នៅព្រឹកថ្ងៃទី០៥ ខែ មិថុនា ឆ្នាំ២០២០ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា អមដំណើរដោយលោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមខេត្ត បានជួបសំណេះសំណាល និងនាំយកអំណោយចែកជូនជនពិការ៧៥នាក់ នៃសមាគមជនពិការអង្គរ ស្ថិតក្នុងបរិវេណ វត្តស្វាយលើ ឃុំ ស្រុកស្វាយលើ ស្រុកស្វាយលើ ខេត្តសៀមរាប។
ក្នុងបេសកកម្ម តំណាងដ៏ខ្ពង់ខ្ពស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា លោកជំទាវ ពុំ ចន្ទីនី បាននាំយកនូវការសួរសុខទុក្ខដល់ប្រជាពលរដ្ឋ ដែលមានពិការភាព ស្ថិតក្នុងសមាគមជនពិការអង្គរនេះ។ ខណៈពិភពលោក ក៏ដូចប្រទេសកម្ពុជា កំពុងជួបប្រទះ និងរងផលប៉ះពាល់ដោយសារវិបត្តិ នៃជំងឺកូវីដ១៩ កាកបាទក្រហមកម្ពុជា បានដើរតួនាទីយ៉ាងសំខាន់ក្នុងការជួយសម្រួលនូវការខ្វះខាត តាមរយៈការជូនដំណឹងពីអាជ្ញាធរមូលដ្ឋាន ភូមិ ឃុំសង្កាត់ ដោយមិនប្រកាន់ វណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីនោះឡើយ។
លោកជំទាវ ពុំ ចន្ទីនី ក៏បានក្រើនរម្លឹកដល់ប្រជាពលរដ្ឋទាំងអស់ទូទាំងស្រុកស្វាយលើ ត្រូវមានការប្រុងប្រយ័ត្នខ្ពស់ ពីការឆ្លងជំងឺកូវីដ១៩នេះ ទោះបីបច្ចុប្បន្ននៅក្នុងប្រទេសកម្ពុជា មានករណីនាំចូលជំងឺដ៏កាចសាហាវនេះ ត្រឹមតែ២ករណីបន្ថែមក៏ដោយ តែប្រជាពលរដ្ឋគ្រប់ៗគ្នា ត្រូវតែបង្កើនការយកចិត្តទុកដាក់ខ្ពស់ និងត្រៀមទប់ស្កាត់គ្រប់ពេលវេលា ដូចជា លាងសម្អាតដៃជាប្រចាំជាមួយ ទឹកសាប៊ូ អាល់កុល ឬជែល និង ពាក់ម៉ាស់ ឲ្យបានត្រឹមត្រូវ ត្រូវខ្ទប់មាត់ជាមួយក្រម៉ា ឬម៉ាស នៅពេលក្អក ឬកណ្តាស នៅក្នុងចំណោមក្រុមមនុស្សច្រើន ឬទីប្រជុំជននានាជាដើម ។
ព័ត៌មានជាតិ ថ្មីៗ
ឆ្លៀតក្នុងឱកាសនោះ លោកជំទាវ ពុំ ចន្ទីនី ក៏បានសំណូមពរដល់ប្រជាពលរដ្ឋទាំងអស់ សូមសិក្សាស្វែងយល់ ពីច្បាប់ចរាចរណ៍ផ្លូវគោក ខណៈរាជរដ្ឋាភិបាលកំពុងធ្វើការរឹតបន្តឹងការអនុវត្តច្បាប់ចរាចរណ៍ផ្លូវគោក ដែលបង្កើននូវប្រាក់ផាកពិន័យ ដែលការផាកពិន័យនេះ ដើម្បីជំរុញដល់ការគោរពច្បាប់ចរាចរណ៍ និងអាយុជីវិតប្រជាពលរដ្ឋនៅតាមដងផ្លូវ។
អំណោយដែលប្រគល់ជូនជនពិការនាពេលនោះ ក្នុងម្នាក់ៗទទួលបាន៖ អង្ករ ២៥គីឡូក្រាម , មី ១កេស , ត្រីខ ១យូរ , កញ្ចប់អនាម័យ ចំនួនមួយកញ្ចប់ រួមមានសាប៊ូ , ជែល , អាល់កុល , ក្រមា និង ថវិកា៩ម៉ឺនរៀល ក្នុងនោះថវិកាកាកបាទក្រហមកម្ពុជា ចំនួន៥ម៉ឺនរៀល និង សាខាកាកបាទក្រហមកម្ពុជាខេត្តសៀមរាបចំនួន ៤ម៉ឺនរៀល។
ក្នុងឱកាសនោះដែរ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ក៏បានប្រគេននូវទេយ្យទាន ជាគ្រឿងឧបភោគបរិភោគ និង បច្ច័យ ដល់ព្រះចៅអធិការវត្តស្វាយលើ និងចុះសួរសុខទុក្ខបងប្អូនជាជនពិការ នៅតាមខ្នងផ្ទះ ចំនួន១០នាក់ផងដែរ។
គួរជម្រាបដែរថា បេសកកម្មមនុស្សធម៌ របស់កាកបាទក្រហមកម្ពុជា មកកាន់ខេត្តសៀមរាបនេះ កាលពីរសៀលថ្ងៃទី០៤ ខែមិថុនា ឆ្នាំ២០២០ ប្រតិភូ ក៏បានចុះជួបសួរសុខទុក្ខ និងចែកអំណោយ ដល់ជនពិការចំនួន៩២នាក់ មកពីសមាគមជនពិការអង្គរ ខេត្តសៀមរាប នៅវិទ្យាល័យ ១០មករា ១៩៧៩ ក្នុងក្រុងសៀមរាប ខណៈពួកគេកំពុងជួបការខ្វះខាតក្នុងពេលមានវិបត្តិជំងឺកូវិត១៩ ។
អត្ថបទ និងរូបភាព៖ ខេង ឧត្តម
កែសម្រួល៖ សេង ផល្លី
