គម្រោងធ្វើកំណាយប្រាសាទលលៃលើកទី១ នឹងត្រូវបញ្ចប់នៅពាក់កណ្ដាលខែមិថុនាឆ្នាំ២០២០ បន្ទាប់ពីមានការឯកភាពគ្នារវាងអាជ្ញាធរជាតិអប្សរា និងព្រះសង្ឃគង់ក្នុងវត្ត ដែលស្ថិតក្នុងបរិវេណប្រាសាទបុរាណមួយនេះ។
កាលពីថ្ងៃទី០៤ខែមិថុនាឆ្នាំ២០២០ លោក ថូ ថុន មន្ដ្រីបច្ចេកទេសបុរាណវិទ្យានៃអាជ្ញាធរជាតិអប្សរា បង្ហាញថា គម្រោងធ្វើកំណាយប្រាសាទលលៃលើកទី១ បានចាប់ផ្ដើមកាលពីថ្ងៃទី១៦ ខែមីនា ឆ្នាំ២០២០។ គោលបំណងនៃការធ្វើកំណាយនេះ គឺដើម្បីស្វែងរកនូវរចនាសម្ព័ន្ធសំណង់បុរាណនេះ ដែលត្រូវបានកប់ក្នុងដី ក្រោមសំណង់សាលាឆាន់ និងកុដ្ឋព្រះសង្ឃ ដែលបានកសាងពីលើ តាំងពីសម័យអាណានិគមបារាំង។ តាមរយៈការធ្វើកំណាយនេះ អ្នកជំនាញបានរកឃើញដូចជា ខ្លោងទ្វារចូល កម្រាលឥដ្ឋ កុលាលភាជន៍ និងជញ្ជាំងកំពែង នៃប្រាសាទ ជាដើម។
មន្ត្រីបច្ចេកទេសរូបនេះ បញ្ជាក់ថា ការធ្វើកំណាយនេះដែរ នឹងជួយលើកតម្លៃប្រាសាទបុរាណនេះឡើងវិញ និងដើម្បីទាក់ទាញភ្ញៀវទេសចរមកទស្សនាប្រសាទនេះកាន់តែច្រើនបន្ថែមទៀត ខណៈដែលបច្ចបុប្បន្នប្រាសាទនេះ នៅសល់តែតួប៉មប្រាសាទប៉ុណ្ណោះ។
គួរជម្រាបថា ប្រាសាទលលៃ កសាងឡើងនៅគ.ស ៨៩៣ ក្នុងរាជ្យព្រះបាទយសោវរ្ម័នទី១ និងសង់នៅចំកណ្តាលបារាយណ៍ឥន្ទ្រតដាក លើខឿន២ថ្នាក់ ឧទ្ទិសឱ្យព្រហ្មមញ្ញសាសនា និងបុព្វការីជនរបស់ព្រះអង្គ។ នាពេលកន្លងមក ប្រាសាទនេះត្រូវបានអាជ្ញាធរជាតិអប្សរាជួសជុលតួប៉មផ្នែកខាងក្នុងនិងខាងក្រៅ គ្រឹះប្រាសាទពុកផុយ ស្នាមប្រេះ និងឥដ្ឋខ្លះដែលអស់គុណភាពនាំឱ្យខូច និងបានពង្រឹង ទល់ទ្រឱ្យរួចផុតពីគ្រោះថ្នាក់ស្ទើរគ្រប់ផ្នែកហើយ៕
អាជ្ញាធរជាតិអប្សរា នឹងបញ្ចប់គម្រោងធ្វើកំណាយប្រាសាទលលៃលើកទី១
អាជ្ញាធរជាតិអប្សរា នឹងបញ្ចប់គម្រោងធ្វើកំណាយប្រាសាទលលៃលើកទី១ នៅពាក់កណ្ដាលខែមិថុនានេះ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Friday, June 5, 2020
អត្ថបទ និងរូបភាព៖ បូ សាវី
កែសម្រួល៖ សេង ផល្លី
