លោកស្រី យូ សុភា អភិបាលរងខេត្ត និងជាប្រធានលេខាធិការប្រយុទ្ឋប្រឆាំងអំពើជួញដូរមនុស្សខេត្តសៀមរាប បានមានប្រសាសន៍ថា ផ្អែកទៅតាមរបាយការណ៍ប្រចាំខែរបស់មន្ទីរ អង្គភាពពាក់ព័ន្ធ និង អង្គការដៃគូទាំងអស់ក្នុងខេត្ត រួមទាំងបញ្ហាប្រឈម និងស្ថានភាពជាក់ស្តែងនៅក្នុងពេលបច្ចុប្បន្ននេះ លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានកំណត់និងដាក់ចេញនូវចេញនូវអនុសាសន៍សម្រាប់ក្រុមការងារ ជាសមាជិក និងអង្គការដៃគូពាក់ព័ន្ធដើម្បីអនុវត្តបន្តរួមមាន៖
១. ស្នើឲ្យរដ្ឋបាលក្រុង ស្រុក ធ្វើការកំណត់គោលដៅអាទិភាព ចំពោះគ្រួសារ ក្រ១ , ក្រ២ និង ក្រ៣ ពិសេសបងប្អូនប្រជាពលរដ្ឋដែលទើបត្រឡប់មកពីក្រៅប្រទេស រួមទាំងការពង្រាយសកម្មភាព ដើម្បីឲ្យបានដល់ប្រជាពលរដ្ឋ និងសហគមន៍ ដែលជួបការលំបាក ដោយសហការជាមួយអង្គការដៃគូ វិស័យឯកជន សប្បុរសជន ដែលមាននៅក្នុងខេត្ត ក្រុង ស្រុក ដើម្បីរួមគ្នាធ្វើសកម្មភាព ទៅតាមគោលការណ៍ដែលកំណត់ដោយរាជរដ្ឋាភិបាល ក្នុងដំណាក់កាលនេះ ដោយទី១. ត្រូវលើកកម្ពស់សុខភាពទូទៅ រួមទាំងសុខភាពមាតានិងទារក និងការប្រយុទ្ធប្រឆាំងនឹងជំងឺកូវីដ១៩ ដែលជារលកទី២ អាចរាលដាលនៅមូលដ្ឋានសហគមន៍ និង ទី២. ត្រូវលើកម្ពស់សុវត្ថិភាពស្បៀង អាហារូបត្ថម្ភ និងជីវភាពរស់នៅប្រចាំថ្ងៃ ឲ្យបានទាន់ពេលវេលា ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ។
២. ស្នើសុំឲ្យគ្រប់អ្នកពាក់ព័ន្ធទាំងអស់ ពិនិត្យលើការផ្តល់ជំនាញវិជ្ជាជីវៈ ឬជំនាញផ្នែកសិកម្ម ដើម្បីឲ្យបងប្អូនអាចធ្វើការផ្គតផ្គង់សម្រាប់ជីវភាពគ្រួសាររបស់គាត់ក្នុងដំណាក់កាលនេះ ។
៣. ស្នើដល់រដ្ឋបាលក្រុង ស្រុក ធ្វើការពិនិត្យ និងជំរុញបន្ថែមទៅដល់លោកគ្រូ អ្នកគ្រូ និងអាណាព្យាបាលសិស្ស ពាក់ព័ន្ធនឹងការសិក្សារបស់កុមារតាមខ្នងផ្ទះ តាមរយៈការសិក្សានៅតាមប្រព័ន្ធអនឡាយ និងការសិក្សាតាមរយៈខ្នងផ្ទះ ដោយមានគ្រូចុះទៅបង្រៀនដល់ផ្ទះ ឬអាណាព្យបាលជួយបង្រៀន ។
៤. ស្នើពង្រឹងលើការតាមដាន និងបង្ក្រាបមេខ្យល់ ដែលនាំចេញប្រជាពលរដ្ឋទៅក្រៅប្រទេស ដោយខុសច្បាស់ និងនៅក្នុងដំណាក់កាលកូវីដ១៩ និងសូមឲ្យមានកិច្ចសហការក្នុងការផ្តល់ព័ត៌មានដល់ក្រុមការងារ។
៥. ស្នើសុំឲ្យមន្ទីរការងារ និងបណ្តុះបណ្តាលវិជ្ជាជីវៈខេត្តសៀមរាប ធ្វើការពិភាក្សាជាមួយវិទ្យាស្ថានបណ្តុះបណ្តាល និងក្រសួងការងារនិងបណ្តុះបណ្តាលវិជ្ជាជីវៈ លើការបណ្តុះបណ្តាលវិជ្ជាជីវៈ តើអាចបើកដំណើរការបានទេ បើបានគួរបានរៀបចំតាមស្តង់ដារត្រឹមត្រូវ តាមការណែនាំរបស់ក្រសួងសុខាភិបាល ពីព្រោះក្នុងអំឡុងពេលនេះ ទាមទារឲ្យមានការបណ្តុះបណ្តាលដល់ប្រជាពលរដ្ឋ ពីព្រោះមានប្រជាពលរដ្ឋជាច្រើន ពុំមានការធ្វើការ និងមានតម្រូវការជំនាញវិជ្ជាជីវៈផងដែរ ។
៦. ត្រូវពង្រឹងលើការផ្សព្វផ្សាយច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ បន្ថែមទៀត ។
លោកស្រី យូ សុភា មានប្រសាសន៍បែបនេះ ក្នុងឱកាសបើកកិច្ចប្រជុំប្រចាំខែឧសភា របស់លេខាធិការដ្ឋានប្រយុទ្ឋប្រឆាំងអំពើជួញដូរមនុស្សខេត្តសៀមរាប នាព្រឹកថ្ងៃទី២៦ ខែឧសភា ឆ្នាំ២០២០នេះ នៅសាលប្រជុំសាលាខេត្ត ដោយមានការអញ្ជើញចូលរួមពីសំណាក់លោក លោកស្រី សមាជិក សមាជិកា នៃលេខាធិការដ្ឋាន ព្រមទាំងតំណាងអង្គការ ដៃគូពាក់ព័ន្ឋសរុបចំនួន ៥៩នាក់ ។
គួររំលឹកថា អង្គប្រជុំបានពិនិត្យទៅលើកំណត់ហេតុ និងត្រួតពិនិត្យលើផែនការដែលអង្គប្រជុំបានដាក់ចេញកាលពីកិច្ចប្រជុំប្រចាំត្រីមាសទី១ ឆ្នាំ២០២០កន្លងទៅ និងបានពិភាក្សាលើបញ្ហាប្រឈមមួយចំនួន ដែលក្រុមការងារបានអនុវត្តសកម្មភាពប្រយុទ្ធប្រឆាំងអំពើជួញដូរមនុស្ស តាមគ្រប់រូបភាព ដោយមានការចូលរួមសហការពីគ្រប់ភាគីពាក់ព័ន្ឋទាំងអស់ នៅតាមមូលដ្ឋានភូមិ ឃុំ ដូចជា ធ្វើការផ្សព្វផ្សាយច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ច្បាប់ពាក់ព័ន្ឋនានា គោលនយោបាយភូមិ-ឃុំមានសុវត្ថិភាព វេទិកាសាធារណៈច្បាប់ទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះ ការធ្វើចំណាកស្រុកដោយសុវត្ថិភាព ស្ប៉តអប់រំ ការផ្សាយតាមវិទ្យុ ទូរទស្សន៍ ជាដើម។ល។
អង្គប្រជុំក៏បានពិភាក្សាលើ ការស៊ើបអង្កេត និងបង្ក្រាបបទល្មើស ដើម្បីយកទៅផ្តន្ទាទោសតាមនីតិវិធីច្បាប់បានរាល់ករណីផងដែរ ជាពិសេសការស្វែងរកដំណោះស្រាយរួមគ្នា សម្រាប់ការពារជនរងគ្រោះ និងងាយរងគ្រោះ ដោយអំពើហិង្សាទាក់ទងនឹងយេនឌ័រ ឬការរំលោភបំពានផ្សេងៗ ដែលពាក់ព័ន្ធទៅនឹងច្បាប់ស្តីពី ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
