នៅព្រឹកថ្ងៃទី១៨ ខែឧសភា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានបើកកិច្ចប្រជុំគណ:បញ្ជាការឯកភាពរដ្ឋបាលខេត្តសៀមរាប និងណែនាំដល់អាជ្ញាធរក្រុងស្រុក រហូតដល់ថ្នាក់ភូមិ ត្រូវបន្តយកចិត្តទុកពិនិត្យសុខភាពប្រជាពលរដ្ឋទើបមកពីបរទេស ការដាក់ខ្លួននៅដាច់ដោយឡែក១៤ថ្ងៃ ជាពិសេសណែនាំដល់ប្រជាពលរដ្ឋ កុំធ្វើចំណាកស្រុកទៅបរទេស ដោយខុសច្បាប់។
ឯកឧត្តមអភិបាលខេត្ត បានមានប្រសាសន៍បន្ថែមថា បញ្ហាជម្ងឺឆ្លងកូវីដ១៩ យើងត្រូវយកចិត្តទុកដាក់ឲ្យបានខ្ពស់បំផុត ថ្វីត្បិតតែក្រសួងសុខាភិបាលបានចេញសេចក្តីប្រកាសនាពេលថ្មីៗនេះថា ចំពោះអ្នកជំងឺកូវីដ១៩ ម្នាក់ចុងក្រោយគេ ពោលគឺអ្នកជំងឺ ទី១២២ បានជាសះស្បើយ ដែលបានធ្វើឲ្យប្រទេសកម្ពុជាក្លាយជាប្រទេសគ្មានអ្នកជំងឺកូវីដ១៩ (ជាសះស្បើយ១០០ភាគរយ) និងអ្នកជំងឺកំពុងសម្រាកព្យាបាលទៀតឡើយ។
ឆ្លៀតក្នុងឱកាសនោះ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាម បានបញ្ជាក់ជូនឯកឧត្តមអភិបាលខេត្ត ជុំវិញសារព័ត៌មានវៀតណាម បានផ្សព្វផ្សាយថា មានករណីជនជាតិវៀតណាមម្នាក់ បានចាកចេញពីខេត្តសៀមរាប និងបានទៅដល់ប្រទេសរបស់ខ្លួនវិញ កាលពីថ្ងៃទី០២ ខែឧសភា ឆ្នាំ២០២០ ហើយត្រូវបានរកឃើញថាវិជ្ជមានវីរុសកូវីដ១៩ ដោយអាជ្ញាធរវៀតណាម នៅថ្ងៃទី១៥ ខែឧសភា។ ករណីនេះ ពុំមានភ័ស្តុតាងជាក់លាក់ណាមួយបង្ហាញថា បានឆ្លងមេរោគនៅកម្ពុជា ឬនៅប្រទេសវៀតណាមនោះទេ។ ជាមួយនោះ រាជរដ្ឋាភិបាលកម្ពុជា មិនបានទទួលបានព័ត៌មានផ្លូវការណាមួយពីភាគីវៀតណាម ចំពោះករណីដែលបានលើកឡើងនៅក្នុងសារព័ត៌មានបានចុះផ្សាយនោះទេ ។
ព័ត៌មានជាតិ ថ្មីៗ
លោកបានបន្តថា ក្រសួងសុខាភិបាល ក៏មិនអាចសន្និដ្ឋានបានថា ការចម្លងនោះវាអាចឆ្លងនៅប្រទេស វៀតណាមដែរទេ? ដោយសារការចម្លងមេរោគនេះ វាអាចកើតមានឡើងគ្រប់ទីកន្លែង គ្រប់កាលៈទេសៈ និងគ្រប់ពេលវេលាទាំងអស់ ជាពិសេសទៅទៀតនោះ គឺនៅពេលដែលបុគ្គលធ្វើដំណើរចល័តតែម្តង ហើយគ្រប់ព័ត៌មានដែលទទួលបាន ក្រុមមន្ត្រីជំនាញ តែងតែធ្វើការស្រាវជ្រាវនៅព្រះរាជាណាចក្រកម្ពុជា ដោយបានធ្វើការរុករកឱ្យអស់លទ្ធភាព។
សូមបញ្ជាក់ផងដែរថា កាលពីថ្ងៃទី១៦ ខែឧសភា ឆ្នាំ២០២០ កន្លងមកនេះ សារព័ត៌មាន VN Express និង Vietnam News របស់ប្រទេស វៀតណាម បានផ្សាយថា រកឃើញករណីវិជ្ជមានទី៣១៥ ទៅលើបុរសជនជាតិវៀតណាមម្នាក់ អាយុ៣៩ឆ្នាំ ដែលបានធ្វើដំណើរមកកាន់ប្រទេសកម្ពុជា កាលពីខែមករា និងបានវិលត្រលប់ទៅប្រទេសរបស់ខ្លួនវិញកាលពីថ្ងៃទី០២ ខែឧសភា ហើយអាជ្ញាធរវៀតណាម បានធ្វើតេស្តរកមេរោគកូវីដ១៩ ទៅលើបុរសរូបនេះ នៅថ្ងៃទី០៥ ខែឧសភា ប៉ុន្តែលទ្ធផលគឺអវិជ្ជមាន រហូតដល់ថ្ងៃទី១៥ ខែឧសភា ទើបអាជ្ញា ធរវៀតណាម ធ្វើតេស្តលើបុរសនេះម្តងទៀត ហើយលទ្ធផលគឺវិជ្ជមានវីរុសកូវីដ១៩ ៕
អត្ថបទ និង រូបថត ៖ ស៊ាន សុផាត
កែសម្រួលអត្ថបទ ៖ សេង ផល្លី
