ថ្ងៃទី៣១ ខែឧសភា ឆ្នាំ២០២០ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជួបសំណេះសំណាលជាមួយមន្រ្តីក្រោមឱវាទនៅមន្ទីរពាណិជ្ជកម្មខេត្តសៀមរាប និងផ្ដល់អនុសាសន៍លើការងារអាទិភាពមួយចំនួន ដូចជា ការលើកកម្ពស់ផលិតកម្ម ការធានាគុណភាពនៃផលិតផលឲ្យស្របតាមស្ដង់ដាររបស់ទីផ្សារ ការការពារកម្មសិទ្ធិបញ្ញា ការទប់ស្កាត់ផលិតផលក្លែងបន្លំ ការពង្រឹងយន្ដការត្រួតពិនិត្យគុណភាពទំនិញ ដើម្បីធានាឲ្យការនាំចេញ និងការគ្រប់គ្រងការធ្វើពាណិជ្ជកម្មតាមប្រព័ន្ធអនឡាញ។
ឯកឧត្តមរដ្ឋមន្រ្តី លើកឡើងថា មន្ទីរពាណិជ្ជកម្មមានតួនាទី និងភារកិច្ចសំខាន់ណាស់នៅថ្នាក់ក្រោមជាតិ និងសម្របសម្រួលតាមសកម្មភាពរបស់ក្រសួង។ ក្នុងនោះ មន្ទីរពាណិជ្ជកម្ម និងមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប) ដែលពីមុខហៅថា កាំកុងត្រូលនោះ ត្រូវចុះត្រួតពិនិត្យគុណភាពទំនិញ និងសេវាកម្មនានា ដើម្បីពង្រឹងការអនុវត្តលិខិតបទដ្ឋានគតិយុត្តដែលមានថ្មីៗ ទាក់ទងនឹងក្រសួងពាណិជ្ជកម្ម។
ជាមួយនោះ ឯកឧត្តមរដ្ឋមន្រ្តី ក៏បានលើកពី ច្បាប់ស្ដីពី ពាណិជ្ជកម្មតាមប្រព័ន្ធអេឡិចត្រូនិក (E-Commerce-Law) ដែលបានអនុម័តដោយរដ្ឋសភាកាលពីថ្ងៃទី០៨ ខែតុលា ឆ្នាំ២០១៩ និងពិនិត្យចប់សព្វគ្រប់ទាំងស្រុងនៅថ្ងៃទី១៨ ខែតុលា ឆ្នាំ២០១៩។ ច្បាប់នេះដែរ មានគោលបំណង ធានាដល់ការគ្រប់គ្រងពាណិជ្ជកម្មតាមប្រព័ន្ធអេឡិចត្រនិច ក៏ដូចជាតាមប្រព័ន្ធអ៊ិនធើណិត ទាំងនៅក្នុងប្រទេស និងក្រៅប្រទេស ចៀសវាងការបោកប្រាស់នានាជាដើម ដែលបានកើតមាននាពេលកន្លងមក។
ព័ត៌មានជាតិ ថ្មីៗ
ឯកឧត្តមរដ្ឋមន្រ្តី បញ្ជាក់ថា បច្ចុប្បន្ន អគ្គនាយកដ្ឋានសេវាពាណិជ្ជកម្ម កំពុងរៀបចំនីតិវិធី ដើម្បីអនុវត្តន៍ច្បាប់នេះប្រកបដោយប្រសិទ្ធភាព។
គួរជម្រាបថា តាមរបាយការណ៍របស់មន្ទីរពាណិជ្ជកម្មខេត្តសៀមរាប ក្នុងខែឧសភានេះ មានក្រុមហ៊ុន សហគ្រាសមកចុះបញ្ជីពាណិជ្ជកម្មបានចំនួនសរុប ៤៨៧ច្បាប់ ក្នុងនោះមានក្រុមហ៊ុនចំនួន ១០៣ច្បាប់ សាខាក្រុមហ៊ុន ២១៧ច្បាប់ និង សហគ្រាសចំនួន៣៦៧ច្បាប់ ព្រមទាំងបានចេញលិខិតអនុញ្ញាតឲ្យប្រកបអាជីវកម្ម សេវាកម្ម ពាណិជ្ជកម្ម បានចំនួន២៧២ច្បាប់។ ទន្ទឹមនោះ មន្ទីរពាណិជ្ចកម្មខេត្ត កំពុងមានការពិភាក្សាជាមួយអាជ្ញាធរស្រុកពួក និងស្រុកជីក្រែង ក្នុងការចងក្រង និមិត្តសញ្ញា អំបុកខ្មែរ និងការងារដាច់ដោយឡែកមួយទៀត គឺកំពុងធ្វើការសម្របសម្រួលជាមួយភ្នាក់ងារអភិវឌ្ឍន៍បារាំង (AFD) ក្នុងការវិនិយោគ កែច្នៃសំណល់ភក់លូ ដើម្បីផលិតជាជីសរីរាង្គ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
