រយៈពេល១ខែដំបូង ចាប់ពីថ្ងៃទី០១ ដល់ ថ្ងៃទី៣១ ខែឧសភា ឆ្នាំ២០២០ នៃការរឹតបន្តឹងការអនុវត្តច្បាប់ចរាចរណ៍ នៅទូទាំងប្រទេស កម្លាំងនគរបាលចរាចរណ៍ ផាកពិន័យយានយន្តបានទឹកប្រាក់ប្រមាណ ៣ពាន់លានរៀល នេះបើប្រសាសន៍ អគ្គស្នងការរងនគរបាលជាតិ ឯកឧត្តម នាយកឧត្តមសេនីយ៍ ហ៊ឹម យ៉ាន ក្នុងសន្និសីទសារព័ត៌មានស្តីពីលទ្ធផល នៃការរឹតបន្ដឹងការអនុវត្តច្បាប់ ស្ដីពីចរាចរណ៍ផ្លូវគោក តាមស្មារតីអនុក្រឹត្យលេខ ៣៩។
ឯកឧត្តម នាយឧត្តមសេនីយ៍ ហ៊ឹម យ៉ាន បញ្ជាក់ថា ជាមួយនឹងទំហំទឹកប្រាក់ផាកពិន័យនេះ អត្រាគ្រោះថ្នាក់ចរាចរណ៍នៅក្នុងរយៈពេលមួយខែកន្លងមកនេះ មានការធ្លាក់ចុះ។ លទ្ធផលនេះ បានបង្ហាញពីការគោលបំណងរបស់រាជរដ្ឋាភិបាល ក្នុងការការពារអាយុជីវិត និងទ្រព្យសម្បត្តិរបស់ប្រជាពលរដ្ឋនៅតាមដងផ្លូវ។ ទោះជាយ៉ាងណាក៏ដោយ ប្រជាពលរដ្ឋខ្លះនៅតែបន្តមិនគោរពច្បាប់ ជាពិសេសគឺការមិនពាក់មួកសុវត្ថិភាព។
ជាការអំពាវនាវ ឯកឧត្តម នាយឧត្តមសេនីយ៍ ហ៊ឹម យ៉ាន បានស្នើដល់អ្នកប្រើប្រាស់ផ្លូវគ្រប់រូប ត្រូវបន្តពង្រឹងស្មារតីប្រុងប្រយ័ត្នក្នុងពេលបើកបរ និងត្រូវអនុវត្តន៍ឲ្យបានខ្ជាប់ខ្លួនតាមច្បាប់ស្ដីពីចរាចរណ៍ផ្លូវគោក ដើម្បីរួមចំណែកលើកស្ទួយកិត្តិយស និងសេចក្ដីថ្លៃថ្នូររបស់សង្គមជាតិយើង ហើយក៏ស្នើដល់អនុគណៈកម្មការសុវត្ថិភាពចរាចរណ៍ផ្លូវគោករាជធានី-ខេត្ត បន្តការរឹតបន្តឹង និងការផ្សព្វផ្សាយអប់រំច្បាប់ស្ដីពីចរាចរណ៍ផ្លូវគោកឱ្យមានប្រសិទ្ធភាព និងនិរន្តរភាព។
គួរបញ្ជាក់ថា រយៈពេល០១ខែ គិតចាប់ពីថ្ងៃទី០១ ដល់ថ្ងៃទី៣១ ខែឧសភា ឆ្នាំ២០២០ សមត្ថកិច្ចនគរបាលចរាចរណ៍ផ្លូវគោក បានធ្វើការត្រួតពិនិត្យ និងផាកពិន័យចំពោះយានយន្ត ល្មើសច្បាប់ស្ដីពីចរាចរណ៍ផ្លូវគោកសរុបចំនួន ៤៤,៧៦៥ករណី ក្នុងនោះមានទោចក្រយានយន្ត និងត្រីចក្រយានយន្ត ចំនួន៣២,៧២៦ករណី ស្មើនឹង៧៣ភាគរយ និងរថយន្តគ្រប់ប្រភេទចំនួន១២,០៣៩ករណី ស្មើនឹង២៧ភាគរយ។
បើប្រៀបធៀបរយៈពេលដូចគ្នានៃខែឧសភា ឆ្នាំ២០១៩ ឃើញថា ស្ថានភាពចរាចរណ៍មាន ភាពល្អប្រសើរជាងមុន ដោយគ្រោះថ្នាក់ចរាចរណ៍បានថយចុះចំនួន ១៣០លើក ស្មើ៣៧% (២១៨/៣៤៨ លើក) អ្នកស្លាប់ថយចុះ ៤២នាក់ ស្មើ២៧ភាគរយ (១១៣/១៥៥នាក់) អ្នករបួសថយចុះ ១៦២នាក់ ស្មើ៣២ភារយ (៣៤២/៥០៤នាក់)។
អត្ថបទ ៖ អគ្គស្នងការនគរបាលជាតិ
រូបភាព៖ មន្ទីរព័ត៌មាន
