រយៈពេល៤ខែដើមឆ្នាំ២០២០ ចាប់ពីខែមករា ដល់ខែមេសា ឆ្នាំ២០២០ ភ្ញៀវទេសចរអន្តរជាតិ មកទស្សនាខេត្តសៀមរាប មានការថយចុះរហូតដល់ជាង៦០ភាគរយ ឬស្មើនឹង ជាង៣៨ម៉ឹននាក់ បើធៀបនឹងរយៈពេលដូចគ្នា នៅឆ្នាំ២០១៩ ខេត្តសៀមរាបទទួលបានភ្ញៀវទេសចរអន្តរជាតិ ជាង៩៧ម៉ឹននាក់ នេះបើតាមការឲ្យដឹងពីលោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប កាលពីពេលថ្មីៗនេះ។
លោកប្រធានមន្ទីរទេសចរណ៍ខេត្ត បញ្ជាក់ថា រយៈពេល៤ខែដើមឆ្នាំនេះ ការរីករាលដាលនៃជំងឺកូវីដ១៩ បានធ្វើឲ្យពិភពលោកមានការចលាចលយ៉ាងខ្លាំង ក្នុងនោះប្រទេសកម្ពុជា ក៏មានករណីនាំចូលនៃជំងឺកូវីដ១៩នេះ ពីជនបរទេសផងដែរ។ ក្នុងនោះ ការធ្វើដំណើរ តាមផ្លូវអាកាសមកកាន់ខេត្តសៀមរាប មានការថយចុះ ជាង៧៥ភាគរយ ការធ្វើដំណើរ តាមផ្លូវគោក ថយចុះជាង៤០ភាគរយ និង ការធ្វើដំណើរ តាមផ្លូវទឹក ថយចុះជាង៣១ភាគរយ។
លោកប្រធានមន្ទីរ បញ្ជាក់បន្ថែមថា ការធ្លាក់ចុះនៃចំនួនភ្ញៀវទេសចរអន្តរជាតិនេះ បណ្ដាលឲ្យអាជីវកម្មផ្ទះសំណាក់ សណ្ឋាគារ ភោជនីយដ្ឋាន ភ្នាក់ងារទេសចរណ៍ តូចធំជាច្រើន ក្នុងខេត្ត បានផ្អាកដំណើរការ និងប្រកាសបិទតែម្ដង។ ជាមួយនោះ បុគ្គលិកបម្រើការក្នុងវិស័យទេសចរណ៍នេះ យ៉ាងហោចណាស់ជាង១ម៉ឺននាក់ បានរងផលប៉ះពាល់។
គួរជម្រាបថា ខណៈពិភពលោក ក៏ដូចប្រទេសកម្ពុជា នៅតែបន្តរងការគំរាមគំហែងពីការរីករាលដាលនៃជំងឺកូវីដ១៩ រដ្ឋបាលខេត្តសៀមរាប រួមនិងអាជ្ញាធរជាតិអប្សរា បានខិតខំប្រឹងប្រែងជួសជុល កសាងប្រព័ន្ធហេដ្ឋារចនាសម្ព័ន្ធក្នុងក្រុងស្រុក និងតំបន់រមណីដ្ឋានអង្គរ ដើម្បីទាក់ទាញភ្ញៀវអន្តរជាតិចូលមកខេត្តទេសចរណ៍ វប្បធម៌ ប្រវត្តិសាស្ត្រ ធម្មជាតិមួយនេះឲ្យបានកាន់តែច្រើន បន្ទាប់ពីវិបត្តិនៃជំងឺកូវីដ១៩នេះ ត្រូវបានបញ្ចប់។
អត្ថបទ និងរូបភាព៖ យូ វង្ស
កែសម្រួល៖ សេង ផល្លី
