កម្លាំងនគរបាលវរ:សេនាតូចលេខ៨៩១ នៅចំណុចខេត្តបន្ទាយមានជ័យ នាព្រឹកថ្ងៃទី២៧ ខែឧសភា ឆ្នាំ២០២០នេះ បានឃាត់ខ្លួនពលរដ្ឋ ចំនួន ៦នាក់ដែលបម្រុងធ្វើដំណើរឆ្លងដែនខុសច្បាប់ទៅរកការងារធ្វើនៅប្រទេសថៃ ។ តាមការសាកសួរប្រជាពលរដ្ឋទាំងអស់នោះ ពួកគាត់ឆ្លើយថា គោលបំណងគឺចង់ចូលទៅធ្វើការនៅខេត្តឈុនបុរី ប្រទេសថៃ ដោយមានថៅកែមករង់ចាំទទួលនៅផ្សាររោងគ្លឿ (ប្រទេសថៃ) តាមរយ:ម៉ូតូឌុប ដោយយកលុយក្នុងម្នាក់ៗ ២,៥០០បាត។
ក្រោយឃាត់ខ្លួនកម្លាំងសមត្ថកិច្ច ក៏បានធ្វើការណែនាំអប់រំ កុំឱ្យលួចឆ្លងដែនខុសច្បាប់ និងកុំជឿតាមមេខ្យល់ ព្រមទាំងបានធ្វើកិច្ចសន្យា នៅចំពោះមុខសមត្ថកិច្ចប៉ុស្តិ៍ការពារព្រំដែនក្បាលស្ពាន និងផ្តិតមេដៃទុកជាវត្ថុតាង ចំពោះមុខច្បាប់ជាធរមាន ហើយបានអនុញ្ញាតឲ្យវិលត្រលប់ទៅលំនៅដ្ឋានវិញ ។
សូមជម្រាបថា កាលពីពេលថ្មីៗកន្លងទៅ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានចេញបទបញ្ជាដល់សមត្ថកិច្ចតាមបន្ទាត់ព្រំដែនទាំងអស់ ជាពិសេសរដ្ឋបាលដែនដី កម្លាំងកងយោធពលខេមរភូមិន្ទ កងកម្លាំងនគរបាលជាតិ និងមន្រ្តីសមត្ថកិច្ចពាក់ព័ន្ធផ្សេងទៀត រួមសហការគ្នាទប់ស្កាត់ ប្រជាពលរដ្ឋលួចឆ្លងដែនចូលប្រទេសថៃ និងចាប់មេខ្យល់យកមកផ្តន្ទាទោសតាមច្បាប់ ។ ជាមួយគ្នានោះដែរ ស្ថិតក្នុងស្ថានភាពបច្ចុប្បន្ននេះប្រទេសកម្ពុជា និងប្រទេសថៃ ក៏កំពុងអនុវត្តបទបញ្ជាបិទច្រកព្រំដែនរៀងៗខ្លួន ក្នុងការទប់ស្កាត់ការរីករាលដាលជំងឺកូវីដ -១៩ ៕
ប្រភព: គណ:កម្មាធិការប្រយុទ្ធប្រឆាំងជួញដូរមនុស្សសៀមរាប
កែសម្រួលដោយ ៖លីវ សុខុន
