គិតមកត្រឹមថ្ងៃទី០៣ ខែមិថុនាឆ្នាំ២០២០ ផ្ទៃដីស្រែនៅទូទាំងខេត្តសៀមរាប ប្រជាកសិករបានសាបព្រោះស្រូវ សរុប៦៥ពាន់៥៥ហិកតា ស្មើនឹង៣៤.៨៧ភាគរយ នៃផែនការសរុប១៨៦ពាន់៥៦០ហិកតា នេះបើតាមការរបាយការណ៍របស់មន្ទីរកសិកម្មរុក្ខាប្រមាញ់ និង នេសាទខេត្តសៀមរាប។
គួររំលឹកថា តាមរយៈសេចក្ដីជូនដំណឹងស្ដីពីការព្យាករណ៍អាកាសធាតុលើកទី២ សម្រាប់ឆ្នាំ២០២០ របស់ក្រសួងធនធានទឹក និងឧតុនិយម កាលពីថ្ងៃទី១៤ ខែមេសា ឆ្នាំ២០២០ បង្ហាញថា រដូវវស្សាឆ្នាំ ២០២០ នឹងចូលមកដល់លឿនជាងឆ្នាំ ២០១៩ ដែលជាធម្មតារដូវវស្សា តែងចាប់ផ្តើមនៅពាក់កណ្តាលខែឧសភា។
តាមរយៈរបាយការណ៍របស់មន្ទីរកសិកម្មរុក្ខាប្រមាញ់ និង នេសាទខេត្តសៀមរាប សម្រាប់រដូវវស្សានៅឆ្នាំ២០២០នេះ ជាក់ស្ដែងបានចូលមកដល់នៅចុងខែមេសា ដោយគិតត្រឹមថ្ងៃទី០៣ ខែមិថុនានេះ នៅទូទាំងខេត្តសៀមរាប ទទួលបានរបបទឹកភ្លៀងជាមធ្យមជិត ២០២មីលីម៉ែត្រ។
ព័ត៌មានជាតិ ថ្មីៗ
តាមរយៈរបាយការណ៍ដដែលនេះបង្ហាញថា ផ្ទៃដីស្រែដែលបានសាបព្រោះរួចរាល់ សរុប៦៥ពាន់៥៥ហិកតា ក្នុងនោះ ស្រូវស្រាល ចំនួន ១៨ពាន់៥៦០ហិកតា , ស្រូវកណ្តាល ២៥ពាន់៥០០ហិកតា ស្រូវធ្ងន់ ១៤ពាន់៦៥០ហិកតា ស្រូវឡើងទឹក៥ពាន់៤២០ហិកតា និងស្រូវចំការ ៥៥០ហិកតា។ ក្រៅពីផ្ទៃដីសាបព្រោះរួចរាល់នេះ កសិករ ក៏បានសម្រេចការភ្ជួររាស់ដី ដើម្បីត្រៀមសាបព្រោះបន្ថែមបានសរុប៩៣ពាន់៥០០ហិកតា។
អត្ថបទ និងរូបភាព៖ ម៉ី សុខារិទ្ធ
កែសម្រួល៖ សេង ផល្លី
