នៅរសៀលថ្ងៃទី២៨ ខែឧសភា ឆ្នាំ២០២០ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណ: និងថ្នាក់ដឹកនាំក្រសួង ដោយមានការចូលរួមពី ឯកឧត្តម អ៊ាន ឃុន សមាជិកក្រុមប្រឹក្សាខេត្ត លោក ពិន ប្រាកដ អភិបាលរង ខេត្តសៀមរាប ព្រមទាំងប្រធានមន្ទីរសុខាភិបាលខេត្ត និងមន្ទីរមុខងារសាធារណៈខេត្ត បានអញ្ជើញចុះជួបសំណេះសំណាល ជាមួយថ្នាក់ដឹកនាំ គ្រូពេទ្យ និងបុគ្គលិកពេទ្យនៃមន្ទីរពេទ្យបង្អែកខេត្ត សរុបចំនួនជាង ៤០នាក់ ។
ក្នុងមតិស្វាគមន៍ លោក ពិន ប្រាកដ អភិបាលរងខេត្ត មានប្រសាសន៍ថា៖ ក្នុងការប្រយុទ្ធប្រឆាំងនឹងជម្ងឺកូវីដ១៩ រដ្ឋបាលខេត្តសៀមរាប បានចាត់វិធានការជាច្រើនតាមសេចក្តីណែនាំរបស់រាជរដ្ឋាភិបាល ក្រសួងសុខាភិបាល ដោយបានសហការជាមួយ មន្ទីរ អង្គភាពនានាជុំវិញខេត្ត រដ្ឋបាលក្រុង ស្រុក ឃុំ សង្កាត់ ជាពិសេសមន្ទីរសុខាភិបាលខេត្ត អនុវត្តវិធានការបង្ការ ទប់ស្កាត់ និងអប់រំប្រជាពលរដ្ឋជាប្រចាំក្នុងភូមិសាស្រ្តរបស់ខ្លួនទទួលបាលលទ្ធផលល្អប្រសើរ។ ក្នុងដំណើការនៃការបង្ការ និងទប់ស្កាត់ការរីករាលដាលជម្ងឺ កូវីដ១៩ លោក លោកស្រី ដែលជាវេជ្ជបណ្ឌិត និងបុគ្កលិកសុខាភិបាលទាំងអស់ គឺជាមន្ត្រីជួរមុខដែលប្រឈមនឹងបញ្ហាឆ្លងជំងឺខ្លាំងបំផុត ប៉ុន្តែជានិច្ចកាល លោក លោកស្រីបានបំពេញភារកិច្ចរបស់ខ្លួនយ៉ាងល្អ ប្រកបដោប្រសិទ្ធភាព និងការទទួលខុសត្រូវខ្ពស់។
ក្នុងពិធីជួបសំណេះសំណាលនោះ ឯកឧត្ដម ព្រុំ សុខា បានថ្លែងការកោតសរសើរដល់គ្រូពេទ្យ និងបុគ្គលិកពេទ្យនៃមន្ទីរពេទ្យបង្អែកខេត្តសៀមរាប ដែលកន្លងបានខិតខំប្រឹងប្រែងក្នុងការបំពេញភារកិច្ចប្រកបដោយវិជ្ជាជីវៈ ដើម្បីថែទាំសុខភាពសាធារណ: និងការពារអាយុជីវិតរបស់ប្រជាពលរដ្ឋ ក្នុងស្ថានភាពនៃការរីករាលដាលនៃមេរោគកូវីដ-១៩ ។ ស្ថិតក្នុងស្ថានភាពមានហានិភ័យនោះបុគ្គលិកសុខាភិបាលគឺជាភ្ញាក់ងារជួរមុខក្នុងការការពារអាយុជីវិតប្រជាជនយើង ស្របតាមការដឹកនាំរបស់គណៈកម្មការជាតិប្រយុទ្ធប្រឆាំងនឹងជម្ងឺកូវីដ-១៩ ដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ព័ត៌មានជាតិ ថ្មីៗ
ឯកឧត្តមរដ្ឋមន្រ្តីក៏បានលើកឡើងពីស្ថានភាពចុងក្រោយ នៃការវិវត្តន៍ជម្ងឺកូវីដ-១៩ និងផលវិបាកនៃជម្ងឺកូវីដ-១៩ ត្រូវរួមគ្នាប្រយុទ្ធប្រឆាំងនឹងជំងឺនេះ ដោយចាំបាច់ទាមទារការចូលរួមទាំងអស់គ្នា ពីគ្រប់ភាគី ។ ភាពជោគជ័យជាបន្តបន្ទាប់នៃការមើលថែ ព្យាបាលអ្នកជំងឺឆ្លងដោយវីរុសកូវីដ១៩ នាពេលកន្លងមក មិនមែនតែមន្ត្រីសុខាភិបាលតែម្ខាងនោះទេ ពោលគឺត្រូវការកិច្ចសហការ សាមគ្គីគ្នាយ៉ាងសស្រាក់សស្រាំទើបទទួលបានលទ្ឋផលល្អ។
ឯកឧត្តម រដ្ឋមន្ត្រី បានក្រើនរំលឹកថា ដរាបណាដែលពិភពលោកពុំទាន់រកឃើញវ៉ាក់សាំងការពារ ឬពុំទាន់មានឱសថព្យាបាលជម្ងឺឆ្លងកូវីត-១៩ទេនោះ វិធានការកាពារ និងត្រូវបន្តសកម្មភាពដោយគ្មានកាលកំណត់ឡើយ។
ក្នុងឱកាសនោះដែរ ឯកឧត្តមរដ្ឋមន្រ្តីក៏បានផ្តល់ថវិកាចំនួន ៦ លានរៀល និងសម្ភារៈមួយចំនួនទៀតដូចជា: ម៉ាស៥០ប្រអប់ អាល់កុល៩០លីត្រ និង ទឹកសាប៊ូលាងដៃ៩០លីត្រ ជូនដល់មន្ទីរពេទ្យបង្អែកខេត្ត ៕
អត្ថបទ និងរូបភាព: លោក យូ វង្ស
