ការដកប៉ារាស់ ការរឹតបន្តឹងការអនុវត្តច្បាប់ចរាចរណ៍នៅលើដងផ្លូវ គឺដើម្បីកាត់បន្ថយការរំខានការធ្វើដំណើររបស់ប្រជាពលរដ្ឋនៅលើដងផ្លូវ តែពុំមែនជាការបញ្ឈប់ ឬបន្ធូរការរឹតបន្តឹងការអនុវត្តច្បាប់ចរាចរណ៍ផ្លូវគោកឡើយ នេះបើតាមការបញ្ជាក់ ពីលោកឧត្តមសេនីយត្រី តេង ច័ន្ទណាត ស្នងការរងនៃស្នងការដ្ឋាននគរបាលខេត្តសៀមរាប ថ្ងៃទី០៦ ខែមិថុនា ឆ្នាំ២០២០។
គួររំលឹកថា កាលពីថ្ងៃទី២៦ ខែឧសភា ឆ្នាំ២០២០ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានធ្វើការព្រមានជាចុងក្រោយ ដល់ស្នងការនគរបាល រាជធានី-ខេត្ត ទាំងអស់ ត្រូវដកបារ៉ាស់ចេញពីលើដងផ្លូវ ខណៈចុះរឹតបន្តឹងការអនុវត្តច្បាប់ចរាចរណ៍ផ្លូវគោកនៅតាមគោលដៅនីមួយៗ។ ស្នងការនគរបាលរាជធានី-ខេត្ត ទាំងអស់នឹងទទួលខុសត្រូវចំពោះមុខច្បាប់ ប្រសិនបើក្នុងខេត្តរបស់ខ្លួននៅតែដាក់បារ៉ាស់ និងហៅយានយន្តរបស់ពលរដ្ឋចូលត្រួតពិនិត្យ ទាំងដែលអ្នកបើកបរមិនបានល្មើសនឹងច្បាប់ចរាចរណ៍។
លោកឧត្តមសេនីយត្រី តេង ច័ន្ទណាត ស្នងការរងនៃស្នងការដ្ឋាននគរបាលខេត្តសៀមរាប លើកឡើងថា យោងតាមបទបញ្ជាដ៏ម៉ឺងម៉ាត់ របស់ឯកឧត្តមអគ្គស្នងការនគរបាលជាតិ នគរបាលចរាចរណ៍នៅទូទាំងខេត្តសៀមរាប បានអនុវត្តន៍យ៉ាងយកចិត្តទុកដាក់ និងពុំអនុញ្ញាតឲ្យមានមន្ត្រីខិលខូចឆ្លៀតឱកាសបង្កការរំខានដល់ប្រជាពលរដ្ឋដែលបានគោរពច្បាប់ចរាចរណ៍ឡើយ។
គួរបញ្ជាក់ថា យោងតាមសេចក្ដីប្រកាសព័ត៌មាន គណៈកម្មាធិការជាតិសុវត្ថិភាពចរាចរណ៍ផ្លូវគោក ស្ដីពីលទ្ធផលនៃការរឹតបន្តឹងការអនុវត្តច្បាប់ស្ដីពីចរាចរណ៍ផ្លូវគោក ចេញថ្ងៃទី០១ ខែមិថុនា ឆ្នាំ២០២០ ការរឹតបន្តឹងការអនុវត្តច្បាប់ស្ដីពីចរាចរណ៍ផ្លូវគោក រយៈពេលមួយខែដំបូង ចាប់ពីថ្ងៃទី០១ ដល់ថ្ងៃទី៣១ ខែឧសភា ឆ្នាំ២០២០ នៅទូទាំងប្រទេស មានករណីគ្រោះថ្នាក់ចរាចរណ៍សរុប ២១៨លើក ថយចុះ១៣០លើក និងស្លាប់ដោយសារគ្រោះថ្នាក់ចរាចរណ៍ចំនួន ១១៣នាក់ ថយចុះ៤២នាក់ បើធៀបនឹង ខែឧសភា ឆ្នាំ២០១៩។
អត្ថបទ និងរូបភាព៖ សេង ផល្លី និង ធន់ ពូថេ
