មានប្រសាសន៍ក្នុងកិច្ចប្រជុំបូកសរុបលទ្ធផលការងារដោះស្រាយបញ្ហាជនអនាថា រយៈពេល០៥ខែ ពីខែមករា ដល់ ខែឧសភា ឆ្នាំ២០២០ និងទិសដៅអនុវត្តបន្តរបស់អនុគណៈកម្មាធិការដោះស្រាយបញ្ហាជនអនាថាខេត្តសៀមរាប កាលពីព្រឹកថ្ងៃទី២៦ ខែឧសភា ឆ្នាំ២០២០នេះ លោក នាក់ ណេរ៉ុន អភិបាលរងខេត្តសៀមរាប បានបញ្ជាក់ថា ពាក់ព័ន្ធនឹងបញ្ហាដំណោះស្រាយជនអនាថា និងអ្នកសុំទាននៅក្នុងខេត្តសៀមរាបនាពេលបច្ចុប្បន្ននេះ យើងពុំទាន់មានមណ្ឌលសំចតសម្រាប់ទទួលយកជនអនាថា អ្នកសុំទាន និងជនវិកលចរិកឲ្យស្នាក់នៅក្នុងខេត្តទេ ហើយសេវាជួយជនអនាថាក៏នៅមានកំរិត ដោយសារអង្គការភាគច្រើនមិនមានកម្មវិធីសម្រាប់ជួយដល់ជនអនាថា និងមន្ទីរសង្គមកិច្ចខេត្ត ក៏គ្មានកញ្ចប់ថវិកាសម្រាប់ការអនុវត្តកម្មវិធីសមាហរណកម្មជនអនាថា និងអ្នកសុំទានដែរ ដែលធ្វើឲ្យជនអនាថា និងអ្នកសុំទានទាំងនោះមានការកើនឡើងជាងមុន ដូច្នេះដើម្បីដោះស្រាយនូវបញ្ហានេះ រដ្ឋបាល ខេត្តសៀមរាប មានគម្រោងបង្កើតមណ្ឌលសំចតសម្រាប់ជនអនាថា និងអ្នកសុំទាននៅតាមទីប្រជុំជន និង ទីសាធារណៈក្នុងក្រុងសៀមរាប សម្រាប់ពួកគាត់មានកន្លែងស្នាក់នៅកុំឲ្យដើរសុំទានទៀតនោះ ដែលគម្រោងទីតាំងទី១ គឺស្ថិតនៅមណ្ឌលអារុណរះ ក្នុងភូមិវិហារចិន សង្កាត់ស្វាយដង្គំ ក្រុងសៀមរាប និង គម្រោងទីតាំងទី២ គឺស្ថិតនៅក្នុងស្រុកវ៉ារិន ។
លោក នាក់ ណេរ៉ុន មានប្រសាសន៍បន្ថែមថា រយ:កាលកន្លង មក អាជ្ញាធរខេត្ត បានសហការជាមួយអង្គការកល្យាណមិត្ត បញ្ជូនកុមារអនាថាចំនួន ១៥នាក់ ក្នុងនោះកុមារីចំនួន០៦នាក់ ទៅស្នាក់នៅក្នុងមណ្ឌលសីលាអង្គរ ដើម្បីទទួលបានការស្នាក់នៅរយៈពេលខ្លី និងសមាហរណកម្មទៅសហគមន៍វិញ , អង្គការស្នាដៃខ្មែរ ទទួលកុមារអនាថាចំនួន ០៤នាក់ ក្នុងនោះកុមារីចំនួន០១នាក់ សម្រាប់ការស្នាក់នៅបន្តការរៀនសូត្រ និងសេវាបណ្តុះបណ្តាលវិជ្ជាជីវៈ និង អង្គការសកម្មភាពដើម្បីកុមារ បានបញ្ជូនកុមារអនាថាចំនួន ០១នាក់ ជាកុមារី ទៅស្នាក់នៅក្នុងមណ្ឌល ខេខេអឺវីសកម្មភាពដើម្បីកុមារ ដើម្បីទទួលបានការស្នាក់នៅ និងបន្តការសិក្សារៀនសូត្រ ។
លោក នាក់ ណេរ៉ុន មានប្រសាសន៍បន្ថែមទៀតថា កន្លងមក យើងបានសហការជាមួយអាជ្ញាធរក្រុងសៀមរាប ប៉ុស្តិ៍នគរបាលរដ្ឋបាលសង្កាត់ស្រង៉ែ និង ប៉ុស្តិ៍នគរបាលរដ្ឋបាលសង្កាត់ចុងឃ្នៀស ចុះស្រង់ស្ថិតិចំពោះជនអនាថា និង អ្នកសុំទានបានចំនួន ៥១នាក់ ក្នុងនោះស្រីចំនួន ៣០នាក់ ព្រមទាំងបានធ្វើការអប់រំណែនាំឲ្យបញ្ឈប់ការសុំទាននៅតាមទីប្រជុំជន និង ទីសាធារណៈក្នុងខេត្ត ដូច្នេះសម្រាប់ទិសដៅអនុវត្តបន្ត សូមឲ្យគ្រប់ភាគីពាក់ព័ន្ធទាំងអស់ក្នុងខេត្ត ត្រូវបង្កើនសកម្មភាពប្រកបដោយប្រសិទ្ធភាពតាមតួនាទី និង ភារកិច្ចរបស់ខ្លួនដោយការទទួលខុសត្រូវ ដើម្បីរួមគ្នាលុបបំបាត់ជនអនាថា និងអ្នកសុំទាននៅក្នុងក្រុងសៀមរាប ព្រោះវាក៏បានធ្វើឲ្យប៉ះពាល់ដល់កិត្តិយសរបស់ជាតិយើងដែរ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
