រយៈពេល ៤ខែ ចាប់ពីខែមករា ដល់ខែមេសា ឆ្នាំ២០២០ អាជ្ញាធរជាតិអប្សរា បានចុះហាមឃាត់ ការសាងសង់សំណង់ខុសច្បាប់ ក្នុងតំបន់រមណីយដ្ឋានអង្គរមានចំនួន ៧៤៩ករណី ចំនួននេះមានការកើនឡើង ៥៧ភាគរយ បើធៀបនឹងរយៈពេលដូចគ្នា កាលពីឆ្នាំ២០១៩ នេះបើតាមរបាយការណ៍កាលពីថ្ងៃទី១២ ខែឧសភា ឆ្នាំ២០២០ របស់អាជ្ញាធរជាតិអប្សរា ។
បើតាមរបាយការណ៍កាលពីឆ្នាំ២០១៩ ក្នុងរយៈពេលដូចគ្នានេះ ការចុះហាមឃាត់ សំណង់ខុសច្បាប់ ក្នុងតំបន់រមណីយដ្ឋានអង្គរ មានចំនួនត្រឹមតែ៤៧៥ករណីប៉ុណ្ណោះ គឹបានកើនឡើង២៧៤ករណីនៅឆ្នាំ២០២០ ដែលបង្ហាញឲ្យឃើញថា ជនឆ្លៀតឱកាស នៅតែមិនគោរពតាមសេចក្ដីណែនាំ របស់អាជ្ញាធរជាតិអប្សរា ដែលតែងតែបានផ្សព្វផ្សាយ នៅតាមមូលដ្ឋាន និងប្រព័ន្ធផ្សព្វផ្សាយនានា។
លោកឡុង កុសល អ្នកនាំពាក្យអង្គភាពអាជ្ញាធរជាតិអប្សរា បានឲ្យដឹងកាលពីថ្ងៃទី១៤ ខែឧសភា ឆ្នាំ២០២០នេះថា ចំពោះការរាលដាលសំណង់ខុសច្បាប់ក្នុងតំបន់បេតិកភណ្ឌនេះ មន្ត្រី នៃអាជ្ញាធរជាតិអប្សរា បានហាមឃាត់ការដ្ឋានសំណង់នោះទាំងអស់។ រីឯម្ចាស់សំណង់ខាងលើ គឺបានផ្តិតមេដៃ ព្រមរុះរើសំណង់ទាំងនោះដោយខ្លួនឯងផងដែរ។
ព័ត៌មានជាតិ ថ្មីៗ
ក្នុងនាមអ្នកនាំពាក្យអង្គភាពអាជ្ញាធរជាតិអប្សរា លោកសូមអំពាវនាវដល់ប្រជាពលរដ្ឋគ្រប់រូប កុំជឿការឃោសនាលក់និងទិញដីក្នុងតំបន់បេតិកភណ្ឌ ពីសំណាក់ក្រុមឈ្មួញខិលខូច។ ដោយឡែក ចំពោះសំណើសុំសាងសង់ផ្សេងៗនៅក្នុងតំបន់រមណីយដ្ឋានអង្គរ ពុំមានការបង់ប្រាក់ឡើយ សូមប្រជាពលរដ្ឋ ដាក់លិខិតស្នើសុំ ឬសាកសួរព័ត៍មាន នៅច្រកចេញចូលតែមួយ របស់សាលាក្រុងឬស្រុកមួយចំនួន ឬតាមមេឃុំ-ចៅសង្កាត់ នៅក្រុង-ស្រុកទាំង៥ ក្នុងតំបន់រមណីយដ្ឋានអង្គរ ៕
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
