កាលពីរសៀលថ្ងៃទី ២៦ ខែ ឧសភា ឆ្នាំ២០២០ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមខេត្តសៀមរាប រួមនិងក្រុមការងារ បានចុះសួរសុខទុក្ខ និងនាំយកអំណោយចែកជូន ជនរងគ្រោះដោយខ្យល់កន្ត្រាក់ ចំនួន ៤៣គ្រួសារ មកពី៣ភូមិ ក្នុងសង្កាត់ជ្រាវ ក្រុងសៀមរាប។
ផ្ទះប្រជាពលរដ្ឋទាំង ៤៣គ្រួសារនេះ ត្រូវបានរងគ្រោះដោយខ្យល់កន្ត្រាក់ កាលពីថ្ងៃទី២២ ខែ ឧសភា ឆ្នាំ២០២០ ក្នុងនោះ រលំផ្ទះ ០៨ខ្នង និងរបើកដំបូលធ្ងន់ធ្ងរ ៣៥ខ្នង។
មានប្រសាសន៍សំណេះសំណាលនាឱកាសនោះ តាងនាមឯកឧត្តម ទៀ សីហា ប្រធានគណៈកម្មាធិការសាខា លោកជំទាវ ទាង អេង ទៀ សីហា បានសម្ដែងនូវការសោកស្ដាយ ព្រមទាំងបាននាំយកនូវការសួរសុខទុក្ខពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចតែងតែយកចិត្តទុកដាក់ខ្ពស់ ចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
ព័ត៌មានជាតិ ថ្មីៗ
ទន្ទឹមនោះ លោកជំទាវ ក៏បានណែនាំដល់ប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ ចំពោះបាតុភូតផ្គររន្ទះ ខណៈរដូវបង្កបង្កើនផលនារដូវរស្សា ជិតឈានចូលមកដល់។ ក្នុងនោះដែរ យើងទាំងអស់គ្នាត្រូវ បន្តប្រយុទ្ធប្រឆាំង បង្ការ ទប់ស្កាត់ចំពោះរលកទី២ នៃជម្ងឺឆ្លងកូវីដ១៩ ដោយគោរពតាមការណែនាំរបស់រាជរដ្ឋាភិបាល ក្រសួងសុខាភិបាល។
អំណោយមនុស្សធម៌ ដែលបានចែកជូនគ្រួសាររងគ្រោះទាំង៤៣គ្រួសារ នាពេលនោះ រួមមាន អង្ករ ៣០គីឡូក្រាម , មី១កេស ,ត្រីខ១យូរ , កន្ទេល ១ , ឃីត១កញ្ចប់ , អាវយឺត២ , សម្រាប់គ្រួសារផ្ទះរលំ ទទួលបានស័ង្កសី ១៦សន្លឹក ថវិកា ២០ម៉ឺនរៀល និង គ្រួសារផ្ទះរបើកដំបូល ស័ង្កសី ១០សន្លឹក និងថវិកា ១០ម៉ឺនរៀលផងដែរ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
