នៅរសៀលថ្ងៃទី២៧ ខែឧសភា ឆ្នាំ២០២០ម្សិលមិញនេះ អាជ្ញាធរខេត្តសៀមរាបដឹកនាំដោយលោក ពិន ប្រាក អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្ត សហការជាមួយអង្គការ IOM និងមន្ទីរ អង្គភាពចុះជួយស្រុក បានអញ្ជើញចុះសួរសុខទុក្ខ និងចែកអំណោយដល់ប្រជាពលរដ្ឋដែលវិលត្រឡប់ពីក្រៅប្រទេស ហើយត្រូវបានដាក់នៅដាច់ដោយឡែករយៈពេល ១៤ ថ្ងៃ ដែលមានប្រជាពលរដ្ឋសរុបចំនួន ២០នាក់ ស្រី៨នាក់ ដែលកំពុងស្នាក់នៅក្នុងសាលាបឋមសិក្សារវៀងថ្មី ស្ថិតក្នុងឃុំស្រែខ្វាវ ស្រុកអង្គរជុំ ខេត្តសៀមរាប ។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្ត ក៏បានធ្វើការកោតសរសើរចំពោះបងប្អូន ដែលបានចូលមកក្នុងប្រទេសវិញ នាពេលនេះដោយសហការជាមួយអាជ្ញាធរមូលដ្ឋាន ដើម្បីដាក់ខ្លួនដោយឡែករយៈពេល១៤ថ្ងៃ ក្នុងការបង្ការការពារជំងឺកូវីដ១៩ កុំមានការឆ្លងទៅអ្នកដទៃ និងសហគមន៍ ។
ជាមួយគ្នានេះដែរ លោក ពិន ប្រាកដ ក៏បានផ្តាំផ្ញើដល់បងប្អូនទាំងអស់ ត្រូវតែសម្អាតអនាម័យ និងថែរក្សាសុខភាពរបស់ខ្លួនឱ្យស្របតាមការណែនាំរបស់ក្រសួងសុខាភិបាល ទោះបីស្ថានភាពប្រទេសយើងមានការថមថយនូវជំងឺកូវីដក៏ដោយ យើងត្រូវតែបង្ការការ ទប់ស្កាត់កុំឱ្យរលកទី២កើតឡើងនៅក្នុងប្រទេសយើងទៀត ។
ព័ត៌មានជាតិ ថ្មីៗ
សូមជម្រាបថា អំណោយដែលបានចែកជូនមានសម្ភារចំនួន ១០៣ កញ្ចប់ រួមមាន ថ្នាំដុសធ្មេញ ច្រាស់ដុសធ្មេញ សាប៊ូលុច្ស សាប៊ូកក់សក់Clear សាប៊ូបោកខោអាវ Lix Lemon កន្ទេល មុង ភួយ ខ្នើយ អាវយឺត ខោខ្លី កន្សែងពោះគោ និងស្បែកជើងផ្ទាត់ទាំង២០ នាក់ និងតាមទីតាំងចាត្តាឡីស័កផ្សេងទៀតក្នុងស្រុកផងដែរ ៕
អត្ថបទនិងរូបភាព៖រដ្ឋបាលខេត្តសៀមរាប
