នាព្រឹកថ្ងៃទី ២៩ ខែ ឧសភា ឆ្នាំ២០២០នេះ លោក ង៉ាន់ ភិរុណ អភិបាលរងខេត្ត តំណាង ឯកឧត្តម ទៀ សីហា អភិបាលខេត្តសៀមរាប បានអនុញ្ញាតឲ្យអគ្គនាយកក្រុមហ៊ុន អ៊ិន ឃ្យូ បេធ័រ ខនភ្លូអិនស៍ របស់ប្រទេសបារាំង ចូលជួបពិភាក្សា ការងារវិនិយោគ លើវិស័យទេសចរណ៍ ក្នុងគម្រោងរៀបចំធ្វើទីកន្លែងសួនកម្សាន្ត នៅខេត្តសៀមរាប ។
លោកអភិបាលរងខេត្ត លើកឡើងថា សក្តានុពលរបស់ខេត្តប្រវត្តិសាស្ត្រមួយនេះ ពឹងផ្អែកលើវិស័យកសិកម្ម និង ទេសចរណ៍ ដែលមានប្រជាពលរដ្ឋប្រមាណ ៨២ភាគរយជាប្រជាកសិករ ។ ក្នុងនោះដែរលោកអភិបាលរងខេត្ត ក៏បានគូសបញ្ជាក់ ដល់លោកអគ្គនាយក ក្រុមហ៊ុនឲ្យដឹងផងដែរថា ក្នុងវិស័យទេសចរណ៍នាឆ្នាំ២០១៨-២០១៩កន្លងទៅ ចំនួនភ្ញៀវទេសចរណ៍ជាតិ អន្តរជាតិ មានការកើនឡើង ទៅតាមការព្យាករណ៍របស់ក្រសួងទេសចរណ៍ ។ តែក្នុងរយៈពេល៤ខែដើមឆ្នាំ២០២០ ដោយនៅលើពិភពលោក ក៏ដូចនៅកម្ពុជាជួបនូវវិបត្តិជម្ងឺឆ្លងកូវីដ១៩ សំខាន់នៅខេត្តសៀមរាប បានធ្វើឲ្យភ្ញៀវទេចរជាតិ និង អន្តរជាតិមានការធ្លាក់ចុះយ៉ាងគំហុកទៀតផង ។
លោកអភិបាលរងខេត្ត ក៏បានបញ្ជាក់ផងដែរ អំពីច្បាប់នៃការវិយោគនៅកម្ពុជា ដោយបានកំណត់ថា គម្រោងវិនិយោគក្រោម២លានដុល្លា គឺសម្រេចនៅថ្នាក់ខេត្ត តែបើគម្រោងនោះ មានទំហំទឹកប្រាក់លើសពី២លានដុល្លា គឺសម្រេចនៅថ្នាក់ជាតិ ។
ព័ត៌មានជាតិ ថ្មីៗ
លោកអគ្គនាយកក្រុមហ៊ុន លើកឡើងថា
ជំនួបពិភាក្សានេះ គឺដើមី្បធ្វើកិច្ចសហការជាមួយអាជ្ញាធរខេត្ត ក្នុងកិច្ចដំណើរការសិក្សា និង កំណត់ទីតាំងមួយច្បាស់លាស់ ចៀសវាងប៉ះពាល់ដល់ប្រជាពលរដ្ឋ និង សម្បត្តិសាធារណៈ។
លោកអគ្គនាយកក្រុមហ៊ុនបង្ហាញថា គម្រោងវិនិយោគរៀបចំសួនកម្សាន្តនេះ កំពុងស្ថិតក្នុងការសិក្សារយ:ពេល៦ខែ និង ការរៀបចំប្លង់រយៈពេល៨ខែ។ គម្រោងនេះ អាចនឹងប្រើប្រាស់រយៈពេល៣ឆ្នាំក្នុងការស្ថាបនាសាងសង់ ដែលមានការរៀបចំទីកន្លែងជិះទូកកម្សាន្ត ទីផ្សារ និង កន្លែងសម្តែងរបាំ និង រោងមហោស្រព រួមទាំងកន្លែងកម្សាន្តផេ្សងៗទៀត ដោយមានការប្រើប្រាស់ កម្មករ បុគ្គលិក និង សិល្បៈករ ប្រមាណ ២ពាន់នាក់ ដែលនឹងជួយបង្កើតការងារ ជូនដល់ប្រជាពលរដ្ឋក្នុងស្រុក ។
