កាលពីថ្ងៃទី០២ ខែមិថុនា ឆ្នាំ២០២០នេះ សារមន្ទីរទាំង៣ ស្ថិតក្រោមការគ្រប់គ្រង របស់អាជ្ញាធរជាតិអប្សរា រួមមានសារមន្ទីរព្រះនរោត្តម សីហនុ-អង្គរ, សារមន្ទីរវាយនភណ្ឌប្រពៃណីអាស៊ី និងសារមន្ទីរកុលាលភាជន៍ឡតានី បានចាប់បើកដំណើរការវិញហើយ និងអនុញ្ញាតឲ្យភ្ញៀវទេសចរគ្រប់ជាតិសាសន៍ចូលទស្សនាដោយមិនគិតថ្លៃ។
គួររំលឹកថា យោងតាម សេចក្ដីណែនាំរបស់ ក្រសួងសុខាភិបាល កាលល្ងាចថ្ងៃទី១៧ ខែមីនា ឆ្នាំ២០២០ បានជូនដំណឹងដល់ សារមន្ទីរទាំងអស់ទូទាំងប្រទេស ត្រូវបិទជាបណ្ដោះអាសន្នរហូតដល់មានការជូនដំណឹងជាថ្មី ដើម្បីបង្ការទប់ស្កាត់ ការរីករាលដាលនៃជំងឺកូវីដ១៩ នៅកម្ពុជា។
ការបើកដំណើរការសារមន្ទីរឡើងវិញនាពេលនេះ គឺបន្ទាប់ពីមាន សេចក្ដីប្រកាសព័ត៌មានចុះថ្ងៃទី២១ ខែឧសភា ឆ្នាំ២០២០ របស់ក្រសួងវប្បធម៌ និងវិចិត្រសិល្បៈ ដោយអនុញ្ញាតឲ្យភ្ញៀវទេសចរបានចូលទស្សនាសារមន្ទីរនានា ចាប់ពីថ្ងៃទី០១ ខែមិថុនា ឆ្នាំ២០២០ តទៅ ។
ព័ត៌មានជាតិ ថ្មីៗ
លោក សេង សុធារ៉ា អនុប្រធាននាយកអភិវឌ្ឍន៍វប្បធម៌ សារមន្ទីរ និងបទដ្ឋានបេតិកភណ្ឌនៃអាជ្ញាធរជាតិអប្សរា បង្ហាញថា ការប្រកាសបើកដំណើរការសារមន្ទីរទាំង៣នេះ គឺស្របតាមសេចក្ដីប្រកាសរបស់រាជរដ្ឋាភិបាល រីឯការប្រកាសមិនគិតថ្លៃចូលទស្សនាសារមន្ទីរទាំងនេះ គឺជាការអបអរខួប២៥ឆ្នាំ នៃថ្ងៃបង្កើតអាជ្ញាធរជាតិអប្សរា ដែលបានចាប់ផ្ដើមតាំងពីដើមខែ មីនា ឆ្នាំ២០២០ រហូតដល់ចុងខែមករា ឆ្នាំ២០២១។
លោក សេង សុធារ៉ា បញ្ជាក់ថា ទោះបីសារមន្ទីរទាំង៣នេះ បានបើកដំណើរការវិញក៏ដោយ ប៉ុន្តែសារមន្ទីរនីមួយៗ នៅតែបន្តការពារ ទប់ស្កាត់ការឆ្លងរីករាលនៃជំងឺកូវីដ១៩ តាមសេចក្ដីណែនាំរបស់រាជរដ្ឋាភិបាល ដោយបានបំពាក់ឧបករណ៍វាស់កម្ដៅ ទឹកអាល់កុល សម្រាប់ត្រួតពិនិត្យ និង តម្រូវឱ្យរក្សាគំលាតសុវត្ថិភាព ២ម៉ែត្រពីគ្នា ប្រសិនបើការទស្សនានោះមានចំនួនច្រើន។
សូមជម្រាបថា សារមន្ទីរព្រះនរោត្ដម សីហនុ-អង្គរ និងសារមន្ទីរកុលាលភាជន៍ឡតានី បើកទ្វារចាប់ពីថ្ងៃអង្គារ ដល់ថ្ងៃអាទិត្យ ចំណែកសារមន្ទីរវាយនភណ្ឌប្រពៃណីអាស៊ី បើកទ្វារចាប់ពីថ្ងៃពុធ ដល់ថ្ងៃចន្ទ។ ដោយឡែក រមណីយដ្ឋានភូមិវប្បធម៌កម្ពុជា ជាតំបន់ទេសចរណ៍កែច្នៃ ក្នុងក្រុងសៀមរាប ក៏បានចាប់ផ្ដើមបើកដំណើរការឡើងវិញផងដែរ កាលពីថ្ងៃទី០៣ ខែមិថុនា ឆ្នាំ២០២០
អត្ថបទ និងរូបភាព៖ បូ សាវី
កែសម្រួល៖ សេង ផល្លី
