ព្រឹកថ្ងៃទី ០២ ខែ មិថុនា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប បានអនុញ្ញាតឲ្យប្រតិភូសមាគមសហគ្រិនវ័យក្មេងកម្ពុជា សាខាខេត្តសៀមរាប ចូលជួបពិភាក្សា ពាក់ព័ន្ធនឹងការងារស្តារឡើងវិញ នូវវិស័យទេសចរណ៍ ខណៈពិភពលោក នៅបន្តជួបវិបត្តិជម្ងឺកូវិដ១៩ ។
លោក ឡាយ គីមសួរ ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប បានលើកឡើងថា គោលបំណងនៃជំនួបពិភាក្សានាពេលនេះ គឺដើម្បីនូវអនុសាសន៍ និង ការណែនាំមួយចំនួនពីឯកឧត្តមអភិបាលខេត្ត ក្នុងពេលដែលប្រទេសកម្ពុជា បានធូរស្រាលពីបញ្ហាវិបត្តិជម្ងឺកូវីដ១៩ ដើមី្បធ្វើការស្តារឡើងវិញនូវសេវាកម្មទេសចរណ៍ក្នុងខេត្ត។
ទន្ទឹមនោះ សមាជិកនៃសមាគមសហគ្រិនវ័យក្មេងកម្ពុជា សាខាខេត្តសៀមរាប ក៏បានសំណូមពរដល់អាជ្ញាធរខេត្ត ជំរុញវិស័យកសិ-ទេសចរណ៍នៅតាមបណ្តាស្រុក បង្កើនសកម្មភាពទេសចរណ៍ដោយការជិះកង់ ការអភិវឌ្ឍន៍ដងស្ទឹងសៀមរាប ឲ្យក្លាយជាទីកន្លែងជិះទូកកម្សាន្ត ការរៀបចំភ្លើងចម្រុះពណ៌ឡើងវិញនៅតំបន់ផាប់ស្ទ្រីត និង ការងារសន្តិសុខ សណ្តាប់ធ្នាប់ សុវត្ថិភាពក្នុងតំបន់ទេសចរណ៍ពេលរាត្រីដ៏មានប្រជាប្រិយភាពមួយនេះ។ ក្នុងនោះដែរ ក៏មានការសំណូមពរ អំពីការស្នើសុំបន្ធូរបន្ថយនូវការបង់ប្រាក់ថ្លៃអគ្គិសនី និង ការប្រាក់របស់ធនាគារ ដើម្បីជួយសម្រួលឲ្យអាជីវកម្មពាក់ព័ន្ធនឹងទេសចរណ៍ក្នុងខេត្តអាចមានលទ្ធភាពបន្តក្នុងអំឡុងពេលនៃវិបត្តិជម្ងឺកូវីដ១៩នេះ។
ព័ត៌មានជាតិ ថ្មីៗ
ឯកឧត្តមអភិបាលខេត្ត បានបង្ហាញនូវការការគាំទ្រ ចំពោះការរួមគ្នាស្តារឡើងវិញក្នុងវិស័យទេសចរណ៍ក្នុងខេត្តនេះ ដោយឯកឧត្តមបញ្ជាក់ថា សំណូមពរទាំងអស់នេះ បានស្ថិតគម្រោងរបស់រដ្ឋបាលខេត្ត និងបានបញ្ជូនទៅក្រសួងរួចរាល់ហើយ។
ឯកឧត្តមអភិបាលខេត្ត បញ្ជាក់បន្ថែមថា អំឡុងពេលនៃវិបត្តិជម្ងឺកូវីដ១៩ អាជ្ញាធរខេត្ត បានកំពុងធ្វើការស្តារឡើងវិញ នូវហេដ្ឋរចនាសម្ព័ន្ធផ្លូវថ្នល់ក្នុងក្រុង និង ជនបទ ជាពិសេសការជំរុញដល់អាជ្ញាធរស្រុក បង្កើតនូវតំបន់ទេសចរណ៍ធម្មជាតិក្នុងសហគមន៍ និងធ្វើការផ្សព្វផ្សាយតំបន់ទេសចរណ៍ទាំងនោះ ដើម្បីឲ្យសាធារណជនបានស្គាល់។ លើសពីនោះ
អាជ្ញាធរខេត្ត និងអាជ្ញាធរជាតិអប្សរា ក៏បាននិងកំពុងបង្កើតផ្លូវដាច់ដោយឡែកសម្រាប់អ្នកជិះកង់ទេសចរណ៍ នៅក្នុងតំបន់តំបន់រមណីយដ្ឋានអង្គរផងដែរ។ ចំពោះ ការស្នើសុំបន្ធូរបន្ថយនូវការបង់ប្រាក់ថ្លៃអគ្គិសនី និង ការប្រាក់របស់ធនាគារ របស់សមាគមសហគ្រិនវ័យក្មេងកម្ពុជា ឯកឧត្តមអភិបាលខេត្ត នឹងយកទៅធ្វើការពិភាក្សាបន្តជាមួយ សាម៉ីក្រសួងពាក់ព័ន្ធ ៕
អត្ថបទ និងរូបភាព៖ មុី សុខារិទ្ធ
កែសម្រួល៖ សេង ផល្លី
