នកឧកញ៉ា សៀង ណាំ សមាជិកសភាតំណាងរាស្រ្តមណ្ឌល សៀមរាប និងជាប្រធានក្រុមការងារខេត្តចុះជួយស្រុកក្រឡាញ់ ឯកឧត្តម អ៊ាន ឃុន សមាជិកក្រុមប្រឹក្សាខេត្ត ព្រមទាំងសមាជិក សមាជិកាក្រុមការងារ អាជ្ញាធរមូលដ្ឋានគ្រប់លំដាប់ថ្នាក់ និង ប្រជាពលរដ្ឋជាច្រើនកុះករ។
លោកស្រី ម៉ននី រង្សី អភិបាលស្រុកក្រឡាញ់ លើកឡើងថា ផ្លូវបេតុងមួយខ្សែនេះ ពិតជាបានរួមចំណែកយ៉ាងសំខាន់ ក្នុងការលើកកម្ពស់ជីវភាពប្រជាពលរដ្ឋនៅមូលដ្ឋានេះ ជាពិសេសជួយសម្រួលដល់កិច្ចការងារថែរក្សា សន្តិសុខ សណ្តាប់ធ្នាប់សាធារណៈ និងសុខុមាលភាពប្រជាពលរដ្ឋ។
ព័ត៌មានជាតិ ថ្មីៗ
មានប្រសាសន៍សំណេះសំណាលក្នុងឱកាសនោះ ឯកឧត្តម អ្នកឧកញ៉ា សៀង ណាំ បង្ហាញថា ក្នុងយុទ្ធសាស្ត្រចតុកោណដំណាក់ទី៤ របស់រាជរដ្ឋាភិបាល នីតិកាលទី៦ ក្រោមការនាំការដឹកនាំដ៏ឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រី មាតុភូមិប្រទេសយើង ទទួលបានសុខសន្តិភាព ស្ថេរភាពពេញលេញ និងអភិវឌ្ឍរីកចម្រើនលើគ្រប់វិស័យ។ ក្នុងនោះសមិទ្ធផលផ្លូវបេតុមួយខ្សែនេះ នឹងមានតួនាទីយ៉ាងសំខាន់ ក្នុងការអភិវឌ្ឍន៍នៅស្រុកក្រឡាញ់ ដើម្បីធ្វើឲ្យជីវភាពរបស់ប្រជាពលរដ្ឋកាន់តែមានភាពល្អប្រសើរ។ ឆ្លៀងក្នុងឱកាសនោះ ឯកឧត្តម ក៏បានផ្តាំផ្ញើដល់ ប្រជាពលរដ្ឋទាំងអស់ ត្រូវប្រុងប្រយ័ត្នខ្ពស់ចំពោះមេរោគកូវីដ១៩ សូមអនុវត្តតាមគោលការណ៍អនាម័យ ដែលណែនាំដោយរាជរដ្ឋាភិបាល និងក្រសួងសុខាភិបាល ឲ្យបានជាប្រចាំ។
គួរបញ្ជាក់ថា ផ្លូវមួយខ្សែនេះ បានបើកការដ្ឋានសាងសង់កាលពី ថ្ងៃទី១៦ ខែធ្នូ ឆ្នាំ២០១៩ ដោយទទួលបានថវិកាពីអង្គកឋិនទានសាមគ្គី នាខែតុលា ឆ្នាំ២០១៩ ហើយអង្គកឋិនទាននេះ បានផ្តួចផ្តើមដោយ ឯកឧត្តម ទៀ សីហា អភិបាលខេត្តសៀមរាប និងលោកជំទាវ ឯកឧត្តម អ្នកឧកញ៉ា សៀង ណាំ និង លោកជំទាវ ព្រមទាំងសមាជិក សមាជិកា អាជ្ញាធរមូលដ្ឋានគ្រប់លំដាប់ថ្នាក់និងប្រជាពលរដ្ឋ ក្នុងស្រុកក្រឡាញ់ផងដែរ។ផ្លូវនេះចំណាយថវិកាចំនួនអស់ជិត៦០០០០ដុល្លារ និងគ្រោងបំពាក់អំពូលសូឡារ តាមដងផ្លូវទៀតផង។
អត្ថបទ និង រូបថត ៖ យូ វង្ស
កែសម្រួលអត្ថបទ ៖ សេង ផល្លី
