ចាប់ពីថ្ងៃទី០១ រហូតដល់ថ្ងៃទី៣០ ខែវិច្ឆិកា ឆ្នាំ២០២០ គឺជារយៈពេលសម្រាប់ប្រជាពលរដ្ឋទាំងអស់នៅទូទាំងប្រទេស ធ្វើការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ នេះបើតាមសេចក្ដីជូនដំណឹងរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។
មានប្រសាសន៍ក្នុងកម្មវិធីសន្ទនាមតិ នៅថ្ងៃទី០៤ ខែមិថុនា ឆ្នាំ២០២០ លោក អាង រ៉ាស៊ី ប្រធានការិយាល័យអ្នកជាប់ពន្ធ នៃសាខាពន្ធដារខេត្តសៀមរាប បង្ហាញថា ពីមួយឆ្នាំទៅមួយឆ្នាំ ការបងពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ ក្នុងខេត្តសៀមរាប មានការកើនឡើងជាលំដាប់។ ជាមួយនឹងកំណើន នៃចំនួនអ្នកបង់ពន្ធយានយន្តនេះ ប្រជាពលរដ្ឋដែលមានកាតព្វកិច្ចអាចធ្វើការបង់ពន្ធដោយផ្ទាល់នៅ សាខាពន្ធដារខេត្តសៀមរាប ឬធនាគារដៃគូ ដូចជាធនាគារកាណាឌីយ៉ា ធនាគារអេស៊ីលីដា ធនាគារវឌ្ឍនៈ ធនាគារកម្ពុជាសាធារណៈជាដើម។
លោក អាង រ៉ាស៊ី បញ្ជាក់ថា ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ចែកជាពីរប្រភេទគឺរថយន្តថ្មី និងរថយន្តធ្លាប់បានបង់ពន្ធរួចមកហើយ។ក្នុងនោះ សម្រាប់រថយន្តថ្មី តម្រូវឲ្យម្ចាស់យានយន្តភ្ជាប់មកជាមួយ
បណ្ណសម្គាល់យានយន្ត ឬហៅថាកាតគ្រី អត្តសញ្ញាណបណ្ណម្ចាស់រថយន្ត ដោយឡែកចំពោះ រថយន្តដឹកអ្នកដំណើរ ឬរថយន្តដឹកទំនិញ តម្រូវឲ្យមាន វិញាបនបត្រត្រួតពិនិត្យលក្ខណៈបច្ចេកទេសយានយន្ត ឬហៅថាឆៀក ។
ព័ត៌មានជាតិ ថ្មីៗ
រីឯ រថយន្តធ្លាប់បានបង់ពន្ធកាលពីឆ្នាំចាស់ អាចយកកាតបង់ពន្ធយានយន្ត ដែលបានខ្លួនធ្លាប់បានស្នើសុំតែមួយ ដោយមិនបាច់ភ្ជាប់ឯកសារអ្វីទាំងអស់ ប៉ុន្តែករណីដែលពុំបានស្នើសុំ ម្ចាស់យានយន្ត ត្រូវភ្ជាប់មកជាមួយ បណ្ណសម្គាល់យានយន្ត ឬហៅថាកាតគ្រី អត្តសញ្ញាណបណ្ណម្ចាស់រថយន្ត សាលាកបត្របង់ពន្ធឆ្នាំចាស់ និងអាចស្នើសុំកាតបង់ពន្ធដើម្បីភាពងាយស្រួលនៅឆ្នាំបន្តបន្ទាប់។
គួរបញ្ជាក់ថា រយៈពេល៣ឆ្នាំចុងក្រោយ បង់ពន្ធយានយន្ត ក្នុងខេត្តសៀមរាបមានការកើនឡើងជាលំដាប់ ដោយក្នុងឆ្នាំ២០១៧ មានយានយន្តមកបង់ពន្ធសរុបជា ៣ម៉ឺន២ពាន់គ្រឿង ឆ្នាំ២០១៨ មានជាង ៣ម៉ឺន៧ពាន់ និងនៅឆ្នាំ២០១៩ មានជាង៤ម៉ឺនគ្រឿង។ សម្រាប់ឆ្នាំ២០១៩ ពន្ធ ដែលប្រមូលបានលើមធ្យោបាយដឹកជញ្ជូន និងយានជំនិះគ្រប់ប្រភេទ មានចំនួនជិត១៦ពាន់លានរៀល ជាថវិកាថ្នាក់ក្រោមជាតិ សម្រាប់ធ្វើការអភិវឌ្ឍខេត្តសៀមរាប។
អត្ថបទ៖ សេង ផល្លី
