នៅថ្ងៃទី ២៥ ខែឧសភា ឆ្នាំ២០២០នេះ កម្លាំងការិយាល័យនគរបាលប្រឆាំង ការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បញ្ជូនជនបរទេសម្នាក់ទៅតុលាការ ពាក់ព័ន្ធនឹងករណីទិញពេស្យាចារកុមារ ក្រោមរូបភាពសុំធ្វើកូនធម៌ នៅចំណុចបន្ទប់ជួលភូមិតាវៀន សង្កាត់សាលាកំរើក ក្រុងសៀមរាប។
តាមការឲ្យដឹងពី លោកវសេនីយ៍ឯក ជា ហេង នាយការិយាល័យ នគរបាលប្រឆាំងការជួញដូរមនុស្ស និងការពារអនីតិ ជន បង្ហាញថា ជនសង្ស័យមានឈ្មោះ Trilessky Ran អាយុ៤៣ឆ្នាំ ភេទប្រុស ជនជាតិអ៊ីស្រាអែល កាន់លិខិតឆ្លងដែនថតចំលងលេខ ២៣២៩ ៣៤១២ ត្រូវបានឃាត់ខ្លួនកាលពីម៉ោងប្រមាណ៩យប់ ថ្ងៃទី២៤ ខែឧសភា ឆ្នាំ២០២០ នៅចំណុចបន្ទប់ជួលភូមិតាវៀន សង្កាត់សាលាកំរើក ក្រុងសៀមរាប។ តាមសេចក្តីរាយការណ៍ កាលពីចុងខែមេសា ឆ្នាំ២០២០ ជនបរទេសរូបនេះ បានជិះម៉ូតូដើររកកុមារីនៅតាមភូមិសុំធ្វើជាកូនធម៌។ បន្ទាប់មកជនសង្ស័យ បានចូលមកផ្ទះជួលរបស់ស្ត្រីម្នាក និងបានទាក់ទងកូនស្រីម្នាក់របស់គាត់ អាយុ១១ឆ្នាំ ។
តាមរយៈសម្ដីម្ដាយកុមារីជនរងគ្រោះ នៅអំឡុងចុងខែ មេសា ឆ្នាំ ២០២០ ជនសង្ស័យ បានទៅដល់ផ្ទះរបស់គាត់ ចំនួន ២លើក ហើយបានចាប់កូនស្រីរបស់គាត់ ដោយដេកអោបថើបបឺតមាត់ និងស្ទាបអង្អែលប្រដាប់ភេទ ហើយជនបរទេសរូបនោះក៏បានលួងលោមឲ្យប្រាក់ ៥ម៉ឺនរៀល តែពុំបានសម្រេចឡើយ ដោយកូនស្រីរបស់គាត់ខ្លាច បានរត់ចេញ ។ ក្រោយមកជនសង្ស័យ បានទៅរកកូនស្រីគាត់ម្តងទៀត តែគាត់មិនឲ្យចូលផ្ទះ លុះយប់ថ្ងៃទី ២៤ខែឧសភា ឆ្នាំ២០២០នេះ ជនសង្ស័យបានត្រឡប់មកសារជាថ្មីនេះទៅម្តងទៀត ទើបគាត់រាយការណ៍ជូនប្រជាការពារភូមិឲ្យជួយអន្តរាគមតែម្ដង។ ករណីពេស្យាចារកុមារនេះដែរ ក៏មានអាណាព្យាបាល របស់ជនរងគ្រោះ៤នាក់ទៀត បានប្តឹងមកសមត្ថកិច្ចផងដែរ។
ព័ត៌មានជាតិ ថ្មីៗ
តាមការបញ្ជាក់របស់សមត្ថកិច្ច ជនសង្ស័យមិនសហការផ្ដល់ចម្លើយសារភាព ហើយថែមទាំងប្រើកាយវិការច្រងេងច្រងាងដាក់សមត្ថកិច្ចថែមទៀត។
សូមជម្រាបថា ជនសង្ស័យរូបនេះ ធ្លាប់ជាប់ពន្ធនាគារនៅខេត្តស្វាយរៀង ពីបទប្រើប្រាស់ដោយខុសច្បាប់ នូវសារធាតុញៀន សាលក្រមលេខ 263 (គ) ចុះថ្ងៃទី៣១ខែតុលា ឆ្នាំ២០១៩។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
